Read MUKANDA WANZAMBI Exoda 2 Bible Online

Exoda 2 - MUKANDA WANZAMBI bible

Exoda 2

¹Iyala wakumutaŋa waLevi wayili nakusumbula mumbanda wakudi aLevi.

²Mumbanda wabaabili ivumu, wavweli mwana weyala. Chamumweniyi himwana wawutotombu wamuswekeli tukweji tusatu.

³Chakaŋenyiyi kumusweka nawa cheŋi, wamutambwilili kawatu kakutuŋananyilela, wakakwitili ndunda niweŋi wamupachi, washilumu mwana, wawŋiŋili mumateti kuchi kumu chakaloŋa.

⁴Muhelindi wemeni kwakulehi atali chakamwilawu.

⁵Mwana kaFwaro wamumbanda wakunkumukili kukaloŋa nakuwela; atumbanji twindi awambanda akulishili chikumu chakaloŋa; chamweniyi kawatu mukachi kamateti watemesheli kambuŋindi wamumbanda nindi aleti kunu.

⁶Wenzulwilumu, wamweni mwana, komana mukeki hakudila. Wamutiyilili wushona, nindi, Himwana kawaHeberu.

⁷Muhelindi wamwilili mwana kaFwaro wamumbanda, nindi, Niyi ni kutambi kili mumbanda wakumulela kudi ambanda awaHeberu kulonda akuleleliyi mwana, tahindi?

⁸Mwana kaFwaro wamwilili nindi, Yaŋa. Mwana wamumbanda wayiliwatambi kili mama yamwana.

⁹Mwana kaFwaro wamwilili nindi, Mutwaliiwu mwana wumunleleli. Nukukwinkaŋa wufwetu weyi. Mumbanda hakutwala mwana, hakumulelaŋa.

¹⁰Mwana wakulili, wamutweli kudi mwana kaFwaro wamumbanda, hakwikala mwanindi. Wanamutumbili ijina dindi, nindi Mosi, nindi, Muloŋa namuzambwili mumeji.

¹¹Hamafuku ana, chakuliliyi Mosi, wayili kudi ana kwindi, watalili yiteliyawu. Wamweni kaEjipitu hakweta mana kwindi kaHeberu.

¹²Watalilininiku niniku, chamweniyi kwosi muntuku wamujahili kaEjipitu, wamuswekeli muwusekulula.

¹³Wayiluku nawa ifuku di kwawu damu chiyedi, hakumona amayala ayedi aHeberu hiyakulwisha. Wamwilili wakoŋeli mukwawu chatama, nindi, Wukumweteladi mukwenu?

¹⁴Yena nindi, Indi eyi nakwilishi mulopu wetu, ninsompeshi yetu, hinyi? Wuneli neyiwunjahi neyi chiwajaha kaEjipitu, tahindi? Mosi watiyili woma, nindi, Komana chumichi anachiluki.

¹⁵Fwaro chatiyiliyi chumichi wakeŋa eli kumujaha Mosi. Ilaŋa Mosi wamutemukili Fwaro, wayili nakushakama mwituŋa daMidiyani; hakushakama kwishima.

¹⁶Kapristu wakuMidiyani wadiŋi nawanyanindi awambanda atanu nayedi. Ayili nakutaha meji, enzesheli muyizawu, anwishi nyikoku yatata yawu.

¹⁷Atubiŋa ayili nakuyihaŋa, Mosi wanyamukili, wayi kwashiluku, wanwishili nyikoku yawu.

¹⁸Chafuntilu wakudi tata yawu Reyuweli, yena hakuyila nindi, Lelu munanyakelidi kufunta?

¹⁹Wena nawu, iyala kaEjipitu natupulwishi kudi atubiŋa, natutahili meji, nanwishi anyikoku.

²⁰Yena hakuyila anyanindi, nindi, Hayodihi? Aka! Munamushiyi nawa! Mutambi kenu enzi kunu adyi yakudya.

²¹Mosi wetiyili kushakama nayenowu iyala, wamwinkeli mwanindi Zipora.

²²Yena wavweli mwana weyala, Mosi wanamutumbili ijina dindi, nindi Gereshomi, nindi, Muloŋa nashakami muwenyi mwituŋa dambala.

²³Woho, mafuku amavulu ahitamu ni kuhitamu, mwanta wakuEjipitu afwa ni kufwa. Anyana kaIsarela ashishumokeli nawudupu wawu, hiyakudila, kudila kwawu kwadililuwu nawuduŋu wawu kwashi kili kudi Nzambi.

²⁴Nzambi watiyili chakwabawu, Nzambi wa anukili chatiyaŋeniyi dehi naAbarahama, naIsaka, naYakoba.

²⁵Nzambi wamweni anyana kaIsarela, Nzambi washiluhu muchima.