Read MUKANDA WANZAMBI Jobo 11 Bible Online

Jobo 11 - MUKANDA WANZAMBI bible

Jobo 11

¹Zofwari wakuNayamati hakwakula nindi:

²Mazu avula chi kuma hanichi abuli kuyakula, tahindi? Muntu waha mukanwa akumini dakumwitija tuhu tahindi?

³Antu akumini dakumwena tuhu nanoku kudisansula kuwudi nakudisansula, tahindi? Chiwudi nakuseha akwenu komana hosi muntu wakukutiyisha nsonyuku, tahindi?

⁴Muloŋa eyi neyi, Nalejaŋa akwetu mwalala. Neyi, Hinikweti majilu kumesu aNzambuku.

⁵Mutenowu Nzambi wadi kuhosha, akwasamina mukanwa kindi;

⁶akuleja yuma yama ana yakujinda, maana akoŋaŋa mwamuvulu! Ilukaku neyi, Nzambi hadi nakumbabesha mwesekela kuluwa kwamuku.

⁷Eyi wukutwesha kumukeŋakeŋa Nzambi wumuwana, tahindi? Wukutwesha kuwana mwawahilayi Chinaweji, tahindi?

⁸Mwaleha neyi chikwamwiwulu, wukutwesha kwila ŋahi? Mwakunama neyi mukaluŋa, wukutwesha kwiluka ŋahi?

⁹Kwesekamu mwaleha chakubadika iseki, mwatoha chakubadika kaluŋalwiji.

¹⁰Neyi wukuhita, enzelaku, apompesha nichota, wukutwesha kumulekesha hinyi?

¹¹Muloŋa antu amukunkulwayi wayiluka kwindi, nikuluwa wakumonaŋa, hela wabulaŋa kutoŋojokamu.

¹²Muntu wamukunkulwayi haheta maanaku, eŋa, muntu wavwalikaŋa kwindi neyi chavwalikaŋa ŋala.

¹³Neyi wukusha muchima weyi kuyuma yayiwahi, neyi wukumwolwela makaseyi,

¹⁴neyi wukufumisha kuluwa kudi muchikasa cheyi, kuya maaya, neyi wukubula kwitŋia kuheŋa kushakama mumataleyi,

¹⁵chalala dihu hiwakafumbukila mesu eyi chakadi hatama, eŋa, wakashimata ngu, hiwakatiya womaku.

¹⁶Muloŋa wakavulamena yihuŋu yeyi, wakayanukaŋa chakuyanuka neyi meji anahiti dehi.

¹⁷Wumi weyi wakabadika mwaana wahakachi ketaŋwa; hela neyi kudi mwidima wakekala neyi kubudidi.

¹⁸Wakadiwunjika zo-o muloŋa kwakekala chikuhwelela; eŋa, wakakeŋakeŋa, wakakama chakadi kwakama.

¹⁹Wakakambama tuhu kweyi niwakukutiyisha woma nehi; eŋa, amavulu akaletaŋa nyiloŋa yawu kudeyi.

²⁰Kwinza mesu awaluwa akanoŋa, hiyakamona kwakutemukilaku, akakuhwelela yowu kutula wumi wawu hohu.