Read MUKANDA WANZAMBI 2 Makolonika 22 Bible Online

2 Makolonika 22 - MUKANDA WANZAMBI bible

2 Makolonika 22

¹Akwakushakama muYerusalema hiyakuswanishamu Ahaziya muZimwa nindi weyala wakansi. Aluloya chendu chawamayala chenjiliku chilombu hamu nawaArabiya ajahili awakulumpi ejima. Dichi Ahaziya, mwana kamwanta wawaYuda Yehorami, hakuyula.

²Hatachikiliyi Ahaziya kuyula wadiŋi wanyaka makumi awana nayiyedi. Wayulili muYerusalema mwaka wumu. Mama yindi ijina dindi diyiAtaliya mwana kaOmiri.

³Niyena nawa wendeli mwendelelaŋa akwamutaŋa waAhabi; muŋa mama yindi diyi wamulejelapa maana akwilachatama.

⁴Welilaŋa chatama kumesu aYehova neyi chelilaŋa akwamutaŋa waAhabi; muloŋa diwu amulejelaŋa maana helili tata yindi nafwi dehi, mwakenzi ajilumuki.

⁵Welilaŋa mwomwa mulejelaŋawu, wayili hamuna Yorami mwana kaAhabi mwanta wawaIsarela akadasi njita namwantawa kuSiriya Hazayeli, kuRamoti Gileyadi; aSiriya hiyakumukatisha Yorami.

⁶Hakufunta nakumúuka kuYezereyeli yitu yamukatishiluwu kuRama, halwiliyi namwanta wakuSiriya Hazayeli. Ahaziya mwana kaYehorami mwanta wawaYuda, hakukunkumuka nakutala mwana kaAhabi Yorami kuYezereyeli nanochu chakatiliyi.

⁷Dichi dinu kujilumuka kwajilu mukiliyi Ahaziya kwafumini kudi Nzambi, heliliyi hakuya kudi Yorami; muloŋa chashikiliyi, hakuya hamuna Yorami nakumubulakana mwana kaNimishi Yehu awayishiliyi Yehova manji kulonda afumishuhu mutaŋa waAhabi.

⁸Hadiŋi nakubabeshayi Yehu akwamutaŋa waAhabi mwayisompesheluwu, hakuwana atulambatwa waYuda nianyana kawana kwaAhaziya, adi nakumukalakela Ahaziya, hakuyila.

⁹Hakumukeŋakeŋa Ahaziya, hakumukwata, muloŋa wadiŋiwabatama muSamariya, hiyakumutwala kudi Yehu, hiyakumujaha; hiyakumujiika, muloŋa elili nawu, Himwana kaYehoshafwati wakeŋakeŋelaŋa Yehova namuchima windi wejima. Akwamutaŋa waAhaziya hiyadi ijina Ŋovu yakushakama muwantaku.

¹⁰Mama yaAhaziya Ataliya chamweniyi mwanindi nafwi dehi, hakunyamukana kujilumuna anyana kamwanta akwamutaŋa waYuda ejima.

¹¹Ilaŋa Yehoshabeyati, mwana kamwanta wamumbanda, wanoneni mwana kaAhaziya Yowashi, wamuwombolweli mukachi kawanyana kamwanta ajahiluwu, wamushili niyena ninleli yindi mwitala dakukama. Yehoshabeyati, mwana kamwanta Yehorami, iŋoda kapristu Yehoyada, hakumuswe kakulonda abuli kumumona kudi Ataliya, abuli kumujaha, muloŋa yena wadiŋimuhela Ahaziya.

¹²Hakushakama nawu mwitala daNzambi, wakuswekahohu nyaka yitanu nawumu; Ataliya hakuyula ituŋa.