Read MUKANDA WANZAMBI Jobo 3 Bible Online

Jobo 3 - MUKANDA WANZAMBI bible

Jobo 3

¹Nkumininaku Yoba hakwasama kukanwa kindi, hakushiŋa ifuku dindi.

²Yoba hakuhosha nindi:

³Ifuku dinavwalikili mutenowu danoŋela, niwufuku weliluwu nawu lelu tunabaabi mwana weyala.

⁴Ifuku odu mutenowu delili tuhu kwamwidima hohu; mutenowu Nzambi hadihwili kwindi mwiwuluku, mutenowu mwaana hiwaditoŋekeleluku.

⁵Mutenowu nimwidima niwulelu wakufwa elili nawu, hiifuku detu; mutenowu delili tuhu kwachiwulu hohu, mutenowu ifuku odu kwiyila kwadu kudifwishi mutentu.

⁶Wenowu wufuku mutenowu awukwatili tuhu kudi mwidima waweni wakushishita, bayi wudibomba namafuku ahamwakaku, bayi awuchindila namutukwejuku.

⁷Wufuku owu wikali hakanka wawu, bayi mutiyakana izu dakuzaŋalalaku.

⁸Awushiŋi kudi ashiŋaŋa ifuku anyakalai; akumusaŋumuna chanzaŋombi.

⁹Tutumbwa twahakabwidibwidi kawu mutenowu tweyilili tuhu kwabwi-i, mutenowu wufuku owu watalilili mwaana talile-e ngo, mutenowu hiwamweni kuchaku.

¹⁰Nanochu chiwabulili kwenzela yenzelu yevumu damama, nichiwabulili kusweka yihuŋu kumesu ami.

¹¹Nabulililidi kufwila kunfuŋa? Nabulililidi kufwa hinafumini mwivumu?

¹²Manuŋu antambwililidi? Mayeli aŋitijililidi kuyamwa?

¹³Neyi chelili chochochu mutenowu hanu nadikamina kwami zo-o, mutenowu nakamini dehi kwami tulu,

¹⁴nadinookela dehi kwami hamu nawanyanta ninawaŋaji ahamaseki atuŋilaŋa nyikala yawu mumasaŋa akadi antu,

¹⁵hela nawatulamba ahetelaŋa wuru, enzeshelaŋa matalawu nasiliva.

¹⁶Mutenowu ansulumwini tuhu kwami, answeka neyi anyikeki abula kumona kunu kumwaana.

¹⁷Oku kwalekaŋawu atama kukabisha akwawu, kwanookelaŋa azeya.

¹⁸Oku kwanookelaŋawu antu amunyonji hamu, kwabulaŋawu kutiya izu damukwakukalakesha.

¹⁹Oku kwekala niakadi kulema nialema; kwasubukilaŋa nduŋu kudi nkaka yindi.

²⁰Indi wakabakanaŋa amwitŋilaŋadi kumona kunu kumwaana? Niwatiyaŋa kulula kumuchima amwinkelaŋadi wumi?

²¹Wenowu atalilaŋa kufwa talile-e, kukumona nehi, hiyakukupunda chakubadika chapundaŋawu antu yuma yalema yaswekawu heseki,

²²chakumonawu ŋamu, hiyakuzaŋalala nankashi, hiyakutiya kuwaha.

²³Muntu wukweti njila yindi yakujinda, anakolekuwu ikoli kudi Nzambi, amwitŋilaŋadi kumona kunu kumwaana?

²⁴Kudishishimona kwami kwabalumuka dehi neyi hikudya kwami, nikwaba kwami kunamwaŋali neyi meji.

²⁵Muloŋa chuma chinatiyi woma chinanshintakeshi dehi, chuma chinaakama chinanwani dehi.

²⁶Hinamoni kudi wunjikaku, hinamoni kumwenaku, hela kunooka hinachimonuku, yihuŋu chiyinza hohu.