Read MUKANDA WANZAMBI Jobo 6 Bible Online

Jobo 6 - MUKANDA WANZAMBI bible

Jobo 6

¹Yoba hakwakula nindi:

²O chikela chami, neyi chadiŋi chakupezelesha!

³O kuhalwa kwamami, neyi akuchishila hamu kupezu! Kwadi kubadika wusekulula wakukaluŋalwiji kulema, mwakulumbulwila chikela chami munankaŋi.

⁴Yikeŋi yaChinaweji yinaŋiŋili, spiritu yami hakunwa wulembi wayu. Mawoma antiyishaŋayi Nzambi anantandamini.

⁵Ŋala neyi wudi namatahu akaluki? ŋombi neyi wudi nakudya aaŋuli?

⁶Chuma chakadi ivumba achitweshaŋa kuchidya chakadi muŋwa? Iteta ditooka dikweti ivumba?

⁷Muchima wami walekaŋa kukunkaku, nayimonaŋa yidi neyi yakudya yazemba kumuchima.

⁸Adi kunyinka chuma chinalombaŋa! Nzambi wadi kunyinka chuma chinafwilaŋa!

⁹Chochakwila nami, Nzambi etŋi kunchika, akumini dakufumbulula chikasa chindi, anfumishuhu.

¹⁰Neyi chila chochochu nukudikundeja; eŋa, nukukumina dakuluŋa nayikatu yakadi kuŋanakena; ochu natadiki mazu aWajila?

¹¹Ŋovu yami yashika mudihi mwaka nichiŋililaŋa tuhu? Nukukumina mudihi mwaka niwundaŋa tuhu?

¹²Ŋovu yami hiŋovu yamalola, tahindi? Mujimba wami wawuneŋu, tahindi?

¹³Mudami mudi nawa chakudikwasha nachu? Maana alala hiyananfumishuwu dehuku?

¹⁴Muntu neyi jamukaŋa dehi abuli kumutiyila luwi kudi ibwambu dindi? Neyi nehi, wukuleka kumutiya Chinaweji woma.

¹⁵Ana kwami anandimbi neyi chadimbanaŋa kana kakaloŋa, neyi chahitaŋa yeji yatwana twatuloŋa.

¹⁶Twelilaŋa tuhu bwi-i namayimakanza, mwanowelaŋa nvula yachishika yitooka,

¹⁷Chikukwila iyena hitukuketoka; chikukwinza nkanza, túuma nichau mutwahitilaŋa.

¹⁸Yendu yawantu yahitilaŋa njiloyu hiyikutondolwela, hiyi kuya mwisaŋa damukunkulwayi, hiyikunoŋa.

¹⁹Yendu yakutema hiyikutalatala, nyikanka yakuSheba yawakwakwenda hiyikuyichiŋilila.

²⁰Atiyili nsonyi nanochu chakuhweleleluwu; nawu ashikuku, abaya nikubaya.

²¹Dichi dinu enu mudi amukunkulwayi; munamoni chuma chakuyifwisha mutentu, himukutiya woma.

²²Ami nayili nami, Nyinkenu? Indi nami, Kuyuma yenu nnonenenuku chamukunkulu?

²³Indi nami, Mpulwishenu kudi mukwankunyi? Indi nami, Nkúulenu kudi akwakunkabisha?

²⁴Nlejenu, nukumwena kwami. Nlejenu chachiwahi munaluwi.

²⁵Mazu oloka o chaswejawu kutwa! Kufumba kwenu kunanfumbili mudihi?

²⁶Munatoŋojoki nenu mufumbi mazu, tahindi? kutoŋa yihosha yamuntu jamukaŋa dehi yidi neyi mpepela.

²⁷Eŋa, munakeŋi musakuli nachinjikijilu hansaŋu janshona, mulandi ibwambu denu.

²⁸Dichi dinu itŋienu ntahi kunshinshika, chalala hinukutwamba kumesu enuku.

²⁹Funtenumu mwani, mubuli kuheŋesha wuŋaji; mwalala funtenumu cheŋi, muloŋa nsaŋu yami yaloŋa.

³⁰Ochu kwidimi dami kudi kuheŋesha wuŋaji? Chinukutompa yuma yatama nikaŋanyi kwiluka ivumba dayu?