Read MUKANDA WANZAMBI Exoda 22 Bible Online

Exoda 22 - MUKANDA WANZAMBI bible

Exoda 22

¹Neyi muntu wakeya hela ŋombi, hela mukoku nakumujaha, hela nakumulandisha, akafuti ŋombi jitanu naŋombi waneyiyi, akafutinyikoku yiwana namukoku waneyiyi.

²Neyi akamukwata ikombi wudi nakubuza itala, neyi akamweta nafwi, hikwakekala muloŋa wawubanji hansaŋu yinduku.

³Neyi mwaana wakanamutuntukila, kwakekali muloŋa wawubanji hansaŋu yindi, akafuti kwindi; neyi hakweti chumaku, akamulandi tuhu nawukombi windi wanakoŋiyi.

⁴Neyi kanyama aneyiyi akamushintakesha nachu wamumi, hela hiŋombi, hela hichimbulu, hela himukoku, akafuti kwindi yiyedi.

⁵Neyi muntu wakadiisha hela iha, hela itempa danyivinyu, neyi wakalekatuhu chimuna chindi asendeli tuhu, hakudya mwiha dambala damukwawu, akafuti hela yamwiha dindi yasweja kuwaha, hela yamwitempa dindidanyi vinyu yasweja kuwaha.

⁶Neyi kesi kakabutuka kanakwatili kunyiŋa, nakushitula nyikuta yatidiku, hela tidiku yákubula kukesa, hela iha dadeni, wabutwili kesi chalala akafuti hohu.

⁷Neyi muntu wakamwinka mukwawu hela mali hela yuma kulondaku muswekela, neyi akuyiyila mwitala danowu muntu, neyi ikombi anamukwati, akafuti chakweseka kayedi nayuma yaneyiyi.

⁸Neyi ikombi kumukwata nehi, mwini itala wakakundama kwakwihi naNzambi kulonda akatali neyi nakwati chikasa hayuma yambala yamukwawu.

⁹Hanyiloŋa yejima, hela waŋombi, hela wachimbulu, hela wamukoku, indi kwiji wachuma chakuvwala, indi kwiji wachuma hichuma chakujimbala, wakatenayi muntu nindi, Hi chuma chami, muloŋa wanana antu ayedi neyi kudi Nzambi, yowu wakatanyishayi Nzambi akafuti mukwa wumuyedi.

¹⁰Neyi muntu wakasokesha kudi mukwawu hela chimbulu, hela ŋombi, hela mukoku, indi kwiji kanyamanyi, neyi wakafwa, indi kwiji akamukatisha, indi kwiji akamutemuna aya kwacheŋi nimuntu waku chimona nehi,

¹¹akasanyiki Yehova hakachi kawu, mukwawu nindi, Hinakwata chikasa chami hayuma yambala yamukwetuku, nimwenichi aketijumu, mukwawu hakafutaku.

¹²Ilaŋa neyi amwiyilili chu, akafuti kudi mukwachuma chindi.

¹³Neyi anamusansoli kudi kanyama, chiŋa akamutwelelayu kulonda wunsahu, hakafuta chimuna chakusansola kudi kanyamaku.

¹⁴Neyi muntu wakasondama chimuna kudi mukwawu, neyi akachikatisha, indi kwiji neyi chakufwa, neyi mwini chimuna wadiŋi wafumahu, akafuti.

¹⁵Neyi mwini chimuna wadiŋi hohu, hakafutaku; neyi hichuma chakutambu lanakufwetela, chinafwili dehi muwufwetu wachu.

¹⁶Neyi iyala wakamudimbeka mujiki niyena hiyamwotaku, neyi nakaminindi, chalala wakahani nsewu yakusumbula nachu kulonda akeli Iŋodindi.

¹⁷Neyi tata yamumbanda kwonti kwindi kumwinkayi, akafweti mali mwesekela nsewu yasumbula ŋawu nachu ajiki.

¹⁸Mukwakupanda bayi mwakamwitŋa kuhandaku.

¹⁹Owu wakakama nakanyama, chiŋa kumujaha hohu.

²⁰Muntu wakabula kumuketwila Yehova inka windi hohu chimuna, hakamuketwila mukishi, akamukisaŋani chikupu.

²¹Bayi wakamwila mwenyi chatamaku, hela kumukabisha bayi wakamu kabishaku, muloŋa ninenu mwadiŋi enyi mwituŋa daEjipitu.

²²Bayi mwakakabisha hoku hela mumbanda wantuluwa, hela mwana wanshonaku.

²³Neyi wakayikabishahu hela chantesha, neyi akadilakudami, chalala ami nakatiya kudila kwawu;

²⁴nikuzuwa kwami kwakatatabusu neyi kesi, nakayijaha nampoku yakabali; ni aŋodi jenu akekala antuluwa, ni anyanenu akekala anshona.

²⁵Neyi wakasondamisha mali kudi kazweŋi kawantu ami iwudi nawu, bayi wakamwila neyi wumukwakuso ndamishaku; bayi wakamudi ilanŋala nyuku.

²⁶Neyi ifuku dimu wakakwatila chuma chamu kwenu chakuvwala, wakamufuntishili chu neyi itaŋwa dichidi kanda diholoki;

²⁷muloŋa chuma chindi chakudibuta nachu choche nochu hohu, dichichuma chindi chakuvwala chahekowa dindi; ochu wakakama nanka? Chamba kela, chakandililayi, ami nakatiya, muloŋa ami ni kweti luwi.

²⁸Bayi wakahosha nakudiwula Nzambuku, hela kushiŋa bayi wakashika nyuli yawantaŋa jeyuku.

²⁹Bayi wakalaba kulambula hela yakudya yeyi yamumaha, hela vinyuyeyi yinavuli dehuku. Wedi wahadi anyaneyi amayala wakanyinkiyi.

³⁰Dichi chiwakelina ŋombi jeyi, nanyikoku yeyi; wakashakami mafuku atanu nayedi namamayindi, ifuku damu chitanu nachisatu wakanyinkiyi.

³¹Mwakeli antu ajila akunjililami; dichi bayi mwakadya mbiji yamukokaku, mwakayinatili atuwa.