Read MUKANDA WANZAMBI Jobo 16 Bible Online

Jobo 16 - MUKANDA WANZAMBI bible

Jobo 16

¹Yoba hakwakula cheŋi nindi:

²Natiyi yuma yayivulu yidi chochochu, wejima wenu mudi akwakukundeja akukabisha.

³Mazu amukunkulwayi amba kakuma? Chumanyi chinakusaŋumuni mwaka wuŋakuli?

⁴Ninami tuhu nukutwesha kuhosha neyi chimwahoshaŋenu, neyi muchima wenu watwesha kuhiŋa mumuchima wami, ninami nawa nadi kutwesha kuyiwulumwina mazu, nakuyizwiyila kunamutu wami.

⁵Ilaŋa mi kwami nadi kuyikolesha nakanwa kami, nadi kuwundisha chikela chenu nakuyikokweja nanyivumbu yami.

⁶Naha nihosha, chikela chami hichikuwundaku, naha nimwena, hohichikunfuma?

⁷Ichi dinu nanzeyeshi dehi kwindi; antu ejima nekala nawu wakisaŋana dehi.

⁸Kúuminina kuwunaŋuminini mbe-e kunekali dehi chinsahu; nikukosa kunakosi hikukunnyamukila nakuntanyisha kumesu ami.

⁹Nantaboli nakuzuwa kwanazuwiyi, nankabishi; nansumoneni kumaji indi keletikeleti, mukwankunyi nami nanwambwishili mesu indi.

¹⁰Anaŋasamini mutimwa twawu, anaŋeti hekidi chakunsawula; anampompeli nandombu.

¹¹Nzambi hakunhana kudi akweti kasekesha kakusekesha Nzambi, hakuŋumbila mumakasa awatama.

¹²Nadiŋi nashakama chachiwahi nankotoli dehi hakachi; mwalala nankwati hanshiŋu, nannati dehi heseki, nachikeki dehi; naŋimiki dehi niikali chuma chakupakishaŋa nyivu yindi.

¹³Antu indi akwakwasa namata anyikunji anannyeŋumuki kwi-ndo, yena nabaluli nshiya jami hakachi, kuŋanakena nehi; namwaŋili ndulu yami heseki.

¹⁴Nantaŋatapi hahavulu; nanlotokeli neyi chilobu.

¹⁵Nachimini chikeleyi hekowa dami, luseŋu lwami nalutamishi dehi mulunkuŋu.

¹⁶Mesu ami anachinani dehi nge-e nakudila, hanlabu jami haneyili dehi nawulelu wakufwa;

¹⁷kutoŋa kumakasami hikudi ndombuku, nikulomba kwami kutooka.

¹⁸Eyi iseki bayi wubuta mashi amuku, nikudila kwami bayi kumona hakunookelaku.

¹⁹Hela ichi, talenu tuhu, chinsahu chami wudi mwiwulu, mukwakunhoshela wudi kwiwulu.

²⁰Amabwambu jami adi nakunseha; mesu ami adi nakwichila madilu kudi Nzambi.

²¹Mutenowu wadi kuhakwila muntu kudi Nzambi, neyi chahakwilaŋawu muntu kudi mukwawu!

²²Muloŋa neyi nyaka yantesha yinenzi dehi nakaya njila yinakabula kufunta cheŋi.