Read MUKANDA WANZAMBI Estere 2 Bible Online

Estere 2 - MUKANDA WANZAMBI bible

Estere 2

¹Chiyakumini yumiyi, nikuzuwa kwamwanta Ahasuwenausi kunawundi dehi, hakwanuka Vashitayi, nicheliliyi, nilushimbi lwamusonekeleluwu.

²Ambuŋamwanta amukalakelelaŋa hiyakumwila nawu, Amutondeli mwanta ajiki amawahi.

³Mwanta atondi atulala mumawuloŋu ejima amuwantawindi, akapompeshi ajiki awatunkaŋa amawahi ejima kuŋanda kuShushani, mwitala dawambanda kudi katumwa kamwanta Heŋayi, mukwakuhemba ambanda; akayinki yuma yawu yakudikosa nachu.

⁴Yowu chaŋadima akatiyayi mwanta kuwaha akahiŋi muwumwadi waVashitayi. Chumichi chamutiyishili mwanta kuwaha, hakwilamu.

⁵Mupanda muShushani mwadiŋi kaYudeya wumu ijina dindi Modekayi, mwana kaYayiri, Yayiri mwana kaShimeyi, Shimeyi mwana kaKishi kaBenjamini;

⁶amukwatili kuYerusalema hamu nawankoli akwatiluwu, naYekoniya mwanta wawaYuda, akwatiliyi Nebukaneza mwanta wakuBabiloni.

⁷Waleleli Hadasa, diyi Esita mwana kamandumi yindi, muŋayena hadiŋi natata yindi hela mama yinduku, yenowu chapadima wadiŋi wamuwahi nikumujimba ni kumesu. Chafwiluwu atata yindi namamayindi Modekayi hakumutambula, nindi mwanami.

⁸Chelili izu damwanta nilushimbi lwindi lunatiyakani dehi, niayapadima amavulu anayipompeshi dehi kupanda kuShushani kwadiŋi Heŋayi, hiyakumutwala Esita mwitala damwanta, mwadiŋi Heŋayi mukwakuhemba ambanda.

⁹Chanadimowu wamutiyishili Heŋayi kuwaha, waweni wuselewa kudi yena; yena hakunyakisha kumwinka yakudikosa nachu, hamuna yuma yamutentekeleluwu, hakumwinka niayapadima amwitala damwanta adiŋi atela kumwinka, atanu nayedi. Wamufumishili niyena niayapadimayindi kwadiŋuwu, wayitweli kwitala dawambanda kumbadi yasweja kuwaha.

¹⁰Esita hashimwini hela kwasemukayi hela awusoku winduku, muŋa amulekesheli kudi Modekayi, nindi, Bayi wakashimunaku.

¹¹Modekayi hakwendelaŋa kwakwihi nebulu dakwitala dawambanda, kulonda elukaŋa mwakushakamina ŋayi Esita nimwakukeŋa kumwilawu.

¹²Ayaŋadima ejima ayililaŋa mwomwayililaŋawu ambanda, tukwejiikumi natuyedi, muŋa dimu mwashikilaŋa mafuku awu akudikosa, tukweji tutanu nakamu twamanji amora, tukweji tutanu nakamu nawatwamanji amavumba amawahi, kubombelaku niyuma yi kwawu yadikosapawu nachu ambanda. Chiyakwila aneli dehi yumiyi, hiyakuya dinu kudi mwanta Ahasuwenausi, chapadima nefuku dindi, chapadima nefuku dindi.

¹³Tiyenu mwayililaŋawu ambanda kudi mwanta; elilaŋa chejima chakukepayikufuma nachu mwitala dawambanda kulonda ayi nachu kudi mwanta hiyakumwinka.

¹⁴Namelela hakuya kudi mwanta, chikukucha hakufunta, hakuya mwitala dawambanda damu chiyedi, kudi Shasheŋazi kalala kamwanta wahembelapa antombu; kuya cheŋi mudi mwanta nehi, chiŋa mwantanamutiyi kuwaha, chipa namutambiki cheŋi hejina.

¹⁵Kwinza Esita mwana kaAbihayili, mandumi yaModekayi atambwiliyi nindi mwanami, chashikili ifuku dindi dakuya kudi mwanta, hakeŋeli chumaku chipa chochakumutoŋwelawu kudi kalala kamwanta Heŋayi mukwakuhemba ambanda. Esita amuhamekeli kudi antu ejima adiŋi nakumutala.

¹⁶Hiyakumutwala Esita kudi mwanta Ahasuwenausi mwitala dindi dawanta hakakweji kamwikumi, yowu kakweji Tebeti, mumwaka wawantawindi wamu chitanu nachiyedi.

¹⁷Mwanta wamukeŋeli Esita chakubadika ambanda ejima, waweni niwuselewa niluwi kumesu indi, chakubadika ajiki ejima; dichi washili chibaŋula chawanta kunamutu windi, hakumuhiŋishamu wumwadi wadiŋi waVashitayi.

¹⁸Mwanta hakutelekela atulamba twindiejima ni ambuŋindi ejima chawija cheneni, chochawija chaEsita. Hakunookesha mawuloŋu kunsaŋu janyilambu, hakuhanahana yamukunkulu mwomwahanina ŋayi mwanta.

¹⁹Chapompeluwu ajiki kamuchiyedi, Modekayi washakamini kuchisu chachipaŋu chamwanta.

²⁰Henohu Esita wuchidi kanda ashimuni helaawusoku windi, hela kwasemukayi, mwomwamulejeliyi Modekayi; muloŋa Esita welilaŋa izu daModekayi mwomwelilaŋayi hadiŋi nakumulelayi.

²¹Hamafuku owu ashakaminaŋayi Modekayi kuchisu chachipaŋu chamwanta, atulala twamwanta ayedi aBigitani naTereshi, akweti ahembelaŋa kuchisu chetala, azuwili, akeŋeli kumujaha mwanta Ahasuwenausi.

²²Chumichi achilukili kudi Modekayi, hakumulejamu mwadi Esita, Esita hakumushi mwinamu mwanta mwijina daModekayi.

²³Chehujoleluwu nsaŋu oyu amweni komana chalala, ayikudika nikuyikudika mwayedi wawukumutondu; achisoneka nikumukanda wakushindulula iku mwanta wudinakutala.