Read MUKANDA WANZAMBI Jobo 34 Bible Online

Jobo 34 - MUKANDA WANZAMBI bible

Jobo 34

¹Elihu hakunuŋaku nindi:

²Enu akwamaana tiyenu mazu ami; nteŋelekelenu matu, enumweluka.

³Muloŋa itu datompaŋa mazu neyi chatompaŋa ndakwila yakudya.

⁴Tuditondelenu yaya muwuŋaji; twilukenu yayiwahi mukachi ketu.

⁵Muloŋa Yoba nahoshi nindi, Ami naloŋa, Nzambi nanfumishi mwatelela kunsompela.

⁶Nindi, Hela mudi mwakunsompela, ami anfuukula dehi nawu nimukwakutwamba. Nindi, Hela ami nabuli muloŋa, chitu hichakuukaku.

⁷Iyalanyi wudi neyi Yoba, wanwaŋa kadiwu neyi meji?

⁸Wendaŋa chendu chimu nawakwakukoŋa yakuluwa, wendaŋa hamu nawantu atama.

⁹Muloŋa yena nindi, Neyi muntu wukutiya kuwaha naNzambi wukudiilamu ika?

¹⁰Dichu dinu enu antu mukweti muchima, ntiyililenu; Nzambi kwila chatama kwakulehi! Chinaweji kwila yakuheŋa kwakulehi!

¹¹muloŋa yena wakalubwila muntu yakoŋaŋayi. Wakamwesha muntu mwendelaŋayi.

¹²Mwalala Nzambi hakela mwatamaku. Chinaweji hakahenesha wuŋajuku.

¹³Mudimu wakutala iseki amwinkeluwu kudinyi? Indi mpata yamunu mwishina yejima amutwikayu kudinyi?

¹⁴Ela nindi ashi muchima hadi muntu atambuli spiritu yindi nimuuya windi:

¹⁵Antu ejima akanonela kumu, muntu hakafunta cheŋi mulunkunu.

¹⁶Neyi wukweti kashinshi tiyaku munukukuleja; tiyililaku mazu inukuhosha.

¹⁷Muntu wahela chiyulu ayuli akwawu? Wutanyishi wela nikuloŋa niŋovu?

¹⁸Chachiwahi kumwila mwanta neyi, Wuwamukunkulwayi? Hela kwila ayilolu neyi, Enu mwatama?

¹⁹Mwaka winzi wumwili wabulaŋa kwakama atulamba kumesu, wabulana kulemesha mukwakuheta amubadisha hadi kazweŋi? muloŋa wejima wawu himudimu wamakasindi hohu.

²⁰Akufwa ipanda dimu hohu, antu kuyinyinkesha nyika nyika, anayi dehi, akwaŋovu akayifumishaku chakadi nichikasa chinayikwati.

²¹Muloŋa mesu indi atalaŋa mwendelaŋa muntu, wamonaŋa mwayaŋayi mwejima.

²²Hikudi mwidima, hela wulelu wakufwa, kwakubatama akwakukoŋa yakuluwaku.

²³Nzambi haheta kwila nindi ashinshiki muntu shinshike-e, kulonda yena muntu ayi kumesu indi akamusompeshuku.

²⁴Wakotolaŋa mukwaŋovu kotu-kotu mwakadi nikwiluka, hakuhujishamu akwawu.

²⁵Dichi chashinshikilanayi nyidimu yawu, hakuyikuvumuna nawufuku, hiyakuchikeka.

²⁶Hakuyeta neyi chetanawu antu atama, hatooka akwawu atalana;

²⁷nanochu chabalumukiluwu kumulonda nawa cheŋi nehi, kwonti kwawu kusha muchima mwendelaŋayi yena hela njila yimu.

²⁸Mwaka ashikŋaŋa kudila kwakazweŋi kudi yena, niyena hakutiya kudila kwadilaŋawu anakabishuwu.

²⁹Yena haleti kumwena, wukuta nyisha hinyi? Hasweki mesu indi, wukumumona hinyi? Hela chakwila muza wejima, hela chakwila muntu wumu, chochimu;

³⁰kulonda muntu wasekesha Nzambi abuli kuyula, kulonda kubuli akutila antu nyihetu.

³¹Ochu kudi nahoshi naNzambi, nindi, Ami anambabeshi dehi hinakaluwa nawa cheŋuku?

³²Hela nindi, Nleji chuma chinabuli kumona, neyi neli mwakuheŋa hinakafuntilamu nawa cheŋuku?

³³Komana yena afwetesha muntu muwukukeŋeyi, walekaŋamu? Yeyi wukutondamu, bayi amuku; dichi hoshaku yiweluka.

³⁴Antu akweti muchima, mwalala, hela akwamaana ejima adi nakuntiya,

³⁵akuŋila nawu, Yoba wudi nakuhosha mwakadi kwiluka, mazu indi hiyakweti maanaku.

³⁶Mutenowu Yoba adi kumweseka eseke-e ndo nikunsa, Muloŋa mwaakulaŋayi waakulaŋa neyi antu aluwa.

³⁷Kunshidi yindi wudi nakubombelaku kudikaŋa, wudi nakutwetela makasa hankuma, wudi nakumuvulishila Nzambi mazu.