Read MUKANDA WANZAMBI Jobo 1 Bible Online

Jobo 1 - MUKANDA WANZAMBI bible

Jobo 1

¹Mwatuŋa daUzi mwadiŋi iyala ijina dindi diyi Yoba. Yenowu iyala wadiŋi walala woloka, muntu waakamini Nzambi, waambukili kuyuma yatama.

²Wavweli anyanindi amayala atanu nayedi, ambanda asatu.

³Yimuna yindi, nyikoku makombakaji atanu nayedi, anŋameli makombakaji asatu, aŋombi anyidimu ikombakaji, yimbulu yawakaji makulakaji atanu, niantu indi amavulu nankashi. Yenowu iyala waswejeli kutoha, wabadikili antu akumusela ejima.

⁴Anyanindi amayala ayilaŋa nakudya yawŋa mumatala awana kwawu, iwu nefuku dindi, iwu nefuku dindi. Atambikilaŋa ahelawu asatu kulonda kudya nakunwa nawu.

⁵Chelilaŋa mafuku awu akudya chawija hiyakuya nakushika, Yoba hakuyitambika, hakuyijilika, hakuhindukaŋa budidi yayeni, hakuyilambwila wejima wawu nyilambu yakushita hamuntu hamuntu; muloŋa Yoba welilaŋa nindi, Wamba kela anyanami amayala anavulumuni dehi, anahoshi dehi Nzambi chatama munyichima yawu. Dichi chelilaŋayi Yoba mafuku ejima.

⁶Hadiŋi ifuku denjili anyana kaNzambi nakwimana kumesu aYehova, Satana niyena hakwinza nawu hamu.

⁷Yehova hakumwila Satana nindi, Wudi nakufuma kudihi? Satana hakumwakula Yehova nindi, Nidi nakufuma kukutambatamba hamaseki, nikukwendujola mudahita.

⁸Yehova hakumwila Satana nindi, Kambuŋami Yoba wunamushinshiki tahindi? Hikudi wakweseka nindi hamasekuku, iyala walala woloka, muntu waakama Nzambi, waambuka kuyuma yatama.

⁹Satana hakumwakula Yehova, nindi, Ochu Yoba wamwakama Nzambi chamukunkulu, tahindi?

¹⁰Hiwunamukolekeli niyena, niitala dindi, niyuma yindi yejima ikoli kwi-ndo mbadi jejimaku? Ninyidimu yakumakasindi wunayikiswili nkisu, niyimuna yindi yasemunwina dehi mwituŋa.

¹¹Ololaku ntahi chikasa cheyi katataka wukwati hayuma yindi yejima, wutali neyi wukubula kukuhosha chatama kumesu eyi.

¹²Yehova hakumwila Satana, nindi, Tala, yuma yejima yakwetiyi yidi muchikasa cheyi; ilaŋa hadi yomweni bayi wukwatahu chikasa cheyuku. Satana hakufuma kumesu aYehova.

¹³Ifuku dimu cheliluwu anyanindi amayala nawambanda adi nakudya nakunwa mwitala dawedi wawu weyala,

¹⁴kudi Yoba hikukwinza muntu, hakwila nindi, aŋombi adiŋi nakudima, niayimbulu adiŋi nakudiila kwakwihi,

¹⁵aSheba hiyakuyilotokela, hiyakuyitwala, eŋa, ni aŋamba ajaha dehi nampoku yakabali, yami inapuluki kanka wami hohu, nimoni kukuleja.

¹⁶Iku wuchidi kuhosha hikukwinza nimukwawu, nindi, Kesi kaNzambi kanaholoki kwiwulu, kanochi nyikoku, ni aŋamba, kanayinoŋeshi; yami inapuluki kanka wami hohu, nimoni kukuleja.

¹⁷Iku wuchidi kuhosha hikukwinza nimukwawu, nindi, AKaladeya adambula nyikanka yisatu, hiyakulotokela anŋameli, hiyakuyitwala, eŋa, ni aŋamba ajaha dehi nampoku yakabali; yami inapuluki kanka wami hohu, nimoni kukuleja.

¹⁸Iku wuchidi kuhosha hikukwinza nimukwawu, nindi, Anyaneyi amayala nawambanda adiŋi nakudya nakunwa vinyu mwitala dawedi wawu weyala,

¹⁹kukasumuka kwisaŋa hikukwinza mpepela yeneni hiyikweta hambaŋu jetala jiwana, dinayishiwukili anyikwenzi, anafwi; yami inapuluki kanka wami hohu, nimoni kukuleja.

²⁰Yoba hakunyamuka, hakutabula chi kovwelu chindi, hakutewula namutu windi, hakudinata hamaseki, hakudifukula.

²¹Nindi, Mwivumu damama nafuminumu nzekesi, nakafuntaku cheŋi nzekesi. Yehova diyi waheni, Yehova diyi natambuli. Ijina daYehova adikiswili nkisu.

²²Mwejimimu Yoba havulumwinuku, hamusupishili Nzambuku.