Read MUKANDA WANZAMBI Jobo 37 Bible Online

Jobo 37 - MUKANDA WANZAMBI bible

Jobo 37

¹Muchima wami wazaalaŋa woma nachumichi, hiwukufuma mwawu muwekala.

²Tiyililenu chikuvuma izu dindi, kwokuvuma kwedi-kaŋa mukanwa kindi.

³Wakutemeshaŋa mwahita ishina dewulu dejima, kukenashana kwindi wakutemeshaŋa kunsa jeseki.

⁴Kulondelahu izu hidikubuluma; hakudidima nezu dindi dawanta. Chatiyakanaŋa izu dindi hemikaŋa nawa kukenashanaku.

⁵Nzambi wadidimaŋa chakuhayama hohu nezu dindi; welaŋa yuma yamaneni yakaŋanya etu kwiluka.

⁶Welaŋa nvula yachishika yitooka, nindi, Holokaku hamaseki; ninvula janyanya chochu, ninvula jindi jamaneni chochu hohu.

⁷Walamikaŋa yilamiki hamakasa awantu ejima, kulonda antu ejima aleŋeliyi akeluki.

⁸Henohu anyama amwisaŋa hiyakuya muyididi yawu, hiyakwikala mumenawu.

⁹Mukapeka kakukabeta kakuchidiilu himukufuma mpepela yeneni; kukabeta kakuchimunswa hikukufuma chishika.

¹⁰Mayimakanza ahanewaŋa kumuuya waNzambi, hatandumuka meji hadikwataŋa mbe.

¹¹Mwalala walemeshaŋa ivu dadita namutonshi; watanjikaŋa ivu dakukenashana kwindi;

¹²danyeŋumukaŋa chakudileja kudi yena, kulonda akeli mwonsu mwakuyilejayi hewulu deseki dashakamawu antu.

¹³Yena wayiletaŋa, hekwawu kulonda kubabesha, hekwawu kulonda iseki dindi, hekwawu kulonda luwi.

¹⁴Eyi Yoba tiyililaku mwenimu; imanaku zo, wutoŋojoki chachiwahi nyidimu yaNzambi yakuhayamisha.

¹⁵Eyi wuneluki mudimu wayikunjikayi Nzambi, nichamwilaŋayi kukenashana kwevu dindi nindi, Kenaku?

¹⁶Eyi wuneluki mwadesekaŋa mavu, hinyidimu yakuhayamisha yayena weluka chalala chikupu?

¹⁷Eyi wuneluki chakwataŋa yuma yeyi yakuvwala iyena, hemanaŋa iseki zo-o nampepela yakukabeta kakuchidiilu?

¹⁸Eyi wunatweshi kutanjika nindi iwulu, dikweti Ŋovu neyi chibanjilu chakusuŋununa?

¹⁹Tuleji mutwakamwila, muloŋa tunakaŋanyi kuloŋesha mwakuhosha, nanichi chikudi mwidima.

²⁰Adi kumuleja nawu ami nukukeŋa kuhosha, tahindi? Muntu akeŋi kwaamu nindi, Nadi kujiya?

²¹Ichu dinu antu hiyamonaŋa mwaana watamukaŋa mwiwuluku; mpepela yikuhita, yikuyitookesha.

²²Kukabeta kakuchimunswa kwenzaŋa kuwaha kudi neyi wuru, Nzambi wavwala lubanji lwakutiya niwoma.

²³Chinaweji hitirkutwesha kumulamakeshaku; wasweja Ŋovu, chelayi nikusompesha diyi, nikusweja wuŋaji diyi, hakakabisha antuku.

²⁴Dichi chamutiyilaŋawu antu woma; hashaŋa muchima kudi akweti maana munyichimaku.