Read MUKANDA WANZAMBI Jobo 20 Bible Online

Jobo 20 - MUKANDA WANZAMBI bible

Jobo 20

¹Zofwari wakuNayamati hakwakula nindi:

²Dichi dinu yitoŋojoka yami yidi nakunleja mwakwakwila, dihu hanafumi ami kunyakala.

³Natiyi kunhosha kwakuntiyisha nsonyi, spiritu yakashinshi kami yidi nakuŋakula.

⁴Kufumisha kushankulu hashiluwu muntu hanu hamaseki eyi kwiluka nehi?

⁵Chayikaŋa muntu watama hihalehaŋaku, chazaŋalalaŋa wasekesha Nzambi champinji yantesha hohu, kuchiluka nehi?

⁶Hela kuwaha kwindi kukukandama nimwiwulu, ninamutu windi wukushika nimumavu,

⁷wakakisika tuhu neyi tuji twindi; amumweni akela nawu, Hayodihi?

⁸Wakatúuka neyi chilota, hiyakamuwanaku; mwalala, akamukupisha neyi chimwenu chahawufuku.

⁹Disu damumweni hidakamumona nawa cheŋuku, hindi hadiŋiyi hihakamumona nawa cheŋuku.

¹⁰Anyanindi akaya nakukeŋakeŋa nawu ayitiyi kuwaha kudi atuzweŋi, makasindi akafuntisha mahetindi kudi akwawu.

¹¹Mafwahindi anenzali nawukwenzi windi, hela chochu, wakakambama hamu nindi mulunkuŋu.

¹²Hela neyi yatama yikutowala mukanwa kindi, hela wukuyisweka kwishina dedimi dindi;

¹³hela wukuyanakena, kuyumbaku nehi, saŋa ayihembelayi mukanwa kindi;

¹⁴yakudya yindi yinabalumuki dehi mwivumu dindi neyi wulembi watubandanjila mukachi kindi.

¹⁵Nadyi maheta, wakayisanza cheŋi; Nzambi wakayifumisha mwivumu dindi, wakayinata.

¹⁶Wakaamwa wulembi watubandanjila, idimi dakabandayula dakamujaha.

¹⁷Hakamona hela tuloŋa hela mpweji jawuchi namantekaku.

¹⁸Chuma chakabakeneniyi wakachifuntisha cheŋi, hakachiminyaku; hakaluŋa namaheta anahetiyuku.

¹⁹Muloŋa yena nakabishi atuzweŋi, nayumbi dehi kwindi; nabuwi dehi itala, kudituŋa nehi.

²⁰Hakaamwina chuma chatiyiliyi nachu kuwahaku, Muloŋa wabulili kwiluka kuwunda mumuchima windi mwivumu.

²¹Hikwasheli chuma chabulili kudyayuku, dichi kufuka kwanamoniyi hikwakalehaku.

²²Chakawaninayi yuma yayivulu wakamona kukala, antu ejima amona ihuŋu akamulundumukila.

²³Chakelayi nindi enzeshi ivumu dindi, Nzambi wakamunatila ndombu yindi yazuwa nankashi, wakamunokeshelayi neyi nvula, iku wuchidi kudya.

²⁴Wakatemuka chitwa chachikuŋu, wuta wamukunji wawuneŋu wakamwasa zwa-a.

²⁵Hakukokamu nsewu, hiyikufuma mumujimba windi, insa yayu yakekema yakedika mundulu yindi; wafwa dehi nimutentu.

²⁶Anamutentekeli mwidima wejima wikali yozelu yindi; kesi kakadi kupeŋa kudi muntu kakamudya; kakanoŋesha yasheli mwitenti dindi.

²⁷Mawulu akamwekesha kuluwa kwindi, niiseki dakamunyamukila.

²⁸Yuma yikusemununa mwitala dindi yakamufuma, yakamwaŋala mwa-mwa mwifuku dakuzuwa kwaNzambi.

²⁹Didu iseka dakatambulayi muntu watama kudi Nzambi, diwu wuswana wanamufuukwiluwu kudi Nzambi.