Read MUKANDA WANZAMBI Jobo 7 Bible Online

Jobo 7 - MUKANDA WANZAMBI bible

Jobo 7

¹Kudi muntu wahamaseki hikwekala kulwaku? Mafuku indi hiyadineyi mafuku amuntu akwatawu wuŋambaku?

²Chakeŋaŋayi nankashi nduŋu kuwulelu, chatalilaŋayi muntu akwatawu wuŋamba wufwetu windi,

³dichi nidi ninami, anyinkaŋa tukweji twamukunkulwayi, antoŋwelaŋa mawufuku akukabakana hohu.

⁴Chinukukambama hinukwila nami, nukuhindukila hadihi? O wufuku kutoha! Kwakwalumoka hohu nichichikukucha to-o.

⁵Mujimba wami wunavwali kwamavunu hohu ninyikanji yamaseki. Ikowa dami dabaloka dehi, hidikutotoloka hahaha.

⁶Mafuku ami adi nakuhita lufuchi neyi ikina dakutuŋa nachu mahina, adi nakuhita chakadi chikuhwelela.

⁷Anukaku neyi wumi wami himpepela, hinakamona cheŋi chuma chachiwahi nadisu damuku.

⁸Disu dawamonaŋami hidamba kanmona nawa cheŋuku; wakela neyi wuntali namesu eyi, ami kwosi.

⁹Chanoŋaŋa ivu, hidikujimaŋana, dichi chadiyi niwakunkumukaŋa mukaluŋa, hamba kakandukamu cheŋuku.

¹⁰Hamba kafunta cheni kwitala dinduku, hindi hadiŋiyi hihakamwiluka cheŋuku.

¹¹Dichi hinukulekesha kanwa kami kuhoshaku, nukukumina dakutatoka nakukala kunatiyi spiritu yami, nukukumina dakutatoka nakulula kuwunatiyi muchima wami.

¹²Ochu ami nikaluŋalwiji, tahindi? Nilukanyama lweneni lwamukaluŋalwiji, tahindi? Mwaka munshilaŋa atulama akuntalaŋa?

¹³Chinukwila nami kadidi kami kakunkundeja, nami kadidi kami kakunwundisha kutatoka kunidi nakutatoka,

¹⁴eyi hiwukumbazumwisha nayilota, hiwukunzaalisha woma nayimwenu,

¹⁵mwaka muchima wami wufwilaŋa kudikudika, nitondi kufwa awa mafwahami ashali tuhu kwawu.

¹⁶Wumi wami nakumini dakuwuhela, hinakeŋi kuhanda haya nyakaku. Nleki kwami, Muloŋa mafuku ami akuhemesha hohu.

¹⁷Ochu muntu hichumanyi mwaka wumutoheshi, mwaka wumushi muchima,

¹⁸mwaka wumuhempulaŋa habudidi habudidi, wumwesckaŋa hanti hanti?

¹⁹Mukunfumisha mesu enu mwakanyi munshiyi kanka wami niminyuhu mazeŋi?

²⁰Neyi navulumuni nakwili ŋahi, eyi kalama kawantu? Wunaŋimiki niikali neyi chuma chakwasaŋa nyivu yeyi? Mwaka niikalaŋa chiteli chakuditwikaŋa ami aweni.

²¹Walekelaŋadi kuŋanakena muloŋa wami, wufumishi kuluwa kwami? Ichi dinu nukudikamina kwami mulunkuŋu; wakankeŋakeŋa nankashi hinakekala nawa cheŋuku.