Read MUKANDA WANZAMBI Jobo 18 Bible Online

Jobo 18 - MUKANDA WANZAMBI bible

Jobo 18

¹Bilidadi wakuShuhi hakumwakula nindi:

²Mafuku aŋahi imukutila mazu nyihetu? Neyi munatonojoki dehi chachiwahi etu twakahosha.

³Mulonanyi munatufuukuli nenu tuyanyama? Munatumoni ŋahi nenu tudi amajilu?

⁴Mwaka wuditabolaŋa nakuzuwa kweyi; hamujimba weyi komana iseki dakashala kanka wadu? Indi ilola dakatutuluka mudekala?

⁵Mwalala chimunyi chawatama akachima, muzuzu wahejiku dindi hiwakatoŋekaku.

⁶Chimunyi chamwitenti dindi chakeyila bwi-i, inoŋu dahewulu dindi dakeyila.

⁷Yintampu yaŋovu jindi yakashika hashintakana, mpùŋa yindi yomweni yoyakamudimbwisha.

⁸Nadumbili muwanda nanyendu yindi yomweni, wadiŋaŋa mumuhetu.

⁹Chidiya chakamukwatila kukapokosu, wakafwa mumuhetu.

¹⁰Anamutili mwonji hamaseki, anamutili muhetu munjila.

¹¹Wakafwa mutentu wakumutiyisha woma mbadi jejima, mutentu owu wakamukupisha chakumunuŋa kutupokosu twindi kachi.

¹²Ŋovu jindi jinafwomoki nanzala, kukala kwakamonayi kwakamwimena kwakwihi;

¹³kwakadya yidi yamujimba windi, mwalala wedi wakufwa wakadya yidi yindi.

¹⁴Akamukoka mwitenti danakuhweleliyi; akamushikŋa kudi mwanta wafwishaŋa mutentu.

¹⁵Mwitenti dindi mwakashakama acheŋi, hiayinduku; hindi hashakamayi akamwaŋilahu kesi kaNzambi.

¹⁶Nyiji yindi yakoma mwishina chau, mutayi windi hewulu akawuketulaku.

¹⁷Hiyakamwanuka cheŋi hamasekuku, hanzi hihakekala cheŋi ijina dinduku.

¹⁸Akamutemuna muchejeji, akamutwala mumwidima, akamufumisha munu mwishina chakumukupisha.

¹⁹Hakekala namwana hela namwizukulu hakachi kawantaŋa jinduku, kwashakaminiyi hikwakashala hoku muntuku.

²⁰Ashakama kumujika akahayama yihuŋu yamweniyi, ashakama kumusela akakwata chikasa kukanwa nawoma.

²¹Mwalala dimu mwashakamawu áheŋa, dihu hekala wabula kwiluka Nzambi.