Read MUKANDA WANZAMBI Exoda 34 Bible Online

Exoda 34 - MUKANDA WANZAMBI bible

Exoda 34

¹Yehova wamwilili Mosi, nindi, Balulaku malola awubasa ayedi neyi akusambila, nakasoneka hamalola awa awubasa mazu adiŋi hamalola awubasa akusambila, iwahumwini.

²Wakaloŋeshaŋahu dehi kulondakuya nabudidi, wakakandami hampidi yaSinayi habudidi, wakemani kumesu ami kwenoku kwiwulu dampidi.

³Kwosi muntu wakaya neyuku, kwosi muntu wakamwekana kumpidi yejimaku, hela ayimuna anyanyahela ayimuna amaneni bayi akadiila kwakwihi nampiduku.

⁴Yena wabalwili malola awubasa ayedi neyi akusambila. Mosi wamenekesheli budidi yayeni, wakandamini hampidi yaSinayi mwomwamulejeliyi yehova, wasendeli muchikasa chindi malola awubasa ayedi.

⁵Yehova wasulukilili mwivu, wemeni nindi kwenoku, wabidikili nakutena ijina daYehova.

⁶Yehova wahitili kumesu indi, wabidikili, nindi, Yehova, Yehova, Nzambi wenzala nawushona, watoŋaŋa antu, hazuwaŋa swayuku, Wasweja niluwi, wavulisha ninsaŋu yalala;

⁷wahembaŋa luwi lwindi lwamakombakaji awantu, wayanakenaŋa nikuluwa, ninyiloŋa, ninshidi; hayiŋishaŋa mukwakutanya nihantuku; kuluwa kwawatata jawantu wakushikiŋanihadi anyana, nihadi ezukulu, nihadi anyanawu wena, nihadi ezukulu awu wena.

⁸Mosi wanyakeli, wabandamini chamesu indi heseki, wadifukwili.

⁹Welili nindi, Eyi Yehova mwani, neyi dinu wunantoŋi, Mwantaayi mwani, mukachi ketu; muloŋa awa antu achinchika kwawu; atwanakenini kuluwa kwetu ninshidi yetu, atutambuli twi kali wuswana weyi.

¹⁰Nindi, Tiya, ami hinukukwata chitiyaŋenu; nami, nakela yumayaku hayamisha kumesu awantu eyi ejima, yuma yakadi kukoŋapahu dehi mwahita iseki dejima hela munyuza yejima; ninawa antu ejima wekalanawu akamona mudimu waYehova, muloŋa chuma chinakela naneyi chikwetiwoma nankashi.

¹¹Shaku muchima kuchuma chinukukuleja lelu; tiya, ami nakakutemwina kaAmori, nikaKenani, nikaHiti, nikaPerizi, nikaHivi, nikaYebusi kuwakaya.

¹²Babalaku wakabuli kukwata chitiyaŋenu nawakwetuŋa diwakaya, kuchina kwikala muhetu mukachi kenu;

¹³ilaŋa enu kwenu chiŋa mwakahumuni tumeŋa twawu, mwakachikachiki tuposhi twawu twakupeshela puchi puchi, mwakatemi ninyiyombu yawu;

¹⁴muloŋa enu bayi mwaka fukamina mukishuku; muloŋa Yehova, ijina dindi diyi Mukawu, hiNzambi wukwetimukawu;

¹⁵mwakenza kukwata chitiyaŋenu nawakwetuŋa odu, chakelawu wuvumbi wakulondela akishi awu, chakaketwilawu akishi awu yimuna, hakenza kamwekana wumu wakakutambika ninenu himwakadya chimuna chanaketuliyi;

¹⁶mwakenza katambula anyanawu awambanda nakuyisumbwila anyanenu amayala, ni anyanawu awambanda akenza kela wuvumbi wakulondela akishi awu, akenza kasambwisha anyanenu kwila wuvumbi wakulondela akishi awu.

¹⁷Bayi wakadilila akishi akwepununaku.

¹⁸Wakahembaŋa chawija chamankendi akadi ilupi. Wakadyaŋa mankendiakadi iluŋi mafuku atanu nayedi, mwomuna munakulejeli, hohamafuku inayilejeli mukakweji kaAbibi; muloŋa hohakakweji kaAbibi dihu mwafumini muEjipitu.

¹⁹Ejima akusambila kuvwalika mumavumu awamama jawu, amami; ni ayimuna amayala ejima, awedi ejima hela akudi aŋombi hela akudi anyikoku.

²⁰Wedi wachimbulu wakamukúuli namwana kamukoku; neyi kumukúula nehi, chiŋa wakamukotoli nshiŋu. Anyanenu amayala awedi ejima mwakayikúuli, kwosi wakamwekana kumesu ami makasakasaku.

²¹Mafuku atanu nadimu wakakalakali, kwinza ifuku damuchitanu nachiyedi wakanooki; hela hachila aka chakudima, hela hachila aka chakwaŋula, wakanooki hohu.

²²Wakahembaŋa chawija chayalumingu, nichawija chatidiku yakahila nichawija chakukuŋula hakukumisha mwaka.

²³Ayeyi amayala ejima akamwekani kumesu aMwanta Nzambi, Nzambi yaIsarela, mapampakasatu hamwaka.

²⁴Muloŋa nakayitemuna nyuza kuwakaya, nakatoheshaŋinza jenu; chiwakaya mapampa kasatu hamwaka nakumwekana kumesu aYehova Nzambi yeyi, kwosi muntu wakakeŋa ituŋa deyuku.

²⁵Chiwakechimuna mashi achimuna chami bayi wakechimuna namankendi akweti iluŋuku; hela chimuna chahachawija chapaseka bayi chakakama chishika nikubudiduku.

²⁶Yakudya yakahila yaheseki deyiwakaleti kwitala daYehova Nzambi yeyi. Bayi wakateleka mwanakampembi mumayeli amama yinduku.

²⁷Yehova wamwilili Mosi, nindi, Sonekaku mazu awa, muloŋa mwomwayamazu awa dimu nakwatili chitiyaŋenu chakukwata ninaneyi nina-Isarela.

²⁸Yena wadiŋi kwenoku naYehova mafuku makumi awananamwa ana nawufuku; hadiili yakudyaku, hela kunwa meji hanwini mejuku. Wasonekeli hamalola awubasa mazu achitiyaŋenu, wowu mazu ikumi.

²⁹Cheliliyi Mosi hakukunkumuka hampidi yaSinayi nasendi malola awubasa awunsahu ayedi kuchikasa chindi, chakunkumukiliyi hampidi, Mosi hachilukiluku komana ikowa dakumesu indi datoŋekeli nachinachahanji kilaŋayi nindi.

³⁰NiAroni nianyana kaIsarela chamwenuwu Mosikutala ikowa dakumesu indi hidikutoŋeka, atiyili woma wakuswila kwakwihi nayena.

³¹Mosi wayitambikili, niAroni nianyuli achipompelu ejima afuntili cheŋi kudi yena, Mosi wahosheli nawu.

³²Nkumininaku anyana kaIsarela ejima niwena ayili kwakwihi, niyena wayinkeli mazu ejima ahosheliyi Yehova nayena hampidi yaSinayi, hilushimbi.

³³Chakumishiliyi Mosikuhosha nawu, wabutili ihina kumesu indi.

³⁴Ilaŋa cheŋililiyi Mosi kumesu aYehova nindi ahoshi nindi, wafumishili ihina dabutiliyi kumesu indi, nichichedi kiliyi cheŋi hanzi; wedi kili hanzi, wahosheli nawanyana kaIsarela nakuyileja yuma yamulejeluwu;

³⁵anyana kaIsarela amweni kumesu aMosi, komana ikowa dakumesu indi hidikutoŋeka hohu; Mosiwashili cheŋi kumesu indi ihina dakubuta, nichicheŋililiyi cheŋi nakuhoshanindi.