Read MUKANDA WANZAMBI Jobo 32 Bible Online

Jobo 32 - MUKANDA WANZAMBI bible

Jobo 32

¹Dichi awa amayala asatu alekeli kumwakula Yoba nanochu chadimweniyi kuloŋa.

²Mwana kaBarakeli Elihu wakuBuzi, wakuchisaka chaRami, ozuwa nikuzuwa; wazuwili naYoba nanochu chadiyiŋishiliyi yomweni abuli kuyiŋisha Nzambi.

³Wazuwili nawa nawamabwambu jindi asatu, nanochu chabuliluwu kumona mazu akumwakula Yoba; hela chochu, chamutanyishawu hohu.

⁴Henohu Elihu wuchidi kuchiŋilila kuhosha naYoba muloŋa akwawu diwu adiŋi awakulumpi.

⁵Elihu chamweniyi awa amayala asatu anakaŋanyi dehi mazu akwakula ozuwa nikuzuwa.

⁶Mwana kaBarakeli Elihu wakuBuzi hakwakula nindi, Ami nikansi, enu mwakula dehi nankashi, dichi chinadilekeshela, hinukutiya woma wakuyileja munatoŋojoki.

⁷Nela nami, Mafuku ahoshi, nyaka yayivulu yileji maana.

⁸Hela chochu, mudi muntu mwekala spiritu; kwona kwonaŋayi Chinaweji kwayilukishaŋa mwalumbuluka.

⁹Amaneni hidiwu akweti maanaku, hela atushinakaji hidiwu ashinshika mwaya wuŋajuku.

¹⁰Dichi chinukwila nami, Ntiyililenu, ninami nawa niyileji munatoŋojoki.

¹¹Ami kwami nadiŋi nakuchiŋilila mazu enu, nadiŋi nakutiyilila mumunalumbululaŋa, chimwadiŋi nakukeŋakeŋa mwakuhosha.

¹²Mwalala, nadiŋi nakutiya mwenwenu, aka, kumona wakuhosha mazu akumushika Yoba kumuchima nehi, hela mwinenu wumu wakumwakula mazu indi kwosi.

¹³Babalenu mubuli kuhosha nenu, Tunawani dehi maana. Nzambi diyi wukumwimika mushindu, bayi muntuku.

¹⁴Muloŋa yena hanatalishi mazu indi kudamuku, hela ami hinukumwakula namazu imunahoshenuku.

¹⁵Afwa nipuchi, kwakula nawa cheŋi nehi, nimwakuhosha nawa nehi.

¹⁶Nichiŋililaŋa tuhu, nanichi chakubula kuhoshawu, kwakwimana zo-o hohu, nikwakula cheŋi nehi?

¹⁷Ninami nawa nukwakula mwami, ninami nawa nukushimuna munatoŋojoki.

¹⁸Muloŋa nenzali mazu, spiritu yidi mudami yidi nakunshinjila.

¹⁹Ivumu dami didi neyi vinyu yinakaŋanyi mwakwidikila; didi neyi njeki jayitembi jinakeŋi kubuzika.

²⁰Nukuhosha kulonda nitiyi pe-e; nukujikula nyivumbu yami nakuli.

²¹Bayi mwani nakama muntu kumesu; hela kusama muntu majina akumulambishaku.

²²Muloŋa hineluka kusama muntu namajina akumulambishaku; nili ochu, Nleŋi yami wukunfumishahu chakadi nikuleha.