Read MUKANDA WANZAMBI Jobo 38 Bible Online

Jobo 38 - MUKANDA WANZAMBI bible

Jobo 38

¹Nzambi hakumwakwila Yoba muchinjimbi,

²nindi, Yeniwu wudi nakwiyilisha mpùŋa namazu akadi kwiluka hinyi?

³Pimpilaku mahineyi awuyala; muloŋa nakeŋi kukwihula wunleji.

⁴Hinaalili chikuku cheseki eyi wadiŋi kudihi? Neyi chinakulumbulukili, nleji.

⁵Wafuukwili yesekelu yachu hinyi? neyi wuneluki. Watandumwinuhu mwonji hinyi?

⁶Hembilaŋa tutumbwa twabudidi tumina hamu, nianyana kaNzambi ejima hiyakudikuwa nakuzaŋalala,

⁷chikuku chacheni achihatilili hanka? Hela ilola dakwiwombu adishiluku kudinyi?

⁸Habuzikiliyi kaluŋalwiji neyi chakuvwalika mwivumu, wenzeleluku yenzelu hinyi?

⁹Hinamwinkeli ivu diikali ihina dindi dakuvwala, nimwidima washishita wikali mukonzu windi,

¹⁰hinukumwinka lushimbi lwami, hinukumusha yenzelu nanyikomenu,

¹¹nami, Wakakuminaŋa hohanu hohu, kubadikahu nehi, mankandeyi adinka wanta akayimikila hohanu.

¹²Kufumisha hatachikili mafuku eyi wamwilahu dehi budidi, neyi Chaku? Hela kucha wamulejahu dehi hakuchiilayi,

¹³kulonda kwakakwati kunsa jeseki, kulonda atama akayisaholuhu?

¹⁴Kwabalumukaŋa neyi chabalumukaŋa maseki ewumba mwishina dachilamiki; yuma yejima hiyikwimana hululu hululu neyi ihina dakuvwala.

¹⁵Atama anayibondi kucha, chikasa chakwolola kwiwulu anachikotoli.

¹⁶Eyi weŋilahu dehi namutuseloki twakaluŋalwiji? Hela wendahu dehi mumena amwinyiŋi?

¹⁷Akumwekeshelahu dehi yenzelu yakufwa? Wamonahu dehi hela yenzelu yawulelu wakufwa?

¹⁸Washinshika dehi mwatohela iseki? Neyi wuneluki mwejimimu shimunaku.

¹⁹Njila yaya kwashakama mwaana yekala kudihi? Indi mwidima, wekala kudihi?

²⁰Winzi wakawutwali kuŋinza jawu, wakeluki ninjila jaya kwitala dawu.

²¹Eyi yeyi weluka, wavwalikili henohu, wukweti mafuku eyi amavulu!

²²Mumatala akuswekela nvula yachishika yitooka, eyi weŋilamu dehi? Hela matala akuswekela nvula yamalola eyi wayimonahu dehi?

²³Yatentekelawu mwaka wayihuŋu, yatentekelawu ifuku dakulwa nidanjita.

²⁴Mwaana waambukilaŋa njila yidihi? Mpepela yakumusela yadimwaŋilaŋa hamaseki njila yidihi?

²⁵Wabalwili njila yakuhitila dibaji, hela njila yakukena kwakudidima

²⁶kulonda kunokesha nvula hampata yakadi antu, hela hesaŋa dakadi antu,

²⁷kulonda kwikutisha mpata yamukunkulwayi yela kwakaselewa hohu, kulonda kumeneshamu munyenvu, hinyi?

²⁸Nvula yikweti tata yayu? Nimamata awuumi ayivweli kudinyi?

²⁹Indi mayimakanza afumini mwivumu danyi? Hela wuumi wutooka wachishika wamwiwulu awuvweli kudinyi?

³⁰Meji hiyakudikwata neyi ilola, hewulu denyiŋi hihakudikwata mbe.

³¹Wukutwesha kukasa Akwakutwa masaŋu hadipompelawu, tahindi? Hela kukasununa nyonji yaNyama nakawa?

³²Wunatweshi kwidisha tutumbwa twaMazaroti hayilaaka yatu, tahindi? Hela Muhitu wunatweshi kumuhitisha hamu nawanyanindi, tahindi?

³³Eyi weluka nshimbi jamu-mawulu, tahindi? Wunatweshi kuyikoleshela wanta wawu hanu hamaseki, tahindi?

³⁴Wunatweshi kushikŋa izu deyi kumavu kulonda meji amavulu akubuti wi-i, tahindi?

³⁵Wunatweshi kutuma kukena, neyi, Yenu; mwaka kukwili nawu, Yetu awa; tahindi?

³⁶Hinyi washili maana mukachi kamuntu? Hinyi wenkeli muntu yitoŋojoka yakashinshi?

³⁷Hinyi natweshi kuchinda mavu namaanindi? Hinyi natweshi kuhuŋununa nswaha jamwiwulu,

³⁸hakumpukilaŋa lunkuŋu kumu hilukudikwata mbe, nyikanji yamaseki hiyikulamata hamu?

³⁹Yeyi wukumuzombela mukaji wamutupa mbiji yindi? Yeyi wukufumisha nzala yanyenzi yanyitupa,

⁴⁰habatamaŋawu muyididi yawu, hashakamaŋawu mwavumba nakubelamina, tahindi?

⁴¹Hinyi wadiishaŋa ikololu yakudya yindi hadililaŋa anyanindi kudi Nzambi, halumbwaŋi-laŋawu nákubula yakudya?