Read MUKANDA WANZAMBI Lisamu 105 Bible Online

Lisamu 105 - MUKANDA WANZAMBI bible

Lisamu 105

¹Musakililenu Yehova, tambikenu ijina dindi; tiyakeshenu mwelaŋayi mwaya nyuza yawantu.

²Mwimbilenu tumina, musepenu. Hanjikenu mpanji janyidimu yindiyakuhayama.

³Disambenu nejina dindi dajila; awa akumukepakeŋa Yehova azaŋilali mumuchima wawu.

⁴Keŋakeŋenu Yehova, niŋovu yindi; keŋi kepenu mesu indi nyakaye jima.

⁵Anukenu nyidimu yindi yakuhayama yaneliyi; niyuma yindi yakalayaneliyi, niwuŋaji wamukanwa kindi;

⁶Enu anyana kakambuŋindi Abarahama, enu anyana kaYakoba, yenu atondayi.

⁷Yena diyi Yehova Nzambi yetu; wuŋaji windi wekala mwahita isekidejima.

⁸Waanukaŋa haya nyaka chitiyaŋenu chindi, dodizu dashiikiliyi antu, kumakiŋu ikombakaji;

⁹Chochitiyaŋenu chatiyapeniyi naAbarahama chamusanyikililiyi Isaka;

¹⁰Chamukolesheleliyi Yakoba, nindi hilushimbi, hakumukoleshelamu Isarela hichitiyaŋenu chahaya nyaka;

¹¹Nindi, Nakakwinka ituŋa daKenani, diku kunesekeni wuswana wenu;

¹²Henohu kuyichinda achidi antesha hohu; mwalala adiŋi antesha nankashi, achidi enyi mwituŋa;

¹³Hakimbokelaŋawu afuma hamuzaha aya hamuza wukwawu, afuma mumpata yamwanta wumu aya mumpata yawantu acheŋi.

¹⁴Hetejeli muntu kuyila chatamaku; mwalala hela anyanta ankanu wayiliosholeli hanyijimba yawu;

¹⁵Nakuyila nindi, Bayi mukwatapa chikasa hadi antu ami akuwayisha dehi manjuku, hela atuprofwetu twami bayi muyilaŋa chuma chatamaku.

¹⁶Watambikili nzala mwituŋa, waketwishilumu yakudya yakuhwelelawu.

¹⁷Watemeshelaŋahu dehi iyala, diyi Yosefu alandishiluwu muwuduŋu;

¹⁸Nyendu yindi ayikatishili mumaleŋi, amukamikili muyikuŋu;

¹⁹Nakushi ka hefuku damwekeni izu dindi; izu daYehova damwesekeli.

²⁰Mwanta wampata watemesheli nakumusubula; yowu nyuli yawantu, hakumuumbaku.

²¹Hakumubalumuna kwikala mwanta wetala dindi, nyuli yamahetindi ejima,

²²Akasaŋa tuhu atulamba twindi mwonsu munakeŋi muchima windi, ayilejana awakulumpi adiŋiyi nawu maana.

²³Isarela nawa wayili muEjipitu; Yakoba wazonkaminini mwituŋa daHami.

²⁴Wamuvulishilili antu indi nankashi; wayi kolesheleli Ŋovu yawu kulonda yibadiki yawakwankunyi nawu.

²⁵Wayibalumwinini nyichima yawu kulonda aheli antu indi, mwaka ayikwatili ambuŋindi makasu.

²⁶Watemesheli kambuŋindi Mosi, niAroni atondeliyi.

²⁷Amwekesheli mukachi kawu yinjikijilu yindi, niyuma yakuhayamisha mwituŋa daHami;

²⁸Watemesheli mwidima, mwiia nibwi-i; hiyadikaŋili namazu induku.

²⁹Wabalumwini meji awu himashi, wajahili inshi jawu.

³⁰Ituji dawu dayakatili kwayúula hohu, nimumatala awanyanta jawu.

³¹Wahosheli, himukwinza ninyikakata yawanjinji yayeni, ninkusa mwahitapinza jawu jejima.

³²Nvula hiyikunoka yamalola hohu, ni kesi kanyizuzu mwituŋa dawu.

³³Weteli ninyivinyu yawu nawa, niyikuyu yawu; wakotweli nyitondumwahita ŋinza jawu.

³⁴Wahosheli, kabola hakwinza, nimahashi, kutwesha kuyichinda nehi,

³⁵Adiili mafu mwituŋa dawu ejima to-o, adiili ninyitondu yaheseki dawuzo-o.

³⁶Watapili awedi ejima amwituŋa dawu, joji ŋovu jawu jakutachika.

³⁷Wayiidishilumu nasiliva nawuru; hanyichidi yindi hihadiŋi muntuniwumu wazeyeluku.

³⁸Chayiluwu, aEjipitu atiyili kuwaha, muloŋa woma wawu wayikwatili.

³⁹Wayitanjikilili ivu dakuyibuta nachu, ni kesi kakuyitoŋekela nawufuku.

⁴⁰Alombeli, hakuleta niaŋumbi, hakuyi ikutisha nakudya kwamwiwulu.

⁴¹Wajikwili mwilola, nimeji swa-swa-swa; hiyakuya nilufuchi mwawuma, hikaŋa.

⁴²Wa anukili chikaninu chindi chajila, nikambuŋindi Abarahama.

⁴³Wedishili antu indi nakuzaŋalala, indi atondeliyi wayiidishili iku adina kwimba tumina.

⁴⁴Wayinkeli matuŋi anyuza; yuma yakalakeluwu antu acheŋi wena ayitambwili tuhu hiyawu;

⁴⁵Kulonda nindi ahembi mwayulayi, nindi ovwahili nimwaya nshimbi jindi. Aleluya.