Read MUKANDA WANZAMBI Jobo 2 Bible Online

Jobo 2 - MUKANDA WANZAMBI bible

Jobo 2

¹Hadiŋi cheŋi nawa ifuku denjiluwu anyana kaNzambi nakwimanakumesu aYehova, Satana niyena nawa wenjili hamu nawu, emani kumesu aYehova.

²Yehova hakumwila Satana nindi, Wudi nakufuma kudihi? Satana hakumwakula Yehova nindi, Nidi nakufuma kukutambatamba hamaseki, nikukwendujola mudahita.

³Yehova hakumwila Satana nindi, Kambuŋami Yoba wunamushinshiki tahindi? Hikudi wakweseka nindi hamasekuku, iyala walala woloka, muntu waakama Nzambi, waambuka kuyuma yatama. Nihanu saŋa akakelelayi kashinshi kindi, kutoŋa eyi wunanshinjili nimwili chatama, nimukisaŋani tuhu chakadi ninsaŋu.

⁴Satana hakumwakula Yehova nindi, Ikowa nekowa, muntu wukuhana yuma yakwetiyi yejima nawumi windi.

⁵Ololaku ntahi chikasa cheyi katataka wukwati hamujimba windi, wutali neyi wukubula kukuhosha chatama kumesu eyi.

⁶Yehova hakumwila Satana nindi, Tala, wudi muchikasa cheyi, Wumi windi diwu wukuleka hohu.

⁷Satana hakufuma kumesu aYehova, hakuya, hakukatisha Yoba namahuti akata nankashi akufumisha kumadachilu ndo nimwishina danamutu.

⁸Hakunona chizanda chakudikula nachu, hakuya nakushakama mumawuti.

⁹Iŋodindi hakumwila nindi, Eyi nihanu saŋa wakakelela kashinshi keyi, tahindi? Muhoshi Nzambi chatama, wufwi kweyi.

¹⁰Yena hakumwila nindi, Eyi wudi nakuhosha neyi chahoshaŋawu ambanda akadi maana Aka! Kuchikasa chaNzambi tukutambulaŋaku yuma yayiwahi hohu, kutambulaku yatama nehi? Mwejimimu Yoba kuvulumuna nanyivumbu yindi nehi.

¹¹Amabwambu jaYoba asatu chanatiyuwu kutama kwejimiku kunamuwani, hiyakufuma, iwu kwindi, iwu kwindi, iwu kwindi, hiyakwinza; iwu Elifwazi wakuTemani, iwu Bilidadi wakuShuhi, iwu Zofwari wakuNayamati; atiyaŋana dehi kuya nakumukwashaku kulonda kumukundeja.

¹²Cheliluwu achidi tuhu kwakulehi, nawu amutali nikumwiluka nawa nehi, hiyakudila makumbu aweni, hiyakutabola niyikovwelu yawu wejima wawu, hiyakudisukwila maseki kunyitu yawu, hiyakuyinata nikwiwulu.

¹³Ashakama ninindi hamaseki mafuku atanu nayedi, nimwaana niwufuku, hosi muntu niwumu wahosheluhu nindi izuku, muloŋa amweni chikela chindi chinamuswejeli nankashi.