Read MUKANDA WANZAMBI Jobo 9 Bible Online

Jobo 9 - MUKANDA WANZAMBI bible

Jobo 9

¹Yoba hakwakula nindi:

²Chalala, neluki nami dimu chaya; hela chochu, muntu wakatwesha kwikala waloŋa kumesu aNzambi ŋahi?

³Neyi yena wukwila nindi etŋi kutadika namuntu mazu ikomhakaji, muntu hakutwesha kumwakula nidimuku.

⁴Wukweti maana mumuchima, wasweja niŋovu; wamuchinchikilahu dehi ashakama chachiwahi hinyi?

⁵Wafumishaŋa kwindi mapidi chakadi wena kuchiluka chayikundulaŋayi hazuwaŋayi.

⁶Wanyinkeshaŋa iseki, hidikufuma mudadiŋi, niyishimi yadu hiyikuzaala.

⁷Chalejaŋayi itaŋwa nikusela nawa nehi; waswekaŋa tutumbwa alamikahu nichilamiki.

⁸Diyi kanka windi hohu watanjikaŋa mawulu, wadataŋa hamankanda akaluŋalwiji.

⁹Diyi waleŋa Muhita, niNyama nakawa, niAkwakutwa masaŋu, nitupeka twakukabeta kakuchidiilu.

¹⁰Diyi welaŋa yuma yamaneni yakashinshikewaŋa, eŋa, niyuma yakuhayama yakachindewaŋa.

¹¹Iwu wukuhita kwakwihi nanami iwu, ami kumumona nehi; owu wukuhita kumbidi owu, ami kumushinshika nehi.

¹²Tala, hakukwata, wukumulekesha hinyi? Hinyi wukumwila nindi, Wudi nakwila ŋahi?

¹³Nzambi chakazuwayi hakalekaku. Akwashaŋa Rahabi akabandama kwishina dindi.

¹⁴Indi ami nimoni mwakumwakwila? Nimoni kutonda mazu akutadika nindi?

¹⁵Hela neyi nadiŋi naloŋa hohu hinadi kwakulaku; nadi kukumina dakumulembelela mukwakunsompesha.

¹⁶Hela neyi natambikili, niyena hakwakula, ami hinadi kwitiya nami natiyilili izu damuku.

¹⁷Muloŋa yena wankotolaŋa nanvula yeneni, wanvulishilaŋa yitu yami chakadi muloŋa.

¹⁸Hanshilaŋa nihawonenuku, wakuminaŋa dakuŋinzesha nayalula.

¹⁹Nami niteni Ŋovu jamukwaŋovu, iwu! Niteni nawa kusompesha, wukunyinka mpinji yakudihakwila hinyi?

²⁰Hela neyi nukwi kala waloŋa kanwa kami diku kakambayisha, hela neyi nukwi kala walala kakanshimuna chinaluwalala.

²¹Eŋa, nidi walala hinadishi kumuchimaku; nadiwuli wumi wami.

²²Chonsu chochimu hohu. Dichi chinukwila nami, Wajilumunaŋa kwindi niwalala niwatama.

²³Hela neyi chipupu chikujaha antu chakuyikasumwisha, yena wukuseha wakadi muloŋa mwamwesekaŋawu.

²⁴Iseki adinka dehi mumakasa awatama. Wabutaŋa ansompeshi aduhu kumesu awu. Neyi hidiyuku ochu hinyi?

²⁵Ichi dinu mafuku ami adi nakuhita lufuchi chakubadika mukwakutwala nyikanda lufuchi. Adi nakutemuka kwawu, hiyamonaŋa yuma yayiwahuku.

²⁶Anahiti dehi kwawu neyi maatu apepela, neyi chadinataŋayi mbuulu hakanyama kindi.

²⁷Hinili nami, Nukuvulamena munatatokaŋa, nukuleka kwami kudihomba kumesu, nukusehaseha kwami;

²⁸hinukutiya woma wayuma yakala yejima yinamonami, nukwiluka nami hiwukuŋitŋia neyi nabula Muloŋaku.

²⁹Nukufwa nachu; ochu nukukabakenadi chakuhemesha?

³⁰Hela neyi nukuwela meji anvula yachishika yitooka hinukutookesha nankashi makasami,

³¹wakanjimika tuhu mukapila, niyuma yami yakuvwala yakantiya kumuchima bwi-i.

³²Muloŋa yena himuntu neyi chinidami mwaka nimoni kumwakulaku, mwaka tudiwani hamu nakudisompeshaku.

³³Hakachi ketu hihadi mukwakutuyula wakwila akwata ami akwata yenaku.

³⁴Anfumishi mutondu windi, mutentu windi bayi wunfwisha mutentuku,

³⁵nimoni kuhosha, nibuli kumutiya woma; muŋa mudami himudi chenochuku.