Read MUKANDA WANZAMBI Jobo 40 Bible Online

Jobo 40 - MUKANDA WANZAMBI bible

Jobo 40

¹Yehova hakumwakula Yoba, nindi Muntu wayikonkojola atadiki naChinaweji?

²Wamuzuŋishaŋa Nzambi akulumu.

³Yoba hakumwakula Yehova,

⁴nindi, Ami muntu wamukunkulwayi nukukwakula namidi? Nakumini dehi dakukwata chikasa kukanwa.

⁵Nahoshi dehi kamu, hinukwakula nawaku; nikayedi, hinukunuŋaku nawa cheŋi izu dikwawuku.

⁶Yehova hakumwakula Yoba muchinjimbi,

⁷nindi, Pimpilaku dinu mahineyi awuyala, muloŋa nakeŋi kukwihula wunleji.

⁸Wunakeŋi wujahi wuŋaji wami? Wunakeŋi wunfwishami, kulonda eyi wuyiŋi, tahindi?

⁹Eyi wukweti chikasa chidi neyi chaNzambi? Wunatweshi kudidima nezu neyi chelaŋayi yena?

¹⁰Kadileŋaleŋi nakulema nákubula kudisawula, vwalaku niwutotombu niwukeleŋi.

¹¹Sumpokaku kuzuwa kweyi, wutali antu ejima adinka wanta, wuyizozeshi.

¹²Talaku antu ejima adivwimba wuyikeheshi; wuyidatoli atama kwonsu kwakwimanawu.

¹³Yisweki mulunkuŋu hamu. Yikasi kumesu awu kwaswamana.

¹⁴Ninami nawa nikwitŋi nami, Komana chikasa cheyeyi aweni chachidiilu chinatweshi kukupulwisha.

¹⁵Tala behemoti naleŋeli hamu neyi, wadyaŋa matahu neyi ŋombi.

¹⁶Tala mwani Ŋovu jindi jekala munkuma yindi, wuswa windi wekala kunyisunyi yakwivumu dindi.

¹⁷Wemikaŋa mukila windi neyi musida ki-i! Nyijila yakumahandindi yadisela.

¹⁸Mafwahindi adi neyi nyiyeŋu yawuneŋu. Nyendu yindi nimakasindi yidi neyi nyishi yayikuŋu.

¹⁹Yena diyi wabadikahu hayuma yaNzambi, wamuleŋeli diyi natweshi kumwinyika mpoku yakabali.

²⁰Mwalala kwaamu, mpidi jamusoŋelaŋa yakudya; joji mpidi jahemenaŋa anyama amumpata ejima.

²¹Wakamaŋa mwishina danyitondu yikweti wulelu, mumateti mwavumba, nimumachiŋichiŋi.

²²Nyitondu yikweti wulelu yamubutaŋa wulelu wayu wi-i. Nyisombu yakukakaloŋa yamukumaŋa niniku niniku.

²³Kela kaloŋa wukwila dibaji yena kuzaala woma nehi. Hela neyi Yodana wukwinzala nikunsaŋilu yindi, yena saŋa adiwunjikilayi kwindi zo-o.

²⁴Neyi wudi nakutona hadi wukumukwata? Hela kumuta mumuhetu kulonda amufululi hamazulu?