Read MUKANDA WANZAMBI Ezira 9 Bible Online

Ezira 9 - MUKANDA WANZAMBI bible

Ezira 9

¹Cheliluwu aneli dehi yumiyi, atulamba hiyakuswila kwakwihi nanami, hiyakwila nawu, AIsarela nawatupristu twawu nawaLevi anabulikudambula kunyuza yamumatuŋa, adi nakwila yishimashima yawu, yoyawaKenani, nawaHiti, nawaPerizi, nawaYebusi, nawaAmoni, nawaMowabi, nawaEjipitu, nawaAmori.

²Anyanawu awambanda asumbula dehi kwawu, ayisumbwila dehi ni anyanawu amayala; mwaka muza wajila wudivwaŋaŋa nanyuza yamumatuŋa. Mwalala atulamba nawawakulumpi diwu ananyakeli muloŋiwu.

³Chinatiyili chumichi hinukutabula chi kovwelu chami niihina dami, hinukupela nsuki jakunamutu wami, niwevu wami, hinukushakama nakuhayama.

⁴Kudami hikukupompa ejima azaalili woma wamazu aNzambi yaIsarela, namuloŋa wanawa ayili muwuduŋu; ami saŋa nashakamina kushika nikuhimulambu wamelela.

⁵Hahimulambu wamelela hinukunyamuka kunadiŋi nakudizoza, iku saŋa natabwila ihina dami nichikovwelu chami, hinukudimbukila kumanuŋu ami, hinukumwolwela Yehova Nzambi yami makasami;

⁶nami, Ala, Nzambi yami! Ami nakwati dehi ninsonyi yakufumbula mesu ami kudeyi Nzambi yami, muloŋa kuluwa kwetu kwasweja dehi kunabadiki dehi nihanyitu yetu, kutanya kwetu kwatoha dehi kwashika dehi nimumawulu.

⁷Kutanya kwetu kwakufumisha hamafuku adiŋuwu ankakulula jetu kushika nikulelu kunasweji nankashi. Hakuluwa kwetu dihu hanafumi anyanta jetu nawatupristu twetu kuyihana kudi anyanta amumatuŋa, amonaŋa mpoku yakabali, nawuduŋu, nikuyipupa, nikuyikolesha nsonyi neyi chanamonuwu lelu.

⁸Ichi dinu, aka kapinji kantesha kunamwekani dehi luwi lwakudi Yehova Nzambi yetu lwakutushiyahu etu antesha tupuluki, atushili hawukulamenu mwindi mwajila, Nzambi yetu atutookesheli mesu etu, atuhizumwishuhu chantesha nawuduŋu wetu.

⁹Muloŋa tuyanduŋu; hela chochu, Nzambi yetu hanatwambuki muwuduŋu wetuku, natwolweli luwi lwakututoŋahu kudi anyanta akuPeresi mwaka tumonaŋa kuhizumuka, tumoni nikutuŋa itala daNzambi yetu, nikudiloŋesha hidafwafwa, atwinki nimpwembu muYuda namuYerusalema.

¹⁰Ichi dinu, eyi Nzambi yetu tukuhosha dinu netwidi? Twaleka dehi kuleja kweyi,

¹¹kuwatulejeli kutunwa twawambuŋeyi atuprofwetu, neyi, Ituŋa dimukuya nakuheta hiituŋa damajilu, nyuza yamumatuŋa adikwatisha dehi majilu nayishimashima yawu, yinenzalumu mbe kufumisha kunsa yimu kushika nikunsa yi kwawu nawuzondu wawu.

¹²Neyi, Dichidinubayi muyinkaŋa anyanenu ayisumbula kudi anyanawuku, hela anyanenu bayi asumbula anyanawuku, bayi muyikwasha amoni kumwena hela kuhetaku nyaka yejima; kulonda mwakekalaŋa naŋovu, mwakadyaŋa yayiwahi yamwituŋa, kulonda mwakadiishilaŋa anyanenu dakuswanaŋa haya nyaka.

¹³Kulondela hayuma yejimiyi yitunamoni yinafumi hayatama yitunakoŋi, nahakutanya kwetu kwasweja kutoha, kutoŋa eyi Nzambi yetu wunabuli kutubabesha mwashikila kuluwaluwa kwetu, wunatushili antu antesha.

¹⁴Komana tumotoki cheŋi muwatulejeli, tudibombi nanyuza yakoŋaŋa yishimashimiyi? Hiwukuzuwa chakwila niniwu wukushalahu, niwukupuluka neliuku?

¹⁵Eyi Yehova Nzambi yaIsarela, waloŋa kweyi, muloŋa tunashaluhu etu antesha tunapuluki, neyi ichi chitukumona lelu. Yetu tudi kumesu eyi awa, nakutanya kwetu kutunawani. Hitunatweshi kwimana kumesu eyi nansaŋu iyuku.