Read MUKANDA WANZAMBI Ezira 8 Bible Online

Ezira 8 - MUKANDA WANZAMBI bible

Ezira 8

¹Tiyenu awakulumpi akumavumu awankakulula jawu; tiyenu muyachiwanawa ayili nanami, afumini kuBabiloni mumafuku awanta wamwanta Aratasheshe.

²Wakudi anyana kaFwineha si, Gereshomi. Wakudi anyana kaItamari, Danyeli. Wakudi anyana kaDavidi, Hatushi.

³Wakudi anyana kaShekaniya. Wakudi anyana kaParoshi, Zekariya, hamu namayala akuchindila kumuyachi nkulakaji namakumi atanu.

⁴Wakudi anyana kaPahatimowabi, Elihowenayi mwana kaZerahiya, hamu namayala makulakaji ayedi.

⁵Wakudi anyana kaShekaniya, mwana kaYahaziyeli, hamu namayala makulakaji asatu.

⁶Wakudi anyana kaAdini, Ebedi mwana kaJonatani, hamu namayala makumi atanu.

⁷Wakudi anyana kaElami, Yeshaya mwana kaAtaliya, hamu namayala makumi atanu nayedi.

⁸Wakudi anyana kaShefwatiya, Zebadiya mwana kaMikayeli, hamu namayala makumi atanu nasatu.

⁹Wakudi anyana kaYowabi, Obadiya mwana kaYehiyeli, hamu namayala makulakaji ayedi nekumi natanu nasatu.

¹⁰Wakudi anyana kaShelomiti, mwana kaYosifwiya, hamu namayala nkulakaji namakumi atanu nadimu.

¹¹Wakudi anyana kaBebayi, Zekariya mwana kaBebayi, hamu namayala makumi ayedi namayala atanu nasatu.

¹²Wakudi anyana kaAziŋadi, Yohanani mwana kaHakatani, hamu namayala nkulakaji nekumi dimu.

¹³Akudi anyana kaAdonikami akumininuku, majinawu iwu Elifweleti, iwu Yewuweli, iwu Shemaya, hamu namayala makumi atanu nadimu.

¹⁴Akudi anyana kaBiŋivayi, Utayi naZabudi, hamu namayala makumi atanu nayedi.

¹⁵Hinukuyipompesha kukaloŋa kaya kuAhava, hitukushakama muchilombu kwenoku mafuku asatu. Hinukuyishinshika antu niatupristu, nami nitali, kumona anyana kawaLevi kwosi.

¹⁶Hinukutemesha nakutambika Eliyezeri, naAriyeLi, naShemaya, naElinatani, naYaribi, naElinatani, naNatani, naZekariya, naMeshulami, awakulumpi; niYoyaribi naElinatani nawa, adiŋi akwakuleja akwawu.

¹⁷Hinukuyitemesha ayi kudi mukulumpi Ido wadiŋi kuKasifwiya; hinukuyileja mwakamwilawu Ido nawana kwindi aNetini adiŋi kuKasifwiya, kulonda atuleteli akwakukalakala kwitala daNzambi yetu.

¹⁸Nachikasa chachiwahi chaNzambi yetu chadiŋi hadetu hiyakutuletela muntu wamaana wakudi anyana kaMahili, mwana kaLevi, Levi mwana kaIsarela; niSherebiya nawanyanindi nawana kwindi, ikumi natanu nasatu;

¹⁹niHashabiya, naYeshaya wakudi anyana kaMerari niana kwindi nawanyanawu, makumi ayedi;

²⁰akudi aNetini akunjikiluwu aDavidi nawatulamba kumudimu wakukalakela aLevi, aNetini makulakaji ayedi namakumi ayedi, wejima wawu akutena hejina hejina.

²¹Hinukubidikisha kwenoku kukaloŋa Ahava, nami, Tujiŋenu nanzala kulonda tudizozi kumesu aNzambi yetu, atwendeshi chachiwahi munjila yetu, hamu nawanyanetu anyanya nayuma yetu yejima.

²²Muloŋa natiyili nsonyi yakumulomba mwanta kutwinka chendu chamashidika nawakwatuwalu, akutukwashaku kudi ayilumbu adi munjila. Muloŋa twamulejeli dehi mwanta, netu, Chikasa chaNzambi yetu chidi nawantu ejima amukeŋakeŋaŋa kulonda kuyiwahisha; ilaŋa Ŋovu yindi nakuzuwa kwindi kudi nawantu ejima akumuleka.

²³Dihu hafumini etu kujiŋa nanzala nakumulembelela Nzambi yetu hansaŋu iyi, atwitiji nikutwitiji.

²⁴Hinukwambulaku awakulumpi awatupristu ikumi nayedi, wowu aSherebiya naHashabiya hamu nawana kwawu ikumi.

²⁵Hinukuyipezeleshela siliva nawuru nayuma, wowu himulambu wetala daNzambi yetu walambwiluwu amwanta, nawakwakumuleja maana, nawatulamba twindi, nawaIsarela ejima adiŋuku.

²⁶Hinukuyipezeleshela mumakasawu ntalenta jasiliva makulakaji atanu nadimu namakumi atanu, niyuma yasiliva ntalenta nkulakaji, yawuru ntalenta nkulakaji;

²⁷yitasu yawuru makumi ayedi, yajidariki ikombakaji; niyuma yiyedi yawuneŋu walezumuka wutooka, kulema hohamu nawuru.

²⁸Hinukuyila nami, Enu mwamujilila Yehova, niyuma yajila nawa. Siliva nawuru yahimulambu wakuhimulambu la Yehova Nzambi yawankakulula jenu chakumuchima.

²⁹Babalenu, yihembenu chachiwahi nichimwakayipezelesha kudi awakulumpi awatupristu nawaLevi, nawawakulumpi akumavumu awankakulula jawaIsarela kuYerusalema, mumatala amwitala daYehova.

³⁰Atupristu nawaLevi atambula nipezu yasiliva nawuru nayuma, kulonda kuyitwala kuYerusalema kwitala daNzambi yetu.

³¹Twafumini kukaloŋa Ahava hefuku dekumi nakayedi dakakweji kakusambila, netu tuyi kuYerusalema. Chikasa chaNzambi yetu chadiŋi hadetu, watupulwishili kudi ayilumbu, nikudi akwakubelamina adiŋi munjila.

³²Tushika nikuYerusalema, hitukushakamaku mafuku asatu.

³³Hefuku damu chiwana hohapezelesheluwu siliva nawuru nayuma yamwitala, ayipezelesheleli mwitala daNzambi yetu kuchikasa chakapristu Meremoti mwana kaUriya; wadiŋi hamu namwana kaFwineha si Eleyazari; adiŋi nawaLevi namwana kaYeshuwa Yozabadi, ni mwana kaBinuwi Nowadiya;

³⁴Yuma yejima yakuchinda nikupezelesha, pezu yejima ayisonekeli hohenohu.

³⁵Ayili muwuduŋu, afuma dehi muwuduŋu, hiyakuhimulambu la Nzambi yaIsarela nyilambu yakushita, amayala aŋombi ikumi nayedi yawaIsarela ejima, yizamba yanyikoku makumi atanu nawana nayitanu nawumu, nyana kanyikoku makumi atanu nayedi nayitanu nayiyedi, yizamba yampembi ikumi nayiyedi yahimulambu wahanshidi; yejimiyi yahimulambu wakushita wakuhimulambu la Yehova.

³⁶Hiyakwinka ayilolu amwanta nawanguvulu adiŋi mwishinadi dakaloŋa nshimbi jamwanta; niwena hiyakukwasha niantu niitala daNzambi.