Read MUKANDA WANZAMBI Ezira 5 Bible Online

Ezira 5 - MUKANDA WANZAMBI bible

Ezira 5

¹Atuprofwetu, aHagayi kaprofwetu namwana kaIdo Zekariya, hiyakuprofweta kudi aYudeya adiŋi muYuda namuY erusalema; hiyakuprofweta kudi wena mwijina daNzambi yaIsarela.

²Mwana kaSheyaleteli Zerubabeli, namwana kaYozadaki Yeshuwa anyamuka nikunyamuka, hiyakutachika kutuŋa itala daNzambi dekala kuYerusalema; niatuprofwetu aNzambi adiŋi hamu nawu nakuyikwashaku.

³Henohu nguvulu wamwishinadi dakaloŋa Tatenayi naShetabozenayi nawamabwambu jawu hiyakuyila nawu, Wayinkeli lushimbi lwakutuŋa italidi, nikumanisha mpwembu iyi, hinyi?

⁴Dimu twahosheli nawu netu, Indi awa antu adi nakutuŋa italidi majinawu anyi?

⁵Hela chochu, disu daNzambi yawu dadiŋi hadi awakulumpi awaYudeya, kuyilekesha kwawu nehi, chiŋa nsaŋu yinashi ki dehi kudi Dariyusa, niyena nafuntishi dehi mukanda wakwakula nsaŋu iyi.

⁶Mukanda watemesheli nguvulu Tatenayi wamwishinadi dakaloŋa, naShetabozenayi nawamabwambu jindi aAfwarasaki adiŋi mwishinadi dakaloŋa, kudi mwanta Dariyusa awututulwili mwenimu.

⁷Hiyakumutemeshela mukanda wanasonekuwu nawu, Tunemwishi mwanta Dariyusa.

⁸Mwanta eluki, etu twaya muwuloŋu waYuda kwitala daNzambi muneni, anadituŋa namalola amaneni, asha dehi ninyalachi mumbaŋu, mudimu iwu wudi nakwenda naŋovu hohu, wudi nakulumbuluka kumakasawu.

⁹Twayihula owu awakulumpi, hitukuyila netu, Wayinkeli lushimbi lwakutuŋa italidi nikumanisha mpwembu iyi hinyi?

¹⁰Twayihula nawa majinawu kulonda tusoneki majina awantu adi nakuyikalakesha, tukulejumu eyi.

¹¹Wena atwakula nawu, Etu tuyambuŋa Nzambi wewulu neseki, tudi nakutuŋa itala datuŋiluwu dehi munahiti nyaka yayivulu, adituŋali kudi mwanta muneni wawaIsarela, diyi wadimanishili.

¹²Ankakulula jetu chasaŋumwinuwu ndombu yaNzambi wewulu, hakuyihana kudi mwanta wakuBabiloni, kaKaladeya Nebukaneza, wakisaŋeni italidi, hakutwala niantu kuBabiloni.

¹³Ilaŋa mumwaka wakusambila wamwanta wakuBabiloni Kirusi, mwanta Kirusi washilumu lushimbi lwakutuŋa itala daNzambi idi.

¹⁴Yuma yetala daNzambi yawuru nasiliva yafumishiliyi Nebukaneza mutembeli yadiŋi muYerusalema, yatweliyi mutembeli yakuBabiloni, mwanta Kirusi wayifumishili mutembeli yakuBabiloni, wayinkeli muntu wumu ijina dindi Sheshibazari enkeliyi wunguvulu.

¹⁵Wamwilili nindi, Twalaku yumiyi, wuyi wakayishi mutembeli yekala kuYerusalema, akatuŋi itala daNzambi hachipela chadu.

¹⁶Yena Sheshibazari wenjili, waalili chikuku chakutuŋila itala daNzambi dekala muYerusalema. Kufumisha henohu saŋa atuŋilawu ho-o, nihanu kanda dimani.

¹⁷Dichi dinu neyi mwanta natoŋojoki nindi chachiwahi, akeŋakeŋi mwitala damwanta dakuswekela yuma yalema, dekala kuBabiloni, atali neyi chalala mwanta Kirusi diyi washilumu lushimbi lwakutuŋa idi itala daNzambi kuYerusalema, mwanta atemeshi mazu akutuleja mwanakeŋiyi nansaŋu iyi.