Read MUKANDA WANZAMBI Jobo 8 Bible Online

Jobo 8 - MUKANDA WANZAMBI bible

Jobo 8

¹Bilidadi wakuShuhi hakwakula nindi:

²Wukukumisha kuhosha yumiyi mwakanyi? Mazu amukanwa keyi elaŋa tuhu neyi mpepela yeneni?

³Nzambi waheŋeshaŋa wuŋaji, tahindi? Chinaweji waheŋeshaŋa kuloŋa, tahindi?

⁴Neyi anyaneyi diwu anamuvulumuni, niyena nayishikŋi dehi mumuloŋa wawu,

⁵neyi eyi wukumukeŋakeŋa Nzambi nankashi, nakumulembelela Chinaweji;

⁶neyi wadiŋi walala woloka, chalala yena wadi kukuhindukila namutulu, wadi kushakamisha chachiwahi itala dakuloŋa kweyi.

⁷Hela kuwatachikili kwakeheli, kuwakakumishila kwakatoha nankashi.

⁸Ehujoli ntahi mwani, mwahitili nyaka yakusambila, wushuku muchima wiluki yakeŋakeŋeluwu ankakulula jawu.

⁹Muloŋa etu kwetu tuyantu ahaloshi aha hohu, hitweluka chumaku, muloŋa mafuku etu ahamaseki himwevulu hohu.

¹⁰Ochu wena ankakulula abuli kukuleja, hela kukushimwina, hela kukuhosha mazu amunyichima yawu?

¹¹Mushiinji watweshaŋa kukula chakadi malowa, tahindi? Hela ilela datweshaŋa kukula chakadi meji, tahindi?

¹²Hidichidi ditúuta, nikudiketula nehi, dalepukaŋahu dehi, nyitondu yejima kanda.

¹³Dimu mwamonaŋawu antu ejima amuvulamenaŋa Nzambi; muntu wakadi kusha Nzambi kumuchima mwakuhwelelaŋayi mwakakuma.

¹⁴Chikuhwelela chindi chakaketuka hakachi ngwa, yakuhwelelayi hiwanda wachimbalaŋenzi.

¹⁵Nindi ashindameni hetala dindi, kwimana nehi, nindi akwatuku mbe-e, kukola nehi.

¹⁶Namwa ana, nyitayi yindi yidi nakuya nakutandama hetempa dindi.

¹⁷Nyiji yindi yaya nakudiselasela kumulumba, wamonaŋa hamalola.

¹⁸Neyi wakakisikila hindi hekalayi, hakadikala nindi, Hinakumwenuku.

¹⁹Yowe! muzaŋalu wanamoniyi wowenowu, hamaseki hihakamena antu acheŋi.

²⁰Tiyenu, Nzambi hakamúumba muntu walalaku, akwakukoŋa yatama hakayikwasha kwinduku.

²¹Ninodu wakenzesha mukanwa keyi nanyiselu, ninyivumbu yeyi yakadikuwa hohu.

²²Akuheleyi akadivwika nsonyi, itenti dawatama hidakekala nawa kwoku.