Read MUKANDA WANZAMBI Ezira 7 Bible Online

Ezira 7 - MUKANDA WANZAMBI bible

Ezira 7

¹Kulondela hayumiyi mumafuku awanta wamwanta wakuPeresi Aratasheshe, kwenjili Ezera mwana kaSeraya, Seraya mwana kaAzariya, Azariya mwana kaHilikiya,

²Hilikiya mwana kaShalumi, Shalumi mwana kaZadoki, Zadoki mwana kaAhitubi,

³Ahitubi mwana kaAmariya, Amariya mwana kaAzariya, Azariya mwana kaMerayoti,

⁴Merayoti mwana kaZerahiya, Zera hiya mwana kaUzi, Uzi mwana kaBuki,

⁵Buki mwana kaAbishuwa, Abishuwa mwana kaFwineha si, Fwineha si mwana kaEleyazari, Eleyazari mwana kakapristu muneni Aroni.

⁶Yeniwu Ezera hakufuma kuBabiloni, hakuyaku. Wadiŋi nsoneki weluka chachiwahi nshimbi jaMosi, jaheniyi Yehova Nzambi yaIsarela. Mwanta wamwinkeli yalombeliyi yonsu, mwomwaya chikasa chaYehova Nzambi yindi chadiŋi hadi yena.

⁷Hikukuya nianyana kaIsarela amakwawu, niatupristu amakwawu, niaLevi, niakwakwimba tumina, niakwakuhemba kuyisu, niaNetini, hiyakuya kuYerusalema mumwaka wamu chitanu nachiyedi wamwanta Aratasheshe.

⁸Hakushika kuYerusalema mukakweji kamuchitanu kamumwaka wamwanta wamu chitanu nachiyedi.

⁹Hefuku damuchimu dakakweji kakusambila dihu hatachikiliyi kufuma kuBabiloni, hefuku damuchimu dakakweji kamuchitanu didu dashikiliyi kuYerusalema mwomwaya chikasa chaNzambi yindi chachiwahi chadiŋi hadi yena.

¹⁰Muloŋa Ezera washa dehi muchima windi hakukeŋakeŋa nshimbi jaYehova, akelumu, akaleji adi muIsarela yidika nawuŋaji.

¹¹Tiyenu mwatutulwiluwu mukanda wenkeliyi mwanta Aratasheshe kapristu Ezera nsoneki, yowu nsoneki yamazu akuleja kwaYehova, niayidika yindi yenkeliyi aIsarela,

¹²nawu, Aratasheshe, mwanta wawanyanta, nasonekeli kapristu Ezera, nsoneki yanshimbi yaNzambi wewulu, kolaku, nsaŋu oyu.

¹³Ami nashumu dehi lushimbi lwakwila nami, aIsarela ejima, niatupristu twawu, niaLevi, ekala mumatuŋami, anakeŋi kuya kuYerusalema chakunyichima yawu awenawu, akayi naneyi.

¹⁴Muloŋa eyi anakutemeshi kudi mwanta nawakwakumuleja maana atanu nayedi, kulonda wakehujoli nsaŋu jakuYuda naYerusalema, mwaya nshimbi jaNzambi yeyi ŋawudi naju mumakaseyi;

¹⁵kulonda wakatwali siliva nawuru, wenkeluwu Nzambi yaIsarela washakama kuYerusalema kudi mwanta, nawakwakumuleja maana;

¹⁶nasiliva yejima, nawuru wejima, wuwakawana muwuloŋu waBabiloni wejima, hamu nahimulambu wawantu nawatupristu wakumuchima, wakalambwilawu itala daNzambi yawu wekala kuYerusalema, chakunyichima yawu awenawu.

¹⁷Dichi wakalandaŋa swayi namali awa nyana kaŋombi amayala, niyizamba yanyikoku, ninyana kanyikoku, hamu nanyilambu yawu yawuŋa nanyilambu yawu yakuhuŋununa, wakayilambulaŋa hakameŋa kakwitala daNzambi yenu wekala muYerusalema.

¹⁸Mwonsu muwakamona eyi nawana kweyi nenu munawahi kwila nasiliva nawuru wakashalaku, kelenu mwaya muchima waNzambi yenu.

¹⁹Oyu yuma yanakwinkuwu yakukalakala nachu mudimu wetala daNzambi yeyi, wakayishikŋaŋa kumesu aNzambi yaYerusalema.

²⁰Yidika yonsu yakamwekana yakwitala daNzambi yeyi yakwila chiŋa eyi wakahanaku yuma, wakayinonaŋa kwitala damwanta dakuswekela yuma yalema, hiwakahana.

²¹Ami aweni, yami mwanta Aratasheshe, nashumu dehi lushimbi lwawakwakuhemba yuma yalema ejima adi mwishinadi dakaloŋa, lwakwila nami, Mwakeli swayi hohu mwonsu mwakakeŋayi kapristu Ezera, nsoneki yanshimbi jaNzambi wewulu;

²²hela chakumwinka ntalenta jasiliva nkulakaji, hela ngungungu jatidiku nkulakaji, hela nswaha jeneni javinyu nkulakaji, hela nswaha jeneni jamanji nkulakaji, hakwila muŋwa hichikweti kuwesekaku.

²³Chonsu chakayilejawu kudi Nzambi wewulu, akelili itala daNzambi wewulu nakalemesha; indi matuŋa amwanta nawanyanindi amoni tuhu ndombu?

²⁴Tunayilejumu nawa netu, atupristu nawaLevi, nawakwakwimba tumina, nawakwakuhemba kuyisu, nawaNetini, hela akalakalaŋa mudimu wetala daNzambi idi, chinjila kuyifutisha hela himulambu, hela kasitomi, hela mwombu.

²⁵Hakwila eyi Ezera, wakakunjikaŋa akwakuhosha nyiloŋa nawansompeshi mwomwaya maana aNzambi yeyi iwekala nawu, kulonda akasompeshaŋa antu ejima adi mwishinadi dakaloŋa, eluka nshimbi jaNzambi yeyi; wabula kumwiluka mwakamulejaŋa.

²⁶Wakaleka kwila nshimbi jaNzambi yeyi, hela nshimbi yamwanta, akamusompeshi swayi, hela chakumujaha, hela chakumuhaŋa, hela chakumutambula yuma yindi, hela chakumusha mukaleya.

²⁷Kisu kisu Yehova Nzambi yawankakulula jetu, nashichuma chi kuma hichi mumuchima wamwanta, kulonda awahishi itala daYehova wekala muYerusalema diikali dalubanji;

²⁸nanmwekesheli luwi kumesu amwanta, nawakwakumuleja maana, nawatulamba twamwanta alema. Hinukudikolesha nachikasa chaYehova Nzambi yami chadiŋi hadami, hinukunonanona mudi aIsarela awakulumpi akuya nanami.