Read MUKANDA WANZAMBI Ezira 3 Bible Online

Ezira 3 - MUKANDA WANZAMBI bible

Ezira 3

¹Chashikili kakweji kamuchitanu nachiyedi, hadiŋuwu anyana kaIsarela munyikala, antu hiyakupompa kuYerusalema namuchima wawu wumu hohu.

²Mwana kaYozadaki Yeshuwa, nawana kwindi atupristu, ni mwana kaSheyaleteli Zerubabeli, nawana kwindi, hiyakunyamuka, hiyakutuŋa kameŋa kaNzambi yaIsarela, kulonda kulambwilahu nyilambu yakushita, mwasonekeluwu munshimbi jamuntu waNzambi Mosi.

³Hiyakusha kameŋa hetentaminu daku, muloŋa anatiyi dehi woma wawantu amumatuŋowu. Hiyakumulambwilahu Yehova nyilambu yakushita, yoyi nyilambu yakushita yabudidi namelela.

⁴Hiyakudya chawija chayisolu mwachisonekelawu, hiyakulambulaŋa nyilambu yakushita yakuchinda yahefuku hefuku, mwomuchaya, ifuku namudimu wadu, ifuku namudimu wadu;

⁵himu kulondela himulambu wakushitawa hefukuhefuku, ninyilambu yatukweji twatwiha, ninyilambu yayawija yaYehova yakushiika yajilikiluwu yejima, niyawantu ejima amulambwili Yehova nyilambu yakumuchima, alambwilaŋa chamu nyichima yawu.

⁶Atachikili kuhimulambu la Yehova nyilambu yakushita kufumisha kwifuku dakusambila dakakweji kamuchitanu nachiyedi; achidi kanda ali chikuku chakutuŋila tembeli yaYehova.

⁷Hiyakwinka niakwakusoŋa malola, niakwakusoŋa nyitondu, mali; hiyakwinka akwaZidoni niakwaTira yakudya nayakunwa nimanji, kulonda aletaŋa kukaluŋalwiji kuYopa nyisida yakuLebanoni, mwayiitejeleliyi mwanta wakuPeresi Kirusi.

⁸Mumwaka wamuchiyedi wakufumisha henjiluwu kwitala daNzambi kuYerusalema, mukakweji kamu chiyedi, mwana kaSheyaleteli Zerubabeli, ni mwana kaYozadaki Yeshuwa, niana kwawu asheluku atupristu nawaLevi, niantu ejima, afumini muwuduŋu enjili kuYerusalema, hiyakutachika; hiyakukunjika aLevi kumudimu wakutala mudimu wakwitala daYehova, kufumisha kudi anyaka makumi ayedi niakubadikamu.

⁹Yeshuwa nawanyanindi nawana kwindi, naKadimiyeli nawanyanindi, anyana kaYuda, hiyakwimana hamu nakutala akwakukoŋa nyidimu mwitala daNzambi; nianyana kaHenadadi, hamu nawanyanawu amayala nawana kwawu aLevi nawa.

¹⁰Cheliluwu akwakutuŋa hiyakwala chikuku chakutuŋila tembeli yaYehova, hiyakwimikaku atupristu nampùŋa jawu, anavwali wuvwalu wawu, niaLevi anyana kaAsafwi namachakayi awu, kulonda amuhamekaŋa Yehova mwaloŋeshayi dehi mwanta wawaIsarela Davidi.

¹¹Hiyakwimba, awa nakutumbula, awa nakwakwijia, hiyakuhameka nakusakilila Yehova, nawu, Himuwahi, luwi lwindi lwatiyilaŋayi aIsarela lwahaya nyaka. Chamuhamekeluwu Yehova, antu ejima hiyakudikuwa, kudikuwa kwasweja, nanochu chaaliluwu chikuku chetala daYehova.

¹²Atupristu nawaLevi amavulu, nawawakulumpi akumavumu awankakulula, wowu amapala amweni itala dakusambila, chamwenuwu hiyakwala chikuku chetalidi, hiyakudila ikumbu dadeni, iku akwawu amavulu adi nakudikuwa nakuzaŋalala;

¹³antukutwesha kushinshika niipumba dakudikuwa nakuzaŋalala, niipumbadakudilawu antu nehi, muloŋa antu adikuwili naŋovu yayeni, niipumbadatiyakeni kwakulehi.