Read MUKANDA WANZAMBI Jobo 39 Bible Online

Jobo 39 - MUKANDA WANZAMBI bible

Jobo 39

¹Wuneluki hasemenaŋawu ansenŋamu tumba, tahindi? Washinshika dehi kwasemenaŋawu akaji ambaala?

²Wunatweshi kuchinda tukweji twawu twakulishaŋawu mavumu? Weluka kakweji kasemenaŋawu?

³Hiyakufukama, hiyakusema anyanawu, hiyakukumisha nyisoŋu yawu.

⁴Anyanawu hiyakukola, hiyakukulila mwisaŋa, hiyakudiyila, kufunta cheŋi nehi.

⁵Hinyi watumini chimbulu chamwisaŋa, nindi yaku? Hinyi wakasunwini nyonji yachimbulu chamwisaŋa?

⁶Wenawa nayinka dehi chana chiikali itala dawu, nayinki nawa makula kwikali kuwushakaminu wawu.

⁷Yena wadiwulaŋa muyoyu wahamukala, hatiyaŋa chabidikaŋa mukwakwendeshaku.

⁸Kwahitila mapidi diku kuwudiilu windi, wakeŋa akeŋaŋa yuma yituuta yejima.

⁹Ŋombi wamumpata atiyi kuwaha kukukalakela? Akami kwitaŋa deyi?

¹⁰ŋombi wamumpata wukutwesha kumukasa mwonji akudimini? Akulambishili nyihaŋa yeyi muyinekineki?

¹¹Wumukuhweleli nanochu chaswejayi Ŋovu, tahindi? Wumulekeli nyidimu yeyi, tahindi?

¹²Wumushi muchima neyi, Wukunletela mbutu jami kumukala? Hela neyi, Wukunkuŋujolela mbutu jami kuwuhulilu?

¹³Mpúula jakakumbikumbi jazaŋalalaŋa; hela chochu, nyona yindi nimavuji indi akweti luwi?

¹⁴Muloŋa yena washiyaŋa mateta indi hamaseki, wayikwatishaŋa iyena mulunkuŋu;

¹⁵kwanuka nindi akuyichika mwendu nehi, hela kwila nindi kanyama wamwisaŋa wukuyidata nehi.

¹⁶Wachinchikilaŋa anyanindi neyi hiyanyaninduku; hela wakabakanaŋa tuhu chamukunkulwayi, woma kwindi nehi;

¹⁷muloŋa Nzambi namufumishi dehi maana, hanamwinki hela kashinshuku.

¹⁸Chakudololayi kwiwulu hakudiwula kawalu ninowu nashakamuhu.

¹⁹Yeyi wamwinkeli kawalu Ŋovu jindi? Yeyi wavwikili nshiŋu yindi izaŋa datalulaŋayi?

²⁰Yeyi wamwinkeli Ŋovu jakumotoka neyi mpasu? Mpuhu yakwonashana kwonashanaŋayi yikweti woma nankashi.

²¹Wafunyaŋa muchinekineki, hakuluŋa naŋovu jindi, hakwidika hakuya nákubulakana nawamayala amanyeka yitwa.

²²Woma wawusehaŋa kwindi, haakamaŋa chumaku. Chamonaŋayi mpoku yakabali hakinkananaŋaku.

²³Mungongu wansewu wadihumahumaŋa tuhu kumujimba windi, niiyoŋa nikadiyoŋa kanyanyabe-be-be!

²⁴Chakuzuwayi, chakufunyayi, hakuminya iseki, hetiyaŋa nindi mpùŋa yinavumuku.

²⁵Chejima chakutiyayi mpùŋa hakwila nindi, Aha! Ivumba danjita waditiyilaŋa kwakulehi, nichakudidimawu awakulumpi anjita, nimbila jawantu.

²⁶Chaselaselaŋayi chikoji, hakutandumuna mpuula jindi hakutalisha kukabeta kakuchidiilu, wachilaŋa nama ana akumuleja kudeyi, tahindi?

²⁷Mbúulu chajindamaŋayi mwiwulu hakutuŋa chaala chindi hahalehi, yeyi wamulejaŋa, tahindi?

²⁸Wáshakamaŋa helola, nikukama kwokwakamaŋayi, helola hanyamuka, kwakudikaŋila.

²⁹Kwenoku hakukelenkenta, hakutalatala yakakwatayi, mesu indi ayimwenaŋa hahalehi.

³⁰Anyanindi apwitaŋa mashi; kudi yivuvuma kwokwadiyi.