Read MUKANDA WANZAMBI Jobo 27 Bible Online

Jobo 27 - MUKANDA WANZAMBI bible

Jobo 27

¹Yoba hakukwata cheŋi kuchishimu chindi, nindi:

²Chahandayi Nzambi kwaamu, yowu Nzambi nanfumishiwuŋaji wami wakunsompela; yowu Chinaweji namweshi muchima wami yalula;

³wumi wami wuchidi wawuwenyi mudami, spiritu yaNzambi yidi mumazulu ami;

⁴mwalala nyivumbu yami hiyakahosha yakuheŋaku, hela idimi dami hidakatena yakudimbanaku.

⁵Ami kuyiyiŋishenu chinjila, hinamba kafumisha kashinshi kamuku, nichinamba kafwa.

⁶Kuloŋa kwami nukukukakela mbe-e, hinukukúumbaku; muchima wami hiwakanyinka Muloŋaku mafuku ami ejima.

⁷Chilumbu chami ekali neyi atama, wukunnyamukila ekali neyi áheŋa.

⁸Wasekesha Nzambi, hela wakamona nŋalanyi yindi, chakamufumishayi Nzambi wumi windi wakakuhweleladi?

⁹Yihuŋu chiyikumuwana, Nzambi wakatiya chakudilayi?

¹⁰Ochu yena atiyi kuwaha naChinaweji? Atambiki Nzambi hansaŋu jejima?

¹¹Nukuyileja jachikasa chaNzambi; yuma yidi kudi Chinaweji hinukuyijindaku.

¹²Tiyenu, wejima wenu mwayimona dehi; indi enu munabalumukilidi kwikala akuhemesha chikupu?

¹³Tiyenu iseka damuntu watama dakamonayi kudi Nzambi, niwuswana wawakwakukabisha akwawu wakatambulawu kudi Chinaweji.

¹⁴Neyi anyanindi akavula, akavula chakumona mpoku yakabali hohu; akavwalayi hiyakekuta yakudyaku.

¹⁵Antu indi akashalahu akayijiika mukufwa, niantuluwa jindi hiyakadila makumbuku.

¹⁶Hela wakalumbika siliva neyi lunkuŋu, hela wakaloŋesha yuma yakuvwala neyi maseki,

¹⁷wakayiloŋesha tuhu, akayivwala kudi aloŋa, akadi nyiloŋa diwu akaanjaŋana siliva yindi.

¹⁸Watuŋaŋa itala dindi neyi kabubu, neyi chisolu chatuŋaŋa mukwakuhemba.

¹⁹Wakaya nakukama waheta, ilaŋa kumukoŋojola nehi, nindi atoni kumesu, hadi nikwokuku.

²⁰Mutentu wakamuwana neyi meji; mpepela yasweja Ŋovu yakenza nakumwiya nawufuku.

²¹Mpepela yakumusela yakamutwala kwacheŋi, hakaya; yakamukomba hadiŋiyi.

²²Nzambi wakamwasa mpefu, hakamwanakenaku; wakakabila nindi amutemuki, kutwesha nehi.

²³Antu akamwetela makasa hankuma, akamusoza nakumuhaŋa mwadiŋiyi.