Read MUKANDA WANZAMBI Jobo 21 Bible Online

Jobo 21 - MUKANDA WANZAMBI bible

Jobo 21

¹Yoba hakwakula nindi:

²Tiyaku chachiwahi munukuhosha, kukundeja kwenu kwikali kwokweniku.

³Ŋitijenu ninami nawa nihoshi, neyi nahoshi dehi mwakasehaŋa kwenu.

⁴Ami chinukutatoka ichi nidi nakutatoka kudi muntu? Ochu nukulekeladi kutaala?

⁵Nshinshikenu, muhayami, mukwati chikasa kukanwa.

⁶Chinukwanuka hinukwakama, mujimba wami hiwukutiya woma wasweja nankashi.

⁷Indi antu atama ahandilaŋadi? Akulilaŋadi kule-e? Aswejelaŋadi Ŋovu jawuhandu?

⁸Anyanawu anashimati hamu nawu, wena achimonaŋa, ni anyanawu kumesu awu.

⁹Kumatalawu kwazo-o, nichuma chakutiya woma nehi, nkunyi yaNzambi hiyashikaŋa hadi wenaku.

¹⁰Ŋombi yawu weyala wemitishaŋa, hakaŋanyaŋaku, wamukaji wasemaŋa, hafwishaŋaku.

¹¹Anyanawu anyanya ayilaŋa nawu, Yenuŋa neyi mukanka wanyikoku, anyanawu hiyakuhaŋana.

¹²Embaŋa tumina twawu nandimba natudada, chakuyimbilawu mapeleli hiyakuzaŋajala.

¹³Ashakamaŋa nakuluŋa mafuku ejima, kukasumuka anakunkumuki dehi mukaluŋa.

¹⁴Wowu amwilili Nzambi nawu, Fumaku kudetu, muloŋa hitunakeŋi kwiluka mwaya njila jeyuku.

¹⁵Nawu, Chinaweji hinyi mwaka tumukalakeli? Nawu, Neyi tukulomba kudi yena chikutukwashila hadihi?

¹⁶Komana kuluŋa kwaluŋaŋawu hikwakumakasawuku; mpùŋa yawatama yidi kwakulehi nanami.

¹⁷Chajimaŋa inoŋu dawatama, hela chiyayiwanaŋa yuma yakala, nichayanjaŋenaŋayi Nzambi yihuŋu hazuwaŋayi,

¹⁸nichelaŋawu neyi ntotu jayaŋa nampepela; nichelaŋawu neyi muzuŋu wasendaŋa mpepela yaŋovu; hitwachimonaŋa kakavuluku?

¹⁹Enu nenu, Kuluwa kwindi Nzambi wakutudikilaŋa anyanindi; amulubwilichi yomweni, kulonda achiluki.

²⁰Yomweni amoni namesu indi chakukisikayi, anwi ndombu yaChinaweji.

²¹Hakaketulawu tukweji twindi twamuchindilawu ngwa hakachi, wakatiya kuwaha ŋahi nawakwetala dindi akashala?

²²Nzambi wasompeshaŋa amaneni, hadi wukumuleja maana?

²³Kudi wuwafwaŋa saŋa akolelayi ngu; washakama chachiwahi zo-o;

²⁴saŋa asansilayi ntulu yamayeli to, mumafwahindi saŋa mwovwahila namanji.

²⁵Wacheŋi wafwaŋa nayalula mumuchima, kanda atompaŋahu dehi yayiwahuku.

²⁶Akambama hamu mumaseki, akayibuta kudi mavunu.

²⁷Tiyenu, ami neluki yimudi nakutoŋojoka, niyuma yatama yimudi nakunkasila.

²⁸Muloŋa enu nenu, Itala dakalamba didihi? Itenti dashakaminiyi watama didihi?

²⁹Himuneliuli akuhita munjilaku? Himuneluki yinjikijilu yawuku?

³⁰Nawu, Muntu watama amutentekela ifuku dakumona ihuŋuku? Hiyakayishikŋa kwifuku dandombuku?

³¹Hinyi wakamushimwina njila yindi kumesu indi? Hinyi wakamulubwila mwaneliyi?

³²Hela chochu, akamutwala kwijamu, akakonkama nakuhemba kwanamujiikuwu.

³³Nyikanji yamaseki yamuchinekineki wakayitiya kuwaha, antu ejima amulondela hanyima, antu amavulu nankashi atwaminina kumbidi yindinawa.

³⁴Ndochu mukunkundejeladi chakuhemesha, enu mwaakulaŋa akwenu chakudimbana?