Read MUKANDA WANZAMBI Jobo 14 Bible Online

Jobo 14 - MUKANDA WANZAMBI bible

Jobo 14

¹Muntu wakuvwala kudi mumbanda wamafuku antesha kwindi, wamona kwayihuŋu.

²Wakenukaŋa neyi nkenu, amutema nikumutema. Watemukaŋa neyi mwevulu, hashakamaŋaku.

³Muntu wudochu wumutoneni mesu? Wunshikiji mukudisompesha naneyi?

⁴Wukutwesha kufumisha chuma chakadi majilu muchuma chamajilu hinyi? Kwosi.

⁵Neyi mafuku indi akufuukula dehi, wachinda dehi nitukweji twindi, wamwesekela dehi ŋinza jindi akaŋanyi kujimotoka;

⁶komana talaku kwacheŋi anookuhu, awanishi ifuku dindi neyi chelaŋayi ŋamba anakwatuwu.

⁷Mutondu wukweti chikuhwelela, neyi akuwutema wakamena cheŋi, hakabula nyitombuku.

⁸Hela neyi muji windi wukukulila mumaseki, hela chishinji chikufwa tuhu mumaseki;

⁹chiwukutiya ivumba dameji hiwukumena, hiwukwila nyitayi neyi chiputa.

¹⁰Ilaŋa muntu kwindi wafwaŋa, haheta Ŋovuku; wumi windi wamufumaŋa, hayodihi?

¹¹Neyi chomaŋa meji mwijiya, chaketokaŋa kaioŋa hakuuma;

¹²dichi chadiyi nimuntu, wakambamaŋa, hahindukaŋa nawa cheŋuku, hiyamba katona nawa cheŋuku nichamba kahita mawulu, hiyamba kapwapuka nawa cheŋi namutulu twawuku.

¹³Mutenowu wadi kunsweka mukaluŋa, wadi kunhemba kumbadi nichikukuhita kuzuwa kweyi, wadi kuntoŋwela mwaka wami kulonda wakaŋanuki.

¹⁴Muntu afwi ahandi cheŋi? Nukuchiŋililaŋa mumafuku anjita yami ejima, nichinakabalumuka hinidi wacheŋi.

¹⁵Wadi kutambika, ami nadi kwitiya; wunafwili mudimu wakumakaseyi.

¹⁶Ichi dinu hiwukuchinda yintampu yami; hiwukutala nshidi yami.

¹⁷Muloŋa wami anawukasili hefunda, analamikuhu nichilamiki, nikuluwa kwami wunakukasi ipunda.

¹⁸Mwalala mpidi yashiwukaŋa kwala-a, hela ilola dafumaŋa mudadiŋi.

¹⁹Malola adiikaŋa nameji; dibaji dakumpulaŋa lunkuŋu lwahamaseki; nineyi wakisaŋanaŋa chikuhwelela chamuntu.

²⁰Saŋa wamwimikila mushindu ho-o haya nyaka, hakuhita; wabalumunaŋa chifu chindi, hiwukumwila neyi, Yaku.

²¹Chalemaŋa anyanindi yena kuchiluka nehi; chasawukaŋawu yena kuchimona nehi.

²²Ilaŋa mujimba windi wadikatilaŋa yomweni hohu, muchima windi wadishonenaŋa yomweni hohu.