Read MUKANDA WANZAMBI Ezira 6 Bible Online

Ezira 6 - MUKANDA WANZAMBI bible

Ezira 6

¹Mwanta Dariyusa hakushamu lushimbi, hiyakukeŋakeŋa mwitala danyikanda mwaswekelaŋawu yuma yalema yamuBabiloni.

²KuAkimeta kuŋanda yekala muwuloŋu waMediya, hiyakuwana mukanda wakuvuŋa, asonekamu nsaŋu

³nawu, Mumwaka wakusambila wamwanta Kirusi, mwanta Kirusi washilumu lushimbi nawu, Odu itala daNzambi kuYerusaIema, akatuŋi itala daketwilaŋawu yimuna, aka ali nichikuku chadu chakola. Kuleha kwadu kwakwiwulu munkotweli jachikasa makumi atanu nadimu, mukutoha kwadu munkotweli makumi atanu nadimu nawa.

⁴Nyisululu yamalola amaneni yisatu, musululu wanyalachi yayiha wumu. Mali akutuŋa nachu akafumi kwitala damwanta.

⁵Niyuma yetala daNzambi yawuru nasiliva, yafumishiliyi Nebukaneza mutembeli yekala kuYerusalema, yatweliyi kuBabiloni, akayifuntishiliyi cheŋi, akayitwali cheŋi kutembeli yekala kuYerusalema, wakayishi mwitala daNzambi, ichi chakayi hachu, ichi chakayi hachu.

⁶Dichi dinu, enu aTatenayi, nguvulu wamwishinadi dakaloŋa, naShetabozenayi, nawamabwambu jenu aAfwarasaki mwekala mwishinadi dakaloŋa, fumenuku, muyi kwakulehi.

⁷Mudimu wetala daNzambi idi wulekenu wuyi kumbidi. Mulekenu nguvulu wawaYudeya nawawakulumpi awaYudeya atuŋi itala daNzambi idi hachipela chadu.

⁸Nashi dehi lushimbi lumwakayila awakulumpi awa awaYudeya, kulonda kutuŋa itala daNzambi idi; kuyuma yamwanta, kafwampi kwokunyilambu yamwishinadi dakaloŋa, akanonuku swayi, akayinki awa antu kulonda akabuli kukaŋanya.

⁹Yonsu yanabuluwu, hela anyana kaŋombi amayala, hela yizamba yanyikoku, hela nyana kanyikoku, yakumushitilaŋa Nzambi wewulu nyilambu yakushita, nitidiku, nimuŋwa, nivinyu, nimanji, mwonsu mwakahoshelawu atupristu adi kuYerusalema, akayinkaŋa hefuku hefuku chakubula kukaŋanya;

¹⁰kulonda akamuketwilaŋa Nzambi wewulu yimuna yamavumba amawahi, kulonda akalombelaŋa mwanta nawanyanindi akahandaŋa.

¹¹Nashumu dehi nawa lushimbi, lwakwila yowu wakabalumuna izu idi, akafumisha mwalachi kwitala dindi, akamukanjikuhu, akamuhatuhu; itala dindi dakekali izalelu hansaŋu iyi.

¹²Nzambi nashakamishi ijina dindi kwenoku, akajilumuni anyanta ejima, nawantu ejima, akolola makasawu nawu abalumuni izu idi, akisaŋani itala daNzambi idi dekala kuYerusalema. Ami Dariyusa yami nashumu lushimbi; akelumu swayi.

¹³Tatenayi, nguvulu wamwishinadi dakaloŋa naShetabozenayi, nawamabwambu jawu, hiyakwilamu swayi nanochu chatemesheliyi mwanta Dariyusa mazu.

¹⁴Akulumpi awaYudeya hiyakutuŋa, mudimu wawu hiwukuya kumbidi nakuprofweta kwaprofwetelaŋawu kaprofwetu Hagayi, namwana kaIdo Zekariya. Hiyakutuŋa, hiyakudimanisha mwomwayilejeliyi Nzambi yaIsarela, mwomwaya lushimbi lwaKirusi naDariyusa, nimwanta wakuPeresi Aratasheshe.

¹⁵Italidi damanini hefuku damu chisatu dakakweji Adari, mwomumwaka wamu chitanu nawumu wawanta wamwanta Dariyusa.

¹⁶Anyana kaIsarela nawatupristu, nawaLevi, nawayili muwuduŋu anashali, hiyakujilika itala daNzambi idi nakuzaŋalala.

¹⁷Hakujilika itala daNzambi idi alambwili amayala aŋombi nkulakaji, yizamba yanyikoku makulakaji ayedi, nyana kanyikoku makulakaji awana; himulambu wahanshidi walambwililuwu aIsarela ejima, yizamba yampembi ikumi nayiyedi, mwomwachindilawu nyichidi yawaIsarela.

¹⁸Hiyakuyisha atupristu mwayambwilawu, mwayambwilawu, niaLevi mumazanvu awu, mumazanvu awu, kulonda amukala kelaŋa Nzambi wekala kuYerusalema, mwomwasone-kawu mumukanda waMosi.

¹⁹Ayili muwuduŋu hiyakudya paseka hefuku dekumi nakawana dakakweji kakusambila.

²⁰Muloŋatupristu nawaLevi aditookesha dehi hamu; wejima wawu atookeli; hiyakujahila ayili muwuduŋu ejima paseka, niyawana kwawu atupristu, niyawu awenawu.

²¹Anyana kaIsarela afuntili cheŋi afumini muwuduŋu, nawakwawu ejima adambwili kumajilu anyuza yadiŋi mwituŋa, adikumini nawena kulonda kumukeŋakeŋa Yehova Nzambi yaIsarela, adiili.

²²Adiili chawija chamankendi akadi iluŋi mafuku atanu nayedi nakuzaŋalala. Muloŋa Yehova nayitiyishi dehi kuwaha, nabalumuni dehi muchima wamwanta wakuAshuri wutali kudi wena, kulonda wukoleshaŋa makasawu kumudimu wetala daNzambi, Nzambi yaIsarela.