Read MUKANDA WANZAMBI 2 Makolonika 7 Bible Online

2 Makolonika 7 - MUKANDA WANZAMBI bible

2 Makolonika 7

¹Chanakumishiyi Solomoni kulomba, kesi hikakuholoka mwiwulu, rihika kunoŋesha nihimulambu wakushita, niyimuna yaketwiluwu; kulema kwaYehova hikukwinzala mwitala.

²Atupristu kutwesha kwijila mwitala daYehova nehi, muloŋa kulema kwaYehova kwenzeli mwitala daYehova.

³Chaholokeli kesi, nichenjili kulema kwaYehova hetala, anyana kaIsarela ejima adiŋi nakutala; hiyakubandama chamesu awu hamaseki hachisesa chamalola, hiyakudifukula, hiyakumusakilila Yehova, nawu, Himuwahi, muloŋa luwi lwindi lwahaya nyaka.

⁴Mwanta nawantu ejima hiyakuketula yimuna kumesu aYehova.

⁵Mwanta Solomoni hakuketula yimuna aŋombi makombakaji makumi nayedi nayedi, anyikoku makombakaji nkulakaji namakombakaji makumi ayedi; dimu mwajilikililuwu itala daNzambi kudi mwanta nawantu ejima.

⁶Atupristu hiyakwimana mwakalakelelaŋawu; niaLevi nawa hiyakwimanana yuma yakwimba nachu tumina twaYehova, yatuŋiliyi Davidi yakumusakililaŋa nachu Yehova, muloŋa luwi lwindi lwahaya nyaka. Davidi wayi tuŋili hadiŋi nakuhamekayi nanyidimu yadiŋi nakukalakalawu; atupristu hiyakwimba mpùŋa kumesu awu, aIsarela ejima hiyakwimana.

⁷Solomoni hakujilika hakachi kachipanu chadiŋi kumesu etala daYehova, muloŋa washitililuku nyilambu yakushita, nimanji anyilambu yakuwunda; muloŋa kameŋa kawuneŋu katuŋiliyi Solomoni hikatwesheli kuwanina himulambu wakushita, nihimulambu wawuŋa, nimanjuku.

⁸Henohu Solomoni wadiili chawija mafuku atanu nayedi hamu nawaIsarela ejima, chipompelu cheneni nankashi chakufumisha kuwirpliluwa kuHamati ndo nikukakaloŋa kakuEjipitu.

⁹Hefuku damu chitanuna chisatu apompeli kupompa kwakudihudika; muloŋa ajilikili kameŋa mafuku atanu nayedi, adiili chawija mafuku atanu nayedi nawa.

¹⁰Hefukuda makumi ayedi nakasatu, dakakweji kamuchitanu nachiyedi, hakuyifuntisha antu kumatenti awu, hiyakuya nakuzaŋalala nakutiya kuwaha nayumayayiwahi yeliliyi Yehova, yelililiyi Davidi niSolomoni niantu indi aIsarela.

¹¹Dichi Solomoni wamanishili itala daYehova, niitala damwanta; niyuma yejima yafuukwiliyi Solomoni kutuŋila mwitala daYehova, nimwitaladindi yomweni, wayiwahishili nankashi.

¹²Yehova hakumwekana kudi Solomoni nawufuku, hakumwila nindi, Natiyi dehi muwunalombi, natondi dehi chipelichi chiikali chamami, chetala dakuketwilaŋa yimuna.

¹³Neyinakajika iwulu mwakabuli nvula, hela neyi nakatambika tubola twakadyiituŋa, hela neyi nakatemesha chipupu mudi antu ami;

¹⁴neyi antu ami anatenenuwu ijina dami akadizoza, akalomba, akakeŋakeŋa mesu ami, akabalumuka nakuleka mwendaŋawu mwatama, nakatiya mwiwulu munekala, nakayanakena nshidi yawu, nakooka ituŋa dawu.

¹⁵Ichi dinu mesuami akatonena kulomba kwakalombawu muchipelichi, nimatu ami akatiyililaku.

¹⁶Muloŋa ami natondi dehi italidi, nadijiliki dehi, kulondaijina dami dakekaluku haya nyaka; eŋaŋi, nimesu ami nimuchima wami akekalaku mafuku ejima.

¹⁷Hakwila eyi, neyi wakendaŋa kumesu ami neyi chendeliyi tata yeyi Davidi, neyi wakelaŋa munakuleji dehi mwejima, neyi wakahembaŋa yidika yami nawuŋaji wami,

¹⁸ami nakakolesha itanda dawanta weyi mwomunatiyaŋeninatata yeyi Davidi, hinelili nami, Hiwakabula muntu wakuyula muIsarelaku.

¹⁹Ilaŋa neyi enu mwakabalumuka nakuleka yidika yami nakuleja kwamikunayishili kumesu enu, himwakaya nakupesha akishi nakuyifukamina,

²⁰nakayibwita mwituŋa dami dinayinkeli, ninidi itala dinajilikili ijina dami nakadinata dakafumi kumesu ami, nakadila dakekala chishimu, dakutena mwatama munyuza yejima.

²¹Ninidi itala dinasweji kunyuŋa antu ejima akahitaku akadihayama, akela nawu, Idi ituŋa, ninidi itala, Yehova nayi koŋeli dicho chichi?

²²Akaakula nawu, Chinafumi hakuleka Yehova Nzambi yawankakulula jawu, diyi wayifumishili mwituŋa daEjipitu, hiyakukwata akishi, hiyakuyifukamina nakuyipesha; dichi chanayileteliyi kutama kwejimiku.