Read MUKANDA WANZAMBI Jobo 5 Bible Online

Jobo 5 - MUKANDA WANZAMBI bible

Jobo 5

¹Tambikaku ntahi. Kudi wukukwakula? Wukutala kudi wajilawumu wudihi?

²Muloŋa chikela chamujahaŋa muntu wasupa, ichima dajahaŋa muntu wazenzalala.

³Namweni wasupa hakumena nyiji, kukasumuka hinukushiŋa hashakamayi.

⁴Anyanindi adi kwakulehi nakwamwena, anachikekeli muchisu champwembu, hikudi wakuyipulwishaku.

⁵Yakudya yaaŋulaŋawu ayidyaŋa to kudi akwanzala, hela munyiŋa ayinonaŋa tuhu, chikuluku chinaasamini mahetawu.

⁶Muloŋa kukaba hikwafumaŋa mulunkuŋuku, hela yihuŋu hiyatupukaŋa hamasekuku.

⁷Muloŋa muntu wavwalikila yoyihuŋu neyi chayaŋa nsasi mwiwulu.

⁸Hakwila ami, neyi yami, nadi kumukeŋakeŋa kwami Nzambi, nadi kumukunjikila Nzambi nsaŋu yami;

⁹diyi welaŋa yuma yeneni yakaŋanya kwilukewa, yuma yakuhayama yakachindewaŋa.

¹⁰Diyi wamwaŋilaŋa nvula hamaseki, watemeshaŋa meji hamaha.

¹¹Kulonda ashi akadi kulema hewulu, niadilaŋa ayishi hewulu hamwena.

¹²Wasupishaŋa yuma yafuukulaŋawu antu akeya kulonda makasawu akaŋanyi kwila mwakeŋa eli kwilawu.

¹³Akwamaana wayikwatilaŋa kukukeya kwawu awenawu, niyuma yanakwatiluwu akwakuzuwaŋana mpùŋa, yinamwaŋali mwa-mwa.

¹⁴Iku saŋa kwachila kudi wena kudi mwidima bwi-i, apuputaŋa hakachi kamwaana neyi kudi wufuku.

¹⁵Waamwinaŋa antu kumpoku yakabali yamukanwa kawu, niwabula yuma wamwamwinaŋa kudi mukwaŋovu.

¹⁶Kulonda kazweŋi amoni kukuhwelela, nikuluwa kujiki kukanwa kaku.

¹⁷Tala, muntu afumba wukudi Nzambi wamona kuwaha; dichi dinu bayi wudiwula chababeshaŋayi Chinawejuku.

¹⁸Welaŋa akatisha muntu, akasahu cheŋi; atapa muntu, makasindi hiyakumúuka.

¹⁹Wakakupulwisha kumahuŋu atanu nadimu; eŋa, hela atanu nayedi, katama hikakakukunkaku.

²⁰Hamwaka wanzala wakakukuula kukufwa, nihanjita wakakukuula kuŊovu yampoku yakabali.

²¹Hakayetawu akwenu nachikoti chedimi, eyi kweyi wakabatama zo; chikwakenza kujilumuka hiwakatiya womaku.

²²Hela kujilumuka hela nzala wakayiseha tuhu kweyi; hela anyama amwisaŋa hiwakayitiya woma kweyuku.

²³Malola amumpata wakakwata nawu wubwambu; anyama amumpata hiyakekala nandombu naneyuku.

²⁴Wakeluka neyi, kwitenti dami kwamwena; wakaya nakutala kwiyinda deyi, hiwakatondamu chumaku.

²⁵Wakeluka neyi, anyanami akavula; neyi, inakasema akavula neyi matahu ahamaseki.

²⁶Wakashika kwijamu deyi wakula dehi chacheni, neyi chita chatidiku chaletaŋawu hachila aka chochu.

²⁷Tiya mwenimu tunahoshi, twashinshikamu dehi, dimu chaya; tiyakumu, wilukumu kulonda chikukwashuku.