Read MUKANDA WANZAMBI Jobo 30 Bible Online

Jobo 30 - MUKANDA WANZAMBI bible

Jobo 30

¹Ichi dinu hiyakunseha kudi atwansi abula kushika nimudami, akweti atata jawu inadiwili, hela tuhu kuyibomba natuwa twakuhemba nyikoku yami nehi!

²Mwalala, Ŋovu jakumakasawu, nidiiluku chumanyi? Antu akwila niwushinakaji wawu hiyawumonaku.

³Akosa dehi nawuzweŋi nanzala; akenyaŋa iseki dadumu nawufuku kwamukunkulwayi kwakadi antu.

⁴Aandaŋa mafu akudya kuyiputa; kudya kwawu yonyiji yanyitondu yamwisaŋa.

⁵Ayikinjika dehi, afuma dehi mukachi kawantu; ayikuwaŋa neyi chakuwaŋawu ikombi.

⁶Mwashakamawu chiŋa muyinekineki mwapundika, nimumena amumaseki, nimumpaku jamumalola.

⁷Aaŋulaŋa neyi chimbulu mukachi kayiputa; akambamaŋa mwishina datunyuŋi.

⁸Wena hiyanyana kawayisupi, mwalala hiyanyana kawantu asawuka dehi; ayikinjika dehi mwituŋa.

⁹Ichi dinu nela dehi hinikamina kawu, mwalala nekala dehi chishimu chawu.

¹⁰Antiya dehi kumuchima bwi-i, hiyakuŋimena hahalehi, mudimu wawu kunfwŋila mumesu hohu.

¹¹Muloŋa yena nalemuni dehi mukunji wawuta wami, nankabishi, yikaba yakukasa nachu kukanwa anayinatili dehi kunukuya.

¹²Kuchikasa chami chachidiilu hikukunyamoka antu amukunkulwayi, hiyakushinjeka nyendu yami kumbadi, hiyakundimina njila jawu jakunnoŋesha.

¹³Hiyakutamisha njila yami, hiyakunhalwisha, hiyantu abula nkwashi yawu.

¹⁴Enzaŋa neyi chakuhanuka mwipwata deneni; hiyakushindumukila hadami mwahumoka dehi.

¹⁵Mutentu wunambalumukili dehi ami, hiyakuhaŋa kulema kwami neyi mpepela; chinashakaminaŋa chachiwahi chinanfumi dehi neyi ivu.

¹⁶Ichi dinu muchima wami wunamwaŋiki dehi mukachi kami, mafuku akumona ihuŋu ananshikeni dehi.

¹⁷Nawufuku mumafwahami mudi nakulenda mukachi kami, nyisoŋu yidi nakunsuma kunooka nehi.

¹⁸Musoŋu wami chiwunasweji Ŋovu, niihina dami dakuvwala datama dehi; dinanlamati niniku niniku neyi kunshiŋu yachikutu chami.

¹⁹Yena naŋumbili mumalowa, nabalumuki dehi neyi nilunkuŋu namawuti.

²⁰Nakubilelaŋa, eyi kuŋakula nehi; nemanaŋa, eyi kuntala nehi.

²¹Nakumoni dehi komana wunkatu hohu kweyi; hiwukunkabisha naŋovu yakuchikasa cheyi.

²²Wunannyamuni nakuŋusha hampepela, hiwukuŋendeshahu; hiwukunnowesha nanvula yazuwa.

²³Muloŋa ami neluki dehi nami wukunshikŋa mukufwa, nimwitala dafuukwilawu amomi ejima.

²⁴Muntu abuli kwolola chikasa chindi hakudimbukayi? Chakumonayi kukala abuli kukaloka nansaŋu iyi?

²⁵Antu amweni ihuŋu hinayidililili madiluku? Abulili yuma muchima wami hiwayitiyilili chikelaku?

²⁶Chinadiŋi nakutalila yayiwahi hikukwinza yatama; chinadiŋi nakuchiŋilila kucha, hikukwinza mwidima.

²⁷Nyijiŋwa yami hiyikubwakata, kumwenanehi; mafuku akumona ihuŋu ananwani dehi.

²⁸Nidi nakwenda nakudila hohu chakadi nimwaana; hinukwimana nakubilela muchipompelu nami ankwashuku.

²⁹Nimana kwawanyumbu, nikawusoku wanyamalanda.

³⁰Ikowa dami deyila dehi bwi-i, hidikuwuka, mafwahami anasukumi dehi nakesi.

³¹Dichi kadada kami kela dehi kakudila nachu hohu, ipeleli dami dabalumuka dehi hiizu dawakwakudila.