Read MUKANDA WANZAMBI Jobo 33 Bible Online

Jobo 33 - MUKANDA WANZAMBI bible

Jobo 33

¹Dichi dinu eyi Yoba tiyaku mwani, munukuhosha, nteŋelekeli itu deyi wutiyi mazu ami ejima.

²Tiyaku mwani, naasami dehi mukanwa kami, idimi dami dinahoshi dehi mundakwila yami.

³Mazu ami akushimuna mwolokela muchima wami; nyivumbu yami yikushimuna muyeluka chakadi makasu.

⁴Spiritu yaNzambi diyi wantuŋili, kwona kwaChinaweji diku kwanyinkeli wumi.

⁵Neyi wunatweshi, ŋakuli. Loŋeshaku chachiwahi mazu eyi kumesu ami, wimani.

⁶Ami kumesu aNzambi nidi neyi eyi; ninami niwakuwumba namaseki.

⁷Hinukukufwisha mutentuku, hinukukutwika chiteli chalemaku.

⁸Mwalala wunahosheli dehi kumatu ami, ninami natiyi mazu iwunahoshi,

⁹neyi, Ami hinikweti majiluku, hinamotoki lushimbuku, hinikweti muloŋaku, mudami himudi kuluwaku.

¹⁰Neyi, Yena wudi nakukeŋakeŋa hakunyinkela muloŋa, nanfuukuli dehi neyi chilumbu chindi.

¹¹Neyi, Yena nashi dehi nyendu yami mumpompa, wanlama disu munendaŋa mwejima.

¹²Leka nikwakuli, hiwunaloŋa nansaŋu iyuku, muloŋa Nzambi wabadika muntu kutoha.

¹³Wudi nakuzuŋiladi nayena? muloŋa yena hashimunaŋa mwaya nsaŋu jinduku.

¹⁴Muloŋa Nzambi wahoshaŋa kamu hela kayedi, hela chochu, antu hiyashaŋa kwoku muchimaku.

¹⁵Mukulota, muchimwenu chawufuku, hayaŋawu antu namutulu twatweni, hakamaŋawu antu tulu hatudidi twawu;

¹⁶dihu hajikulaŋayi matu awantu, mwakuyifumbayi hakulamikamu chilamiki,

¹⁷kulonda amufuntishi muntu mwakeŋa a kwilayi, amusweki muntu kudinka wanta.

¹⁸Wamuhembaŋa abuli kuholokela mwikela, niwumi windi wubuli kukisika kuyitwa.

¹⁹Amubabeshaŋa hakadidi kindi nanyisoŋu yasumana, ninakulwisha kwamumafwahindi hefuku hefuku.

²⁰Wumi windi hiwukutiyaŋa yakudya kumuchima bwi-i, nimuchima windi hiwukutiya twakudya twatowala kutama.

²¹Mujimba windi hiwukunyapa, kutwesha kuwumona nehi, mafwahindi abulilaŋa kumonawu hiyakwidika hatooka kwaya-a.

²²Mwalala, hakukundama kwakwihi nekela, niwumi windi hiwukukundama kwakwihi nawakwakujahana.

²³Neyi kudi yena kudi kaŋelu, mukwakulumbulula, wabadika ikombakaji, kulonda aleji muntu mukumwolokela;

²⁴wukumutoŋa, wukwila nindi, Mupulwishenu abuli kuya mwikela, namona dehi yakumukúula nachu.

²⁵Mujimba windi wukwila se-ne-ne, chakubadika wamwana wanyanya; wukufunta cheŋi muwukwenzi windi.

²⁶Wukulomba kudi Nzambi, Nzambi wukumwitŋia; kulonda amoni mesu indi nakuzaŋalala. Wukumufuntishila muntu kuloŋa kwindi.

²⁷Wukwimba tumina kumesu awantu, nindi, Navulumuni, naheŋeshi mwadiŋi mwaloŋa, hinadiilumu chumaku.

²⁸Yena nankúuli dehi nibuli kuya mwikela, wumi wami wakamona mwaana.

²⁹Tiyaku, Nzambi wamukoŋaŋa muntu yumiyi yejima nikayedi nikasatu,

³⁰kulonda amufuntishi afumi kwikela, kulonda amutookesheli namwa ana wamonaŋa akwakuhanda.

³¹Eyi Yoba, shinshikaku chachiwahi wuntiyi. Mwenaku kweyi nihoshi.

³²Neyi wukweti mwakuhosha, ŋakuli. Hoshaku, muloŋa ami nakeŋi kukuyiŋisha.

³³Neyi nehi, ntiyilili. Mwenaku kweyi nikuleji maana.