Read MUKANDA WANZAMBI Jobo 31 Bible Online

Jobo 31 - MUKANDA WANZAMBI bible

Jobo 31

¹Natiyaŋana dehi namesu ami; indi chaŋadima nukumutala ŋahi?

²Indi iseka dakudi Nzambi dinafumi mwiwulu isekanyi? Hela wuswana wakudi Chinaweji wakufuma kwiwulu kwakweni wuswananyi?

³Hikwokukala kwamonaŋawu aheŋaku? Hikwokuhalwa kwahalwaŋawu akwakukoŋa kuluwaku?

⁴Ochu yena hamonaŋa munendaŋaku? Hachindaŋa yintampu yami yejimaku?

⁵Neyi nendi mwamukunkulwayi, ninyendu yami yinanyakeli kuya kuyuma yamakasu;

⁶akampezeleshi tuhu napezu yesekana kulonda Nzambi eluki kashinshi kami.

⁷Neyi nafumi munjila, nadati hambadi, neyi muchima wami wunalondi mwaya mesu ami, neyi kumakasami kunalamati kadibeŋa;

⁸komana yinukudima akayidyi kudi mukwetu wacheŋi; yikusoŋa mwiha dami akayibwiti tuhu kwayu.

⁹Neyi muchima wami anawudimbi kudi mumbanda, hela neyi nabatamini kuchisu chamukwetu natuŋa nindi;

¹⁰komana iŋodami akatwili muntu wacheŋi, akekali wawacheŋi.

¹¹Neyi chadiŋi chochochu chadi kwikala muloŋa weneni nankashi, chadi kwikala kuluwa kwatela kubabeshewa kudi ansompeshi.

¹²Muloŋa hikesi kanoŋeshaŋa, katwalaŋa kukujilumuka, chadi kubwita yuma yami yejima nadima.

¹³Neyi ŋamba yami weyala, hela ŋamba yami wamumbanda, wenjili nakukonkojola nanami, ami hinukudiwula nsaŋu yindi;

¹⁴indi chakanyamukayi Nzambi nakela ŋahi? Chakanhempulayi nakamwakula namidi?

¹⁵Wantuŋili mwivumu damama hidiyi wanamutuŋili yenaku? Watuloŋesheli mumavumu awamama jetu hiyowumuku, tahindi?

¹⁶Neyi nabondi atuzweŋi yakeŋawu, hela neyi namwiyilishi ntuluwa mesu,

¹⁷indi kwiji nadyi kakudya kami kanka wami, anshona kudyaku nehi;

¹⁸hidichuku, kufumisha kuwukwenzi wami, yena nakulili kudami neyi chakudi tata yindi, ninlomboli yantuluwa kufumisha kwivumu damama yami.

¹⁹Neyi antu anafwi kufwa kwákubula yuma yakuvwala, ami chiniyitala, hela abula yuma anabuli yakudibuta,

²⁰ninkuma jawu kunkiswila nkisu nehi, niyena kutiya iyena damavuji anyikoku yami nehi;

²¹neyi namunyamwinini nshona chikasa chami, nanichi chinamoni nkwashi yami muchisu champwembu;

²²komana chikasa chami chizemuki kuchipeha chami, chikasa chami chikotoki chizokokuku.

²³Muloŋa kukala kwakunmwesha kudi Nzambi kwanfwishili mutentu, cheliliyi yena walema nakaŋenyi nimwakwila.

²⁴Neyi nashi muchima wami hawuru; neyi namwili wuru wakoseka, nami chikuhwelela chami yeyi;

²⁵neyi naluŋili nanochu chavulili mahetami, nichamweni chikasa chami yuma yayivulu;

²⁶neyi namweni mwaana wunachi, nikakweji hakwenda nakutoŋeka to-o,

²⁷muchima wami hiwukundimbila kumbadi, nikanwa kami hikakupwepula chikasa chami;

²⁸hela chumichi nawa chadi kwikala kuluwa kwatela kubabeshewa kudi ansompeshi; Muloŋa natwambi dehi kumesu aNzambi wekala mwiwulu.

²⁹Neyi nazaŋaleli hajilumukili wanheleli; neyi nadinyamwini kwiwulu hamweniyi yatama;

³⁰mwalala, hinetŋili kanwa kami kuvulumuna chakulomba wumi windi nakumushiŋaku.

³¹Neyi antu ahamukala wami abulili kwila nawu, Muntu wabulili kwikuta mbiji yindi wukumuwana kudihi?

³²Kwosi mwenyi niwumu wakamini hanzuku; akwakwenda majila nayenzulwilaŋa yenzelu yami.

³³Neyi nabutilaŋa nyiloŋa yami neyi chikwaAdama, nakusweka kuluwa kwami muntulu yami,

³⁴nanochu chinatiyili izaza deneni woma, nachanfwishiluwu mutentu kudi yisaka yawantu nakundiwula, mwaka nimwenaŋa zo-o, mwaka nibulaŋa kwidika muchisu.

³⁵Yowe! Neyi kwadiŋi wakuntiya! Talenu, nasoneki ijina dami, nami Chinaweji aŋakuli! Yowe! Neyi nadiŋi namukanda wamuloŋa wansonekelayi chilumbu chami;

³⁶nadi kuwusenda hachifwiji chami; nadi kuwukasila kunamutu neyi chibaŋula;

³⁷nadi kumuchindila yintampu yami yinendaŋa; nadi kumukundama kwakwihi neyi kalamba.

³⁸Neyi ituŋa dami dikuntwila mukunyi, hela neyi nyihaŋa yikudilila madilu kumu;

³⁹neyi nadyimu yakudya yakadi kufweta, hela neyi nakojeji akwanyihaŋa yawu kufwa;

⁴⁰komana mumeni nyiŋa, bayi tidikuku, mumeni nzonzonzu, bayi baluku. Mazu aYoba anakumi.