Read MUKANDA WANZAMBI Ezira 1 Bible Online

Ezira 1 - MUKANDA WANZAMBI bible

Ezira 1

¹Mumwaka wakusambila wamwanta wakuPeresi Kirusi, kulonda izu daYehova dakukanwa kaYeremiya dakeli dalala, Yehova hakusapumuna spiritu yamwanta wakuPeresi, Kirusi, hakubidikisha mwahita wanta windi wejima, hakuchisoneka nawa,

²nindi, Mwanta wakuPeresi Kirusi, nindi, Mawanta ahamaseki ejima Yehova Nzambi wamwiwulu nanyinkuwu ami, nanleji kunamutuŋila itala muYerusalema wamuYuda.

³Hadenu ahadi antu indi ejima hadi anyi? Nzambi yindi ekali nindi, akayi kuYerusalema wekala muYuda, akatuŋi itala daYehova Nzambi yaIsarela, wekala muYerusalema, muloŋa diyi Nzambi hachikupu.

⁴Onsu akushalashala kwonsu kwashakamawu, antu atuŋa nanawa akuya akayikwashuku nasiliva, nawuru, nayuma, natunyama, kulunjikaku nihimulambu wakumuchima wetala daNzambi wekala muYerusalema.

⁵Akulumpi akumavumu awankakulula jawaYuda naBenjamini, niatupristu, niaLevi, wowu ejima asaŋumwinuwu kudi Spiritu yaNzambi, kulonda ayi akatuŋi itala daYehova wekala muYerusalema, hiyakunyamoka.

⁶Antu adiŋuwu nawu ejima hiyakuyikwashaku nayuma yasiliva nawuru, nayuma, natunyama, niyuma yalema, kulunjikaku niyuma yejima yalambwiluwu chakumuchima.

⁷Mwanta Kirusi hakwidisha nawa yuma yamwitala daYehova yafumishiliyi Nebukaneza muYerusalema, yashiliyi mwitala dawakishi indi.

⁸Mwalala mwanta wakuPeresi Kirusi wayiidishili nachikasa chamukwakuhemba yuma yalema Miteredati, hakumuchindila kalamba kawaYuda Sheshibazari.

⁹Tiyenu mwayichindililuwu; yeŋa yawuru makumi asatu, yeŋa yasiliva ikombakaji, mpoku makumi ayedi najitanu najiwana;

¹⁰yitasu yawuru makumi asatu, yitasu yasiliva yanamutundu wamuchiyedi makulakaji awana nekumi dimu, yuma yacheŋi ikombakaji.

¹¹Yuma yawuru nasiliva yejima makombakaji atanu namakulakaji awana. Yejimiyi Sheshibazari hakuyitwala hanyamukiluwu adiŋi muwuduŋu, hafuminuwu kuBabiloni, hiyakuya kuYerusalema.