Read MUKANDA WANZAMBI Lisamu 139 Bible Online

Lisamu 139 - MUKANDA WANZAMBI bible

Lisamu 139

¹Damukulumpi wawakwakwimba. Isamu daDavidi Eyi Yehova, wunantali chachiwahi, wunaŋiluki.

²Eyi weluka nichinashakamaŋa nichinanyamukaŋa, washinshikaŋamu natoŋojokaŋaa neyi hiwuchidi kwakulehi.

³Nichinendaŋa nichinakambamaŋa eyi wantalaŋa, weluka ninjila jami jejima.

⁴Mukanwa kami mwosi izu nidimu dákubula eyi Yehova kudiluka chikupuku.

⁵Wunankumi nikunyima nikumbidi, wunannaŋikili chikasa cheyi.

⁶Maana awa anasweji! Nakumini dakuhayama hohu! Anabadiki, nakaŋnyi kushikamu!

⁷Indi nukuya kudihi kukubula kwikala spiritu yeyi? Indi nukutemukila kudihi kukubula kwikala eyi?

⁸Hinili nami nikandami mwiwulu, yeyi awa; nami nikambami mukalupa, yeyi awa.

⁹Neyi nukutambula mpuula jabudidi nakuya nakushakama kwakumina kaluŋalwiji,

¹⁰Hela kwenoku nawa chikasa cheyi chakanlombola, chikasa cheyi chachidiilu chakankwata.

¹¹Neyi nukwila nami, Chalala mwidima wukumbuta wi-i, wufuku wukubalumuka himwaana to-o hinidami.

¹²Mwalala mwidima hiwukutwesha kunsweka kudeyuku, wufuku wutookato-o neyi mwaana. Nimwidima nimwaana hohamu hohu.

¹³Eyi watuŋili yami yamwivumu; wannuŋili chachiwahi mwivumu damama yami.

¹⁴Nakusakilili; chanantuŋuwu chakala chakuhayama hohu! Nyidimuyeyi yakuhayama hohu; muchima wami wunachiluki nankashi.

¹⁵Chantuŋiluwu mwakujinda hela chambaziluwu mwishina damaseki mwamweni, hiyakuswekeleyi mujimba wamuku.

¹⁶Chinadiŋi nichidi wamwisu, mesu eyi anmweni, asonekeli mumukandaweyi yidi yami yejima yatuŋilaŋa awu hefuku hefuku, hela yachidiŋi kwosi kwayu.

¹⁷Yitonojoka yeyi o chinayimona kulema, eyi Nzambi! Kuyichinda ochiyavula!

¹⁸Neyi nukuyichinda yikuvula nankashi, wusekulula wukukeha. Chinukutona namutulu nichidi hamu naneyi.

¹⁹Chalala, eyi Nzambi, muntu watama wukumujaha; dichi dinu nfumenu, enu akwakupwekesha mashi awakwenu.

²⁰Muloŋa wena enda atena ijina deyi chatama, ayilumbu jeyi enda adisanyika chakutwamba.

²¹Eyi Yehova, antu akuheleyi ami hinayiheluku? Antu anyamukaŋa nakudeseka naneyi hinayitiyaŋa kwami kutamaku?

²²Nayiheli chikupu kwami; nayifuukuli nami hiyayilumbu jami.

²³Ntali chachiwahi, eyi Nzambi, wiluki muchima wami; ŋeseki, wiluki

²⁴Wumoni neyi mudami mwekala kwenda kwakuluwa, wunlomboli munjila yahaya nyaka.