Read MUKANDA WANZAMBI Jobo 23 Bible Online

Jobo 23 - MUKANDA WANZAMBI bible

Jobo 23

¹Yoba hakwakula nindi:

²Nikulelu kutatoka kwami kwawinyi hohu; chikasa chindi chinanlemeni chakubadika kwaba kwami.

³Yowe! Neyi neluka kunadi kumuwena! Kulonda nishiki kwitanda dindi!

⁴Nadi kumushimwina nsaŋu yami muchimaŋu muchimaŋu, nadi kwinzesha mukanwa kami mazu akudihakwila.

⁵Nadi kwiluka mazu akukeŋa kuŋakulayi, nishinshiki mwakukeŋa kunlejayi.

⁶Yena wasweja Ŋovu atadiki nanami? Nehi, wukuntiyilila kwindi.

⁷Kwenoku mukwakwoloka wadi kutwesha kudileja nindi; neyi chochu nadi kupuluka kudi nsompeshi yami haya nyaka.

⁸Hekala, niyi kumbidi, kwosi; nifunti munyima, kumumona nehi.

⁹Niyi kuchimunswa kwakalakalaŋayi, ami kutwesha kumumona nehi; wabatamaŋa kuchikasa chachidiilu kulonda nikaŋanyi kumumona.

¹⁰Ilaŋa yena neluki njila, yinidi nakuya; chakaŋesekayi to-o nakedikamu neyi wuru.

¹¹Nyendu yami yinakakeli mumahaji indi; nalamati munjila yindi, kusenu kamu nehi.

¹²Ami kufunta munyima nileki kuleja kwakunyivumbu yindi nehi; natudekaŋa mazu amukanwa kindi chakubadika chinatudekaŋa kudya kwami kunahandilaŋa.

¹³Ilaŋa yena muchima windi waya mumu hohu, wukutwesha kumubalumuna hinyi? Yakeŋa muchima windi yoyelaŋayi.

¹⁴Welaŋa chuma chanfuukwililuwu; yuma yayivulu yidi chochochu yidi nayena.

¹⁵Dichi chinukwakamina kumesu indi; chinukutoŋojoka hinukutiya woma.

¹⁶Muloŋa Nzambi nazeyeshi dehi muchima wami, Chinaweji naŋakamishi;

¹⁷nanochu chinabulili kuketukamu helili mwidima wuchidi kanda, nichabuliliyi kubuta mwidima washishita nibuli kuwumona.