Read MUKANDA WANZAMBI Lisamu 115 Bible Online

Lisamu 115 - MUKANDA WANZAMBI bible

Lisamu 115

¹Bayi wutulemeshaŋa etuku, eyi Yehova, bayi wutulemeshaŋa etuku, lemeshaku ijina deyi, muloŋa waluwi lweyi nansaŋuyeyi yalala.

²Ochu nyuza yadi kuhosheladi, nawu, Nzambi yawu wudi kudihi dinu?

³Ilaŋa Nzambi yetu wekala mumawulu; neli kwindi mwejima mwakeŋa i muchima windi.

⁴Akishi awu hisiliva nawuru, hinyidimu yakumakasa awantu.

⁵Akweti tunwa, hiyahoshaŋaku; akweti nimesu, hiyamonaŋaku;

⁶Akweti matu, hiyatiyaŋaku; akweti mazulu, hiyatiyaŋa ivumbaku;

⁷Makasa adi nawu, hiyakwataŋaku; nyendu adi nayu, hiyendaŋaku; hela munyidiwu yawu himwavumaŋaku.

⁸Niayituŋaŋa niwejima wawu ayikuhwelelaŋa akadifwana nawu.

⁹Enu aIsarela, kuhwelelenu Yehova; diyi nkwashi yawu, diyi nkebu yawu.

¹⁰Enu akwamutaŋa waAroni, kuhwelelenu Yehova; diyi nkwashi yawu, diyi nkebu yawu

¹¹Enu mwaakamaŋa Yehova, kuhwelelenu Yehova; diyi nkwashi yawu, diyi nkebu yawu.

¹²Yehova natwanuki, wukutukiswila nkisu; wukuyikiswila akwamutaŋa waIsarela nkisu; wukuyikiswila akwamutaŋa waAroni nkisu.

¹³Amwakamaŋa Yehova wukuyikiswila nkisu, nianyanya niamaneni.

¹⁴Yehova wukuyivulisha, ninenu ni anyanenu.

¹⁵Anayikiswili nkisu kudi Yehova, diyi welili nimawulu nimaseki.

¹⁶Mawulu himawulu ambala aYehova, hakwinza maseki nayinkuwu anyanakawantu.

¹⁷Afu hiyamuhamekaŋa Yehovaku, hela akunkumuka dehi mwakumwena zo-o hiya muhame kaŋi Yehovaku.

¹⁸Ilaŋai etu kwetu tukumukiswila Yehova nkisu kufumisha hanu nakutwala kunyaka yahaya nyaka. Aleluya.