Read MUKANDA WANZAMBI Jobo 22 Bible Online

Jobo 22 - MUKANDA WANZAMBI bible

Jobo 22

¹Elifwazi wakuTemani hakwakula nindi:

²Muntu atweshi kumukwashaku Nzambi? Mukwamaana wukudikwasha yomweni.

³Chiwudi waloŋa chinamutiyishi Chinaweji kuwaha? Chiwukuwahisha nankashi njila jeyi chikumu kwasha yena?

⁴Indi yena chakukuhoshayi ichi nakutiyi woma? Komana dichi chakukusompeshelayi?

⁵Kutama kweyi hikunaswejuku? Kuluwa kuwaluwaŋeyi kwamba kakuma?

⁶Mana kweyi wunamutambuli kapopu kamukunkulwayi, akwawuvu wunayivúuli yuma yawu yakuvwala.

⁷Hiwunayinki azeya meji akunwaku, afwa nzala wunayikiishi yakudya.

⁸Hakwila mukwaŋovu diyi wadiŋi neseki dindi, amwenumu kulema diyi washakaminumu.

⁹Wunayihaŋi antuluwa makasakasa, makasa anshona anayikotoli.

¹⁰Dichi chiwamonaŋa nyihetu kwi-ndo, dichi chiwamonaŋa woma hiwukukukasumwisha.

¹¹Nimwidima bwi, wukaŋanyi kumona, nimeji amavulu hiyakukuhita hewulu wi-i.

¹²Nzambi hadi hewulu damawuluku? Talaku ntahi o kudi tutumbwa kuleha!

¹³Eyi hiwukwila neyi, Nzambi welukadi? Neyi, Yena wudi mumwidima wakushishita atweshi kusompesha?

¹⁴Neyi, Mavu ashishita anekali chuma chakumubuta, abuli kumona. Neyi, Wudi nakwenda hafumbamina iwulu.

¹⁵Komana wunakeŋi kulamata njila yayikulu yendélaŋawu antu aluwa?

¹⁶Wena ayihukwili kwawu nimwaka wawu kushika nehi, hashimatiluwu habuvukili neyi kaloŋa.

¹⁷Wowu amwilili Nzambi nawu, Tufumi; nawu, Chinaweji wukutwilila mudimwinyi?

¹⁸Kutoŋa diyi wenzesheli matalawu nayuma yayiwahi. Ilaŋa mpùŋa yawatama yidi kwakulehi nanami.

¹⁹Aloŋa anachimoni, anatiyi kuwaha; akadi nyiloŋa hiyakuyiyiŋila wo-o!

²⁰Nawu, Mwalala atunyamukilili anaketukumu dehi ngwa, ashelumu ananoŋi nakesi.

²¹Kadinjilili naNzambi, wumoni kumwena, hohakafuma kumona yayi wahi.

²²Tambulaku mwani nshimbi jamukanwa kindi, wusweki mazu indi mumuchima weyi.

²³Neyi wukufunta kudi Chinaweji akakutuŋisha cheŋi, hiwakafumisha kuheŋa kumatenti eyi kwakayi kwakulehi.

²⁴Nataku tuhu yuma yeyi yalema hamaseki, niwuru weyi wakuOfwiri wunatili mumalola amutwana twatuloŋa.

²⁵Chinaweji diyi wakekala chozelu cheyi, diyi wakekala siliva yeyi yalema.

²⁶Neyi chochu wakatiya kuwaha naChinaweji, wakamufumbwila Nzambi mesu eyi.

²⁷Wakalomba kudi yena wakakutiya, hiwakafuta yiwadishiililumu.

²⁸Wakashamu lushimbi akakukoleshelalu, mwaana wakatookesha munjila jeyi.

²⁹Chakakunatawu heseki wakela neyi, Akannyamuna cheŋi; wakaamwina wadizoza kumesu.

³⁰Wakapulwisha hela wukweti muloŋa; mwalala wakamupulwisha nanochu chiwatooka makaseyi.