Read MUKANDA WANZAMBI Jobo 42 Bible Online

Jobo 42 - MUKANDA WANZAMBI bible

Jobo 42

¹Yoba hakumwakula Yehova,

²nindi; Neluki nami wunatweshi kwila yuma yejima; nami hikudi natweshi kukulekesha muwuna-tondi kwilaku.

³Owu wukujinda mpùŋa yakadi maana hinyi? Komana ami nahoshi dehi yuma yinabulili kwiluka, yuma yakuhayama yabadikili mumaanami, yinayambili.

⁴Nalembi dehi mwani, tiyaku munukukeŋa kuhosha, yami nukukwihuleyi, eyi wunlejami.

⁵Nakutiyili kwamumatu hohu, ichi dinu nakumoni namesu ami,

⁶dichi dinu nadimoni dehi nami natama, nabalumuki dehi mumuchima mulunkuŋu namawuti.

⁷Chineli Yehova nahoshi dehi naYoba mazu awa, Yehova hakumwila Elifwazi wakuTemani nindi, Ami nazuwi dehi naneyi nawamabwambu jeyi ayedi, muloŋa munabuli kuntena chachiwahi neyi chananteniyi kambuŋami Yoba.

⁸Dichi dinu kwatenu mayoŋa aŋombi amayala atanu nayedi, niyizamba yanyikoku yitanu nayiyedi, muyi kudi kambuŋami Yoba, himulambu li nyilambu yenu yakushita, akayilombeli kudi kambuŋami Yoba, Muloŋa diyi nukwitiyami, kulonda nakabuli kuyikoŋa mwashika wusupi wenu; Muloŋa munabuli kuntena mwamuwahi neyi chananteniyi kambuŋami Yoba.

⁹Dichi aElifwazi wakuTemani, naBilidadi wakuShuhi, naZofwari wakuNayamati ayili, elili mwayilejeliyi Yehova, Yehova wamwitiyili Yoba.

¹⁰Chayilombeleliyi amabwambu jindi, Yehova hakubalumuna wukoli waYoba. Yehova hakumuhetesha Yoba, hakumulunjikilamu niyikwawu yashikila muyakusambila.

¹¹Ana kwindi ejima, niahelindi ejima, niantu ejima adilukiliyi nawu hakusambila, hiyakwinza kudi yena nakudya nindi yakudya mwitala dindi. Hiyakudihuŋisha kunyitu, hiyakumukundeja nakutama kwejima kwamuleteleluwu kudi Yehova. Antu ejima hiyakumwinka iwu idali, iwu idali; hiyakumwinka nituzeya twawuru wejima wawu, iwu kamu, iwu kamu.

¹²Yehova hakumukoolekesha Yoba; kukooleka kwamukoolekesheliyi kwakukuminina kwabadikili kwakusambila. Hakwikala nanyikoku makombakaji ikumi nawana, anŋameli makombakaji atanu nadimu, aŋombi anyidimu makombakaji ayedi, ayimbulu awakaji ikombakaji.

¹³Hakuvwala nawa anyana amayala atanu nayedi, awambanda asatu.

¹⁴Wamumbanda wakusambila wanamutumbili ijina dindi, nindi Yemima; wamumbanda wamuchiyedi nawa, ijina dindi Keziya; wamumbanda wamuchisatu nawa, ijina dindi Kereni Hapuki.

¹⁵Mwituŋa dejima himwamwekeni ambanda akweti lubanji neyi anyana kaYobaku. Tata yawu wayinkeli wuswana wawu hamu nawana kwawu.

¹⁶Kufuma henohu Yoba wanuŋiluku nyaka nkulakaji namakumi awana, wamweni ni anyanindi niezukulu indi, makiŋu awana.

¹⁷Yoba afwa ni kufwa, wela dehi kashinakaji, mafuku indi amuvulila dehi.