Read MUKANDA WANZAMBI Ezira 4 Bible Online

Ezira 4 - MUKANDA WANZAMBI bible

Ezira 4

¹Cheliluwu akwankunyi nawaYuda nawaBenjamini anatiyi nawu ayilimuwuduŋu adi nakunamutuŋila Yehova Nzambi yaIsarela tembeli,

²hiyakuswila kwakwihi naZerubabeli nawawakulumpi akumavumu awankakulula, hiyakuyila nawu, Twitŋienu tutuŋi nenu, muloŋa twamukeŋakeŋaŋa Nzambi yenu neyi chimwelaŋa enu, twamuketwilaŋa yimuna kufumisha kumafuku adiŋiyi mwanta wakuAshuri Esahadoni watuleteli kunu.

³Ilaŋa Zerubabeli naYeshuwa nawawakulumpi asheluku akumavumu awankakulula awaIsarela, hiyakuyila nawu, Etu kunamutuŋila Nzambi yetu itala hamunanenu nehi; etu aweni tukudibomba tunamutuŋili Yehova Nzambi yaIsarela, mwatulejeli mwanta wakuPeresi Kirua i.

⁴Antu amwituŋa chanatiyuwu ochu hiyakuyizeyeshaŋa aYuda, hiyakuyikabishaŋa iku adi nakutuŋa,

⁵hiyakuyikwatila amahaku akuyifwishaŋa mafuku ejima adiŋiyi mwanta wakuPeresi Kirusi, ndo nikumafuku adiŋiyi mwanta wakuPeresi Dariyusa muwanta.

⁶Hadiŋiyi Ahazu wenausi muwanta, hohatachikili kuyulayi, hiyakumusonekela mukanda wakuyinka eniYuda naYerusalema muloŋa.

⁷Hamafuku adiŋiyi Aratasheshe, aBishilami naMiteredati naTabeyeli nawamabwambu jindi anashali, amusonekeleli mwanta wakuPeresi Aratasheshe mukanda; mukanda awusonekeli nansona jawaSiriya, nsaŋu jadiŋumu ajilumbulwili mwidimi dawaSiriya.

⁸Mukwakuyula Rehumi, nansoneki Shimishayi, hiyakumusonekela mwanta Aratasheshe mukanda wakuholokela Yerusalema;

⁹nawu, Mukwakuyula Rehumi, nansoneki Shimishayi, nawamabwambu jawu anashali, wowu akuDina, nakuAfwasaki, nakuTarapeli, nakuAfwarasi, nakuArakevi, nakuBabiloni, nakuShushani, nakuDehavi, nakuElami,

¹⁰ninyuza yinashali yaleteli Osinaŋari muneni walema, ashiliyi mumukala waSamariya ni mwituŋa dinashaluku damwishinadi dakaloŋa, nsaŋu oyu.

¹¹Mukanda watemesheleluwu mwanta Aratasheshe awusonekeli mwenimu, nawu; Etu ambuŋeyi antu amwishinadi dakaloŋa, nsaŋu oyu.

¹²Mwanta eluki, aYudeya afumini kudeyi enza dehi kudetu kuYerusalema. Adi nakutuŋa mukalowu watama wadikaŋa, amanisha dehi mpwembu, aloŋesha dehi nichikuku chakutuŋila.

¹³Mwanta eluki, neyi mukaliwu akawutuŋa, nimpwembu akajimanisha, hiyamba kahana hela himulambu hela kasitomi, hela mwombuku, chenochu chamba kakehesha kadiilu kawanyanta.

¹⁴Dichi dinu etu twadyaŋa muŋwa wamwitala damwanta, hitunatiyi kuwaha kumona chakusawukayi mwantaku, dichi tunatemeshi mazu akumwilukisha mwanta;

¹⁵kulonda akata latali chachiwahi mumukanda wawankakulula jeyi wakushindulula. Mumukanda wakushindulula wakamona, wakeluka neyi mukaliwu himukala wadikaŋa, wabondaŋa anyanta nawayilolu, mukachi kawu hanyaka akwatilaŋa mpùŋa jatama, mwaka hafumi nikujilumuna mukaliwu.

¹⁶Hitukumwilukisha mwanta netu, Neyi mukaliwu akawutuŋa, nimpwembu akajimanisha, hiwakamona nawa cheŋi hawudiilu mwishinadi dinu dakaloŋaku.

¹⁷Mwanta hakutemesha mazu akwakula mukwakuyula Rehumi, nansoneki Shimishayi, nawamabwambu jawu anashali ashakama muSamariya, ni mwituŋa dinashali damwishinadi dakaloŋa, nindi, Kolenu. Nsaŋu oyu.

¹⁸Mukanda wumwatutemeshela anawuntaŋili chalumbuluka.

¹⁹Ami nashumu dehi lushimbi, anatalatali dehi, anamoni komana mukaliwu kunyaka wadivwimbilaŋa nawanyanta, mukachi kawu elilaŋa nikudikaŋa nikukwata mpùŋa yatama.

²⁰Kwadiŋi nawa anyanta aYerusalema aswejeli Ŋovu, ayulili ituŋa damwishinadi dakaloŋa dejima, ayinkelaŋa ninyilambu, nikasitomi ninyombu.

²¹Shenumu lushimbi lwakulekesha antu awa, kulonda mukalowu akabuli kuwutuŋa, nichinamba kashamu lushimbi lwacheŋi.

²²Babalenu, bayi mwakalabajala nansaŋu iyuku, indi akukehesheladi kadiilu kawanyanta?

²³Mukanda wamwanta Aratasheshe watutulwiluwu chayitaŋililuwu aRehumi nansoneki Shimishayi nawamabwambu jawu, hiyakunyakala kuya kuYerusalema kudi aYudeya, hiyakuyilekesha chandombu naŋovu.

²⁴Mudimu wetala daNzambi dekala kuYerusalema wimana ni kwimana. Wemeni ho-o kushika nikumwaka wamuchiyedi wawanta wamwanta wakuPeresi Dariyusa.