Read MUKANDA WANZAMBI Jobo 15 Bible Online

Jobo 15 - MUKANDA WANZAMBI bible

Jobo 15

¹Elifwazi wakuTemani hakwakula nindi:

²Muntu wamaana akuli nama ana amukunkulwayi? Enzeshi ivumu dindi nampepela yakumusela?

³Atadikaŋa tuhu namazu akadi ninimu mwayawu? Ahoshahoshaŋa yakadi nikuwahisha akwawu?

⁴eŋa, woma waNzambi wakufuma dehi kweyi, waleka dehi kutoŋashana chachiwahi kumesu aNzambi.

⁵Kuluwa kweyi diku kudi nakuleja kanwa keyi, wunatondi idimi damukwakudimbana.

⁶Kanwa keyeyi aweni kokadi nakukutanyisha, hiyamuku; eŋa, nyivumbu yeyeyi aweni yoyidi nakukushimuna wunsahu.

⁷Komana yeyi muntu wásambilili kuvwalika? Yeyi aleŋeluwu helili mapidi achidi kanda?

⁸Hakwatiliyi Nzambi mpùŋa, eyi washakaminuhu nakutiya? Wunadimoni neyi, Yami ni kweti maana kanka wami?

⁹Chumanyi chiwelukeyi chitwabula kwiluketu? Chumanyi chinakulumbulukileyi chinabuli kwikala mudetu?

¹⁰Etu yetu tukweti akweti invu, niatushinakaji akula dehi nankashi, abadika nankashi tata yeyi kukula.

¹¹Mwakundejaŋayi Nzambi munakukeheli, tahindi? Hela tuhu izu dakukukokweja?

¹²Indi muchima weyi wudi nakukulumbwiladi? Wudi nakufwetesheladi disu deyi fwe-e?

¹³Mwaka wumubalumwini Nzambi spiritu yeyi yidikaŋi nindi, witŋi mazu adi chochochu kufuma mukanwa keyi?

¹⁴Ochu muntu wudi ŋahi mwaka ekali wakadi majilu? Wavwalika kudi mumbanda wudi ŋahi mwaka ekali waloŋa?

¹⁵Chikaŋa indi ajila Nzambi hayikuhwelelaŋaku; hela tuhu mawulu hiyabulaŋa majilu kumesu induku;

¹⁶winzi wumoni muntu washimanaŋa watoka dehi, wanwaŋa kuheŋa neyi meji!

¹⁷Tiya kudami nikuleji; nikushimwini yinamona;

¹⁸yalejeluwu akwamaana kudi atata jawu, kuyisweka kwawu nehi;

¹⁹enkawu ituŋa dawu kanka wawu, kwosi mwenyi wahitaŋa mukachi kawuku.

²⁰Muntu watama wakabakanaŋa nayikatu mafuku indi ejima, nyaka yindi yamuchindilawu yambala yamukwakukabisha hohu.

²¹Kumatu indi kudi nakutiyakana lushindu lwakumufwisha mutentu; hakamonayi nindi, Hanafuki hakenza mukwakubuwa.

²²Hetiyaŋa nindi, Nakafunta cheŋi mumwidimaku, amushakamina kudi mpoku yakabali.

²³Wakimbukaŋa nakukeŋakeŋa yakudya, nindi, Yidi kudihi? Weluka nindi, ifuku damwidima dinaŋimeni.

²⁴Nikukala ni kukabakana kunamutiyishi woma kunamwimiki mushindu, neyi mwanta wukukeŋa kuya kunjita;

²⁵nanochu chanamwolweliyi Nzambi chikasa chakudikaŋa nindi, chanadinkiyi wanta naChinaweji;

²⁶hakumulotokela chakuchinchika nankebu yindi yikweti mafunvu adita.

²⁷Kumesu indi kwasweŋumuka dehi, hankuma jindi kwanyikanji yamanji hohu.

²⁸Wáshakama muyihembi, mumatala akadi kushakama antu, akukeŋa kubalumuka kwanyilumba hohu.

²⁹Hamba kahetaku, niyuma yindi hiyakashakama shakamee-ku, hiyakavulaŋana hanu hamasekuku.

³⁰Hamba kafuma mumwidimaku; nyitombu yindi yakoma namuzuzu wakesi, nkenu yindi yakafumaku nampepela.

³¹Bayi akuhwelela yuma yamukunkulwayuku, wukudidimba tuhu kwindi, muloŋa yuma yamukunkulwayi diyi yikwikala wufwetu windi.

³²Akamufwetayi yejima niitaŋwa dindi dichidi kanda, mutayi windi hiwukwikala wutuutaku.

³³Nyikabu yindi wakayikukumuna yayisu neyi chelaŋa muvinyu, ninkenu jindi jakalakumuka neyi chelaŋa muolive.

³⁴Chendu chawakweti kasekesha kakusekesha Nzambi akekala anshita, kesi kakanoŋesha matenti awakwakudya maseleka.

³⁵Aba abaŋa kutama, avwalaŋa kuluwa, ivumu dawu daloŋeshaŋa kudimbana.