Read MUKANDA WANZAMBI Jobo 36 Bible Online

Jobo 36 - MUKANDA WANZAMBI bible

Jobo 36

¹Elihu hakunuŋaku cheŋi, nindi:

²Ŋitŋuku chanti ntahi nikuleji, muloŋa ni kweti mwekwawu mwakumu hoshelaku Nzambi.

³Nukufumisha yineluka kwakulehi, nukushimuna chaloŋayi Wantuŋili.

⁴Muloŋa chalala mazu ami hiyakutwambaku; Weluka chalala chikupu wudi naneyi.

⁵Tiya, Nzambi wasweja, hadiwulaŋa muntuku; wasweja Ŋovu mumuchima.

⁶Hahandishaŋa watamaku; wenkaŋa akabishewa wakuyisompeshela.

⁷Hafumishaŋa mesu indi kudi aloŋaku. Wayishakamishaŋa hamu nawanyanta ankanu hamatandawu awanta haya nyaka, hiyakwikala alema.

⁸Hela neyi akuyihata mumpompa, hela neyi anayikasi nanyonji yamakabi,

⁹yena wukuyileja mudimu wawu, ninyiloŋa yawu hadinkeluwu wanta.

¹⁰Wukujikula matu awu atiyi mwakuyifumbawu, wukuyileja kufuntamu aleki kuluwa.

¹¹Neyi akumutiyilila nakumukalakela, akashakama mafuku awu ejima nakumona kuwaha, akashakama nyaka yawu yejima nakuluŋa.

¹²Neyi akabula kutiyilila, akajilumuka nampoku yakabali, akafwa chakadi niyanelukuwu.

¹³Hakwila wena asekesha Nzambi munyichima yawu aditudikilaŋa kuzuwa, chayikasaŋayi hiyakalokaŋa nawu, Tukwashenuku; nehi.

¹⁴Afwilaŋa hawukwenzi, wumi wawu wajiyilaŋa mukachi kawakwamajilu.

¹⁵Wapulwishaŋa kabishewa namakabi awu, wajikulaŋa matu awu nayakala yayimweshaŋawu.

¹⁶Mwalala yena wakeŋa eli kukufumisha mwakala, akutwali mweneni mwakadi kuwoŋakana; nichakusha hamesa yeyi chakeŋeli kwinzala kwamanji hohu.

¹⁷Hakwila eyi wunenzali mbe nakusompesha kwasompeshaŋawu atama, nikusompesha niwuŋaji wunakukwati.

¹⁸Ochu chikudi ndombu babalaku, kuwanina kuwawanina kwakenza kakutwala; nikutoha kwawuseya wakukukuula kwakenza kakusenuna munjila.

¹⁹Komana maheteyi akukuwanina kulonda wubuli kumona kukala? Hela mwejima mwaswejela Ŋovu jeyi?

²⁰Bayi wukeŋa wufukuku, dihu hafumishaŋawu antu mwekalawu.

²¹Babalaku, bayi wutalisha mesu eyi kukuluwaku; muloŋa wunatondi chumichi chakubadika ikabi.

²²Tiya, Nzambi welaŋa yabadika naŋovu jindi; mukwakuleja wadifwana nayena hinyi?

²³Namwinyikili njila yindi hinyi? Hinyi natweshi kwila nindi, Eyi welaŋa mwaheŋa?

²⁴Anukaku wutoheshi mudimu windi wembilawu dehi antu tumina.

²⁵Awutala dehi kudi antu ejima, antu awumwenaŋa hahalehi.

²⁶Tiya, Nzambi himuneni, etu hitwamwilukaku; kuvula kwanyaka yindi hikwelukewaŋaku.

²⁷Yena wakokaŋa mamata ameji kwiwulu, hiyakweŋunuka hinvula yikufuma muchishishi chindi;

²⁸yechilaŋa mawulu mwishina, yanokeshaŋawu nankashi hadi antu.

²⁹Mwalala, mwatandaminaŋa mavu hadi natweshi kwilukamu? Hela tuhu chimwadidimaŋa muchisolu chindi hadi natweshi kwilukamu?

³⁰Tala, yena watanjikaŋa chejeji chindi kwekalayi kwi-ndo; wabutaŋa mwishina dakaluŋalwiji.

³¹Yena yumiyi diyi yasompeshaŋayi nachu antu; wayinkaŋa a yakudya yayivulu nankashi.

³²Wabutaŋa makasindi nakukenashana, wakulejaŋa, nindi, Etaku aha.

³³Chikwavumaŋa kwamushimunaŋa chekalayi, aŋombi nawa ashimunaŋa nawu nvula yidi nakwinza.