Read MUKANDA WANZAMBI Jobo 24 Bible Online

Jobo 24 - MUKANDA WANZAMBI bible

Jobo 24

¹Nyaka abulila ŋadi kuyitudika kudi Chinaweji? Ninawa amwiluka abulila ŋadi kumona mafuku indi?

²Kudi awa atutululaŋa ŋinza; abuwaŋa nyikanka yanyikoku, hiyakuyidiisha.

³Hiyakutwala chimbulu chanshona, hiyakukwata ŋombi yantuluwa yiikali kapopu.

⁴Hiyakufumisha abula yuma munjila; atuzweŋi ahamaseki hiyakubatama hamu.

⁵Talenu, ayaŋa kunyidimu yawu nakukeŋakeŋa nankashi tunyama twawu twanyikoka, neyi ayimbulu amwisaŋa; hiyakumona yakudya yawanyanawu muchana.

⁶Hiyakwaŋula kudya kwawu kwansaachi mumaha; hiyakunonojola nyikabu yavinyu yawantu atama.

⁷Wufuku wejima akamaŋa nzekesi chakadi chakuvwala, hiyakweti chakudibuta nachishikaku.

⁸Azowaŋa nanvula jakumapidi jawo-wo-wo, akumbataŋa ilola nanochu chabulaŋawu kwakweyama.

⁹Ahukulaŋa nshona kwiyeli, atambulaŋa kapopu kudi kazweŋi;

¹⁰mwaka akimbukaŋa nawuvu chakadi yakuvwala, mwaka asendaŋa yita nanzala yindi.

¹¹Eŋaŋa manji muyipaŋu yawenawa, hela ayidatilaŋa vinyu muwukamwinu wawu wavinyu, saŋa atiyilawu mpwila hohu.

¹²Munyikala mwasweja luntu mwatiyakanaŋa kwaba kwabaŋawu antu, nyichima yawantu anakatishuwu yakalokaŋa nyiteti; hela chochu, Nzambi hayilaŋa nindi mwasupaku.

¹³Wenawa diwu akweti adikaŋaŋa nachejeji; hiyeluka njila jachuku, hiyashakamaŋa munjila jachuku.

¹⁴Mbanji wahindukaŋa chikukwila to-o, hakujaha kazweŋi nawabula yuma; nawufuku wudi neyi ikombi.

¹⁵Mesu achivumbi achiŋililaŋa kabwidibwidi, nindi, Kwosi disu dikunmonaku, hakudibuta ni kumesu.

¹⁶Diwu apundaŋa matala awakwawu namwidima; adipatilaŋamu namwa ana; hiyeluka mwaanaku.

¹⁷Muloŋa wejima wawu amonaŋa budidi neyi himwevulu wakufwa; muloŋa mutentu wamwevulu wakufwa awiluka dehi.

¹⁸Waleluka hewulu dameji; iseka dawu dashiŋewa hanu hamaseki; hahitilaŋa njila yamatempa anyivinyuku.

¹⁹Chaaŋa nankanza anoŋeshaŋa meji anvula yachishika yitooka; dichi chelaŋa kaluŋa nawantu anavulumuni.

²⁰Ivumu damuvwala dakamuvulamena, mavunu akamudya akamutiya kutowala; hiyamba kamwanuka nawa cheŋuku; kuheŋa kwakakotoka neyi chikwamutondu.

²¹Wadyaŋa nshinta wakasemaŋa; hela ntuluwa hamwilaŋa yayiwahuku.

²²Akwaŋovu wayikokelaŋa kwacheŋi naŋovu jindi; chakunyamukayi niniwu wukwila nindi nukuhanda, kwosi.

²³Nzambi nayishakamishi mwa zo-o, hiyakunookelamu, ilaŋa mesu indi adi kunjila jawu.

²⁴Anayinyamuni hewulu; hela chochu, chakadi nikuleha hikwosi; mwalala ayikunkumwisha dehi mwishina, ayifumisha dehi munjila neyi akwawu ejima, ayiketulamu dehi ngwa neyi nyitu yansaachi.

²⁵Neyi hidimu chayaku wukuntwambisha hinyi? Wukusekesha munahoshi hinyi?