Read MUKANDA WANZAMBI Jobo 29 Bible Online

Jobo 29 - MUKANDA WANZAMBI bible

Jobo 29

¹Yoba hakukwata cheŋi kuchishimu chindi, nindi:

²Yowe! Neyi nadiŋi neyi chinadiŋi hatukweji twamunyima, neyi chinadiŋi hamafuku anhembelaŋayi Nzambi;

³hantoŋekelelaŋayi inoŋu dindi hanamutu wami, hinendelaŋa mumwidima nachimunyi chindi;

⁴hadiŋi mafuku ami adi neyi ahamusanvu, hadiŋi wubwambu waNzambi kwitenti dami;

⁵hinachidiŋi naChinaweji, hinadiŋi nawanyanami kwi-ndo;

⁶hinadiŋi nakukosa munendelaŋa namanteka, mwilola himukuntukumukila tuloŋa twamanji;

⁷hinedikilaŋa nakuya kuchisu champwembu yakumukala, hinaloŋeshelaŋa itanda dami hanzi,

⁸anyikwenzi anmweni hiyakubatama, atushinakaji hiyakwimana kakata;

⁹atulamba hiyakuleka kuhosha, hiyakukwata chikasa kukanwa;

¹⁰ayilolu hiyakuhoshela mwishina, madimi awu oma nimukanwa chau.

¹¹Itu chidikuntiya hidikunkiswila nkisu; disu chidikunmona hidikunshimwina wunsahu;

¹²nanochu chinapulwishilaŋa atuzweŋi adililaŋa, nianshona abulilaŋa wakuyikwasha.

¹³Nkisu yamuntu wakeŋa eli kunoŋa hiyikwinza hadami; naluŋishilaŋa muchima wantuluwa, hakwimba nitumina.

¹⁴Nadivwikilaŋa kuloŋa, kuloŋa nikwena hikukudivwika ami; wuŋaji wami wadiŋi neyi chi kovwelu chakuluka, niihina dakukasa kunamutu.

¹⁵Yami nadiŋi mesu amputamesu, yami nadiŋi nyendu yachifwayi.

¹⁶Yami nadiŋi tata yawabula yuma; nimuloŋa wamuntu nabula kwilukami nawihujolelaŋa.

¹⁷Nakotwelaŋa yibaŋa yamuntu waheŋa, hinukuhukula kumaji indi yuma yambala yawakwawu yadiiliyi.

¹⁸Nelilaŋa nami, Nakafwila muchisakala chami, nami, mafuku ami akavula neyi wusekulula;

¹⁹muji wami wunatandami wunashiki nikumeji, wuumi wunalembami hamutayi wami wufuku wejima.

²⁰Nami, Kulema kwami kuchidi kwakwiha mudami, niwuta wami wamu kunji saŋa wudi naŋovu muchikasa chami.

²¹Antu antiyililaŋa, anchiŋililaŋa, anmwenenenaŋa zo-o kulonda niyileji maana.

²²Chinukukumisha kuhosha wena kuhosha cheŋi nehi; mazu ami ayiwulumukililaŋa hohu.

²³Hiyakunchiŋilila neyi chachiŋililaŋawu nvula; hiyakwasama mukanwa hululu, neyi chakwasamina nvula yankumininaku,

²⁴chinukuyiseha wena hiyakululuta hohu, chinadiŋi nacha kumesu ami wena kumbalumuna nehi.

²⁵Yami natondelaŋa njila yawu, hinukushakama halema, munjita hinukushakama neyi nimwanta walukanu, neyi nimukwakukundeja akwakudila.