Read MUKANDA WANZAMBI Jobo 13 Bible Online

Jobo 13 - MUKANDA WANZAMBI bible

Jobo 13

¹Talenu, disu dami damona dehi mwejimimu, itu dami dinatiyi, chinanlumbulukili.

²Yimwelukenu ninami nayiluka nawa, ami hinakuminumu kwamuku.

³Hela chochu, nakeŋi kuhosha naChinaweji, nukutiya kuwaha kutadika naNzambi,

⁴Hakwila enu mudi akwakukasakasa yakutwamba, mudi ayimbuki amukunkulwayi.

⁵Mutenowu mwadi kudi mwenena tuhu kwenu chikupu, chadi kwikala maana enu.

⁶Tiyenu ntahi munukutadika, tiyililenu munukudihakwila nanyivumbu yami.

⁷Keŋa mumuhosheli Nzambi chaheŋa? Mumuhosheli chakudimbana?

⁸Mumwakami kumesu indi, tahindi? Mumuhakwili Nzambi, tahindi?

⁹Chachiwahi chakusandolayi munyichima yenu, tahindi? Mumudimbi neyi chimwadimbaŋa mwinenu muntu, tahindi?

¹⁰Neyi kumbadi mukwakama akwenu kumesu awu, yena chalala wakayihoshola.

¹¹Kulema kwindi kunayitiyishi woma, tahindi? Kunayiwani dehi jakumuzaala woma, tahindi?

¹²Yuma yalema yimwahoshaŋa hiyishimu yamawuti, mpwembu jenu himpwembu jamaseki tuhu kwaju.

¹³Dimwenenenu tuhu kwenu zo-o, nlekenu nihoshi kwami, yonsu yinakeŋi kunwana yinwani tuhu kwayu.

¹⁴Musunyi wami nukuwukwatiladi namaji ami? Hela wumi wami nukuwukwatiladi muchikasa chami?

¹⁵Hela wukunjaha kwindi, nukumuchiŋililaŋa ho-o; hela chochu, njila jami nukujihakula kumesu indi.

¹⁶Mwenimu dimu nakamwena wamwinu wami. Muloŋa muntu wukweti kasekesha kakusekesha Nzambi, hakwinza kumesu induku.

¹⁷Tiyenu chachiwahi munukuhosha, chinukushimuna chishiki mumatu enu.

¹⁸Tiyenu dinu, Muloŋa nawuloŋeshi dehi. Neluki nami naloŋa.

¹⁹Tukudisompesha nanyi? Ichi dinu nukudimwenena kwami, nidifwili tuhu kwami.

²⁰Hela chochu, eyi Nzambi, kudi yuma yiyedi bayi wuŋilayuku; neyi chochu hinakabatama kumesu eyuku;

²¹fumishaŋa chikasa cheyi chiyi kwakulehi nanami, mutentu weyi bayi wunfwisha mutentuku.

²²Tambikaku eyi, ami nukwitiya; hela nukuhosha ami, eyi wuŋakuli.

²³Kuluwaluwa kwami kuŋahi? Nshidi jami jiŋahi? ŋilukishi Muloŋa wami, ninshidi yami.

²⁴Wanswekela ŋadi mesu eyi, wunfwikŋi neyi nichilumbu cheyi?

²⁵Wukabishi ifu didi nakuya nakuleloka? Wuhaŋi ntotu jawuma?

²⁶muloŋa eyi wudi nakunsonekela yuma yalula, wudi nakunswanisha kuluwaluwa kunaluwilaŋa hawukwenzi wami.

²⁷Wudi nakusha nyendu yami mumpompa, wudi nakulamakesha njila jami jejima; wudi nakunfundila mufunda kumadachilu ami kwi-ndo;

²⁸ami muntu nidi neyi chuma chatoka dehi chidi nakuya nakunoŋa, nidi neyi ihina dakuvwala dadyawu dehi kudi atububu.