Read MUKANDA WANZAMBI Jobo 10 Bible Online

Jobo 10 - MUKANDA WANZAMBI bible

Jobo 10

¹Natiyi dehi wumi wami kumuchima bwi-i, nukukumina dakuditatokela tuhu kwami, nukuhosha munamoni muchima wami kulula.

²Nukumwila Nzambi nami, Bayi wuntanyishaku; nleji hiwudi nakufwilaŋena nanami.

³Komana chachiwahi eyi kukabisha nakudiwula mudimu wamakaseyi, wutoŋeki mpùŋa yawatama?

⁴Eyi wukweti mesu awuntu, tahindi? Wamonaŋa chamonaŋawu antu, tahindi?

⁵Mafuku eyi adi neyi mafuku awantu? Nyaka yeyi yidi neyi mafuku awantu?

⁶Mwaka wihujolaŋa kuluwakwami, wukeŋakeŋaŋa nshidi yami?

⁷Kutoŋa eyi weluka neyi hinatamaku, neyi hikudi wakumpulwisha muchikasa cheyuku.

⁸Yeyi wukweti makasa ankabakeneni, anwumbili kwi-ndo, yeyi kwaamu wukunminya!

⁹Nalembi, anukaku chiwanwumbili neyi iwumba. Wunakeŋi wunfuntishi cheŋi mumaseki, tahindi?

¹⁰Hiwunanmwaŋi dehi neyi mayeluku? Hiwunankondeshi neyi chizuku?

¹¹Wanvwika ikowa nanyi-sunyi, wannuŋanuŋa namafwaha nanyijila.

¹²Wanyinka wumi naluwi, chiwantalaŋa chahemba spiritu yami.

¹³Hela chochu, yumiyi hiwukuyisweka mumuchima weyi. Neluki nami chumichi chidi naneyi.

¹⁴Neyi navulumuni wukunlamakesha, hiwukunyiŋisha munaluwuku.

¹⁵Neyi nukwi kala watama, yowu ami nshona! Hela neyi nukwi kala waloŋa hinukufumbula namutu wamuku, nukwi kala kwananamutu wansonyi hohu, mudimu wami wakutala yihuŋu yami hohu.

¹⁶Hela neyi namutu wukufumbuka hiwukunlotokela neyi mutupa. Hiwukunhayamisha chakunhayamisha.

¹⁷Hiwukumpompeshela ayinsahu amaha, hiwukusweja nikunzuwila, majita hiyakukumina dakunzemukila.

¹⁸Wanfumishilidi mwivumu damama? Mutenowu nafwili tuhu kwami chakadi nidisu dakunmona.

¹⁹Chadi kwikala neyi hinadiŋi nikwokuku, adi kunfumisha kwamwivumu hiyakuntwala kwakwiji amu.

²⁰Mafuku ami hiyanteshaku? Lekaku, nshiyi kanka wami nidikundejuku chanti,

²¹hohanu hinichidi kanda niyi kunakabula kufunta, kwokwituŋa damwidima dawulelu wakufwa,

²²kwituŋa damwidima wakushishita wabwi chikupu, dawulelu wakufwa, dakadi kuloŋesha, kucha kwekalaku himwidima.